របាយការណ៍៖ ដីព្រៃលិចទឹកជាង ៨ពាន់ហិកតា នៅបាត់ដំបង និងពោធិ៍សាត់ ត្រូវបានទន្ទ្រាន
ដោយ៖ ឈុំ ចន្ថា
ដីព្រៃលិចទឹកជាង ៨ពាន់ហិកតា ស្ថិតនៅខេត្តបាត់ដំបង និងខេត្តពោធិ៍សាត់ ត្រូវបានកាប់ទន្ទ្រានខុសច្បាប់។ នេះបើតាមហ្វេសប៊ុកផេកលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ក្រុមការងារអន្តរក្រសួង ដែលដឹកនាំដោយលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កំពុងចុះពិនិត្យដែនព្រៃលិចទឹកនៅតំបន់បឹងទន្លេសាប។ ក្នុងដំណើរចុះត្រួតពិនិត្យនៅខេត្តបាត់ដំបង និងខេត្តពោធិ៍សាត់ ក្រុមការងារអន្តរក្រសួង បានរកឃើញដីជាង ៨ពាន់ហិកតាត្រូវបានកាប់ទន្ទ្រាន។
បើតាមហ្វេសប៊ុកផេកលោក វេង សាខុន រដ្ឋមន្ត្រីក្រសួងកសិកម្ម ព្រៃលិចទឹកតំបន់៣ ស្ថិតនៅស្រុកចំនួន៤ ក្នុងភូមិសាស្ត្រខេត្តបាត់ដំបង ជាប់នឹងតំបន់ដីព្រៃលិចទឹកបឹងទន្លេសាប ចំនួន ៣៧៦៨,៤ហិកតា ត្រូវបានកាប់ទន្ទ្រាន។ រដ្ឋមន្ត្រីរូបនេះ បានបញ្ជាក់ថា ក្នុងស្រុកសង្កែ មាន៤ឃុំ ដែលបានកាប់ទន្ទ្រាន លើទីតាំង៦កន្លែង ស្មើនឹង១១៤,៥ហិកតា និងមានពលរដ្ឋរស់នៅ ១៩៤៤គ្រួសារ។
ដោយឡែក ស្រុកថ្មគោល មាន៤ឃុំ ដែលមាន៨កន្លែង ស្មើនឹងផ្ទៃដី ៣៨៦ហិកតា និងមានពលរដ្ឋ ៦៩គ្រួសារ។ ចំណែក ស្រុកមោងឫស្សីវិញ មាន៥ឃុំ ដែលបានទន្ទ្រានកាន់កាប់លើទីតាំងចំនួន ១១កន្លែង ស្មើនឹង ២១៤,៧ហិកតា និងមានពលរដ្ឋចំនួន១៩២គ្រួសារ។ រីឯ ស្រុកឯកភ្នំ មាន៤ឃុំ បានទន្ទ្រានកាន់កាប់ ដោយមាន៤កន្លែង ស្មើនឹង ៣០៥៣,២ហិកតា និងមានពលរដ្ឋ ៣០៩គ្រួសារ។
ទំព័រហ្វេសប៊ុកផេកលោក វេង សាខុន កាលពីថ្ងៃទី៥ ធ្នូ បង្ហាញថា ក្នុងខេត្តពោធិ៍សាត់ អាជ្ញាធរបានរកឃើញការទន្ទ្រានដីព្រៃលិចទឹកចំនួន ៤,៤៣៤.០៧ហិកតា ដែលមានពលរដ្ឋរស់នៅចំនួន ១៩២១គ្រួសារ ស្ថិតនៅស្រុកបាកាន កណ្ដៀង និងក្រគរ។ ក្នុងនោះ ស្រុកបាកាន មាន៤ឃុំ ដែលបានទន្ទ្រានដីព្រៃលិចទឹកប្រមាណ ១០២២,៦៨ហិកតា និងមានពលរដ្ឋរស់នៅ ៣៤៩គ្រួសារ។
សម្រាប់ស្រុកកណ្តៀង មាន៦ឃុំ ដែលបានទន្ទ្រានដីចំនួន ១៨៦៣,៧៩ហិកតា និងមានពលរដ្ឋរស់នៅ ៦៦២គ្រួសារ និងស្រុកក្រគរ មាន៧ឃុំ មានការទន្ទ្រានចំនួន ១ ៥៤៧,៦ហិកតា និងមានពលរដ្ឋរស់នៅ ៩១០គ្រួសារ។
ទាក់ទងនឹងការទន្ទ្រានដីព្រៃលិចទឹកក្នុងខេត្តពោធិ៍សាត់ និងបាត់ដំបងនេះ ក្រុមការងារអន្តរក្រសួង តម្រូវឱ្យជនល្មើសដាំដើមឈើឡើងវិញលើផ្ទៃដីដែលបានទន្ទ្រាន ជាពិសេសដើមឫស្សី។ ជាមួយគ្នានេះ ប្រជាពលរដ្ឋដែលបានដាំដំណាំ ពិសេសដំណាំស្រូវ ក្រុមការងារអន្តរក្រសួង ទុកពេលឱ្យប្រមូលផល រួចស្នើឱ្យធ្វើ លិខិតទទួលកំហុស និងប្រគល់ដីព្រៃលិចទឹកជូនរដ្ឋវិញ។
សូមបញ្ជាក់ថា តាមរយៈសារសំឡេងពិសេស ពាក់ព័ន្ធនឹងបញ្ហាបឹងទន្លេសាប នៅថ្ងៃទី២៨ វិច្ឆិកា សម្ដេច ហ៊ុន សែន បានបញ្ជាឱ្យដកហូតយកដីព្រៃលិចទឹក ដែលត្រូវបានអ្នកមានអំណាច និងជនខិលខូច កាប់ទន្ទ្រានខុសច្បាប់យកមកវិញទាំងអស់។ សម្ដេច ហ៊ុន សែន បានប្រកាសមិនអត់ឱនឱ្យមន្ត្រីណា ដែលឆ្លៀតឱកាសប្រព្រឹត្តអំពើលោភលន់ខុសច្បាប់ ខណៈរដ្ឋាភិបាល កំពុងរវល់ប្រឹងប្រែងប្រយុទ្ធ និងទប់ស្កាត់ជំងឺកូវីដ-១៩ នេះទេ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com