ដើមឈើ ១ពាន់ដើម ត្រូវបានដាំស្ដារឡើងវិញ នៅដែនជម្រកសត្វព្រៃគូលែនព្រហ្មទេព
ដោយ៖ ប៉ូ សុភា
ភ្នំពេញ៖ អង្គការ WCS សហការជាមួយរដ្ឋបាលខេត្ត និងមន្ទីរបរិស្ថានខេត្តព្រះវិហារ ចុះដាំកូនឈើចំនួន១ពាន់ដើម លើទីតាំងដែលបានកាប់រាននៅដែនជម្រកសត្វព្រៃគូលែនព្រហ្មទេព ភូមិសាស្ត្រខេត្តព្រះវិហារ។ ការដាំកូនឈើនេះ ធ្វើឡើងដើម្បីស្ដារឡើងវិញនូវតំបន់ការពារដែលរេចរឹល និងដើម្បីធ្វើឱ្យមានភាពប្រសើរឡើងវិញនូវបរិស្ថាន និងធនធានធម្មជាតិ។
ថ្ងៃទី៣០ ខែវិច្ឆិកាកន្លងទៅ អង្គការ WCS សហការជាមួយរដ្ឋបាលខេត្ត និងមន្ទីរបរិស្ថានខេត្តព្រះវិហារ បានដាំកូនគគីរ បេង នាងនួន ធ្នង់ ចំនួន១ពាន់ដើម នៅក្នុងដែនជម្រកសត្វព្រៃគូលែនព្រហ្មទេព ភូមិសាស្ត្រខេត្តព្រះវិហារ។ លោក Nev Broadis ទីប្រឹក្សាបច្ចេកទេសតំបន់ការពារធម្មជាតិភាគខាងជើងនៃអង្គការWCS បានបញ្ជាក់ថា គម្រោងខាងលើត្រូវបានគាំទ្រការងារអភិរក្សតំបន់ការពារធម្មជាតិចំនួន ៤រួមមាន ដែនជម្រកសត្វព្រៃគូលែនព្រហ្មទេព ដែនជម្រកសត្វព្រៃឆែប ដែនជម្រកសត្វព្រៃព្រះរកា និងតំបន់បេតិកភណ្ឌធម្មជាតិភ្នំត្បែង។
ជាមួយគ្នានេះ តំបន់ការពារធម្មជាតិភាគខាងជើង គាំទ្រដល់ការអភិវឌ្ឍសហគមន៍ និងការការពារជីវៈចម្រុះ និងព្រៃឈើប្រទេសកម្ពុជាប្រកបដោយចីរភាព តាមរយៈការលក់ឥណទានកាបូននៅលើទីផ្សារកាបូនស្ម័គ្រចិត្ត។ លោក Nev Broadis លើកឡើងថា៖«គម្រោងនេះ បានគាំទ្របង្កើតសហគមន៍តំបន់ការពារធម្មជាតិចំនួន២០នៅទូទាំងតំបន់។ សកម្មភាពនេះ បានដើរតួនាទីសំខាន់ក្នុងការជួយការពារព្រៃឈើ និងជីវៈចម្រុះរបស់កម្ពុជាឱ្យនៅគង់វង្សរយៈពេលវែង»។
_1638774431.jpg)
ទីប្រឹក្សាបច្ចេកទេសខាងលើបាន បន្ថែមថា ការដាំស្តារព្រៃឈើឡើងវិញ គឺផ្តោតតែទៅលើតំបន់ទាំងឡាយណាដែលទទួលរងការកាប់រានខុសច្បាប់ ហើយត្រូវបានមន្ទីរបរិស្ថានខេត្តដកហូតយកមកគ្រប់គ្រង។ ទន្ទឹមនឹងនេះ គម្រោងរេដបូកតំបន់ការពារធម្មជាតិភាគខាងជើង នឹងចាប់ផ្តើមអនុវត្តនៅក្នុងតំបន់ការពារធម្មជាតិចំនួន ៣មុនគេ គឺទី១ នៅដែនជម្រកសត្វព្រៃគូលែនព្រហ្មទេព ទីពីរដែនជម្រកសត្វព្រៃឆែប និងទី៣ ដែនជម្រកសត្វព្រៃព្រះរកា ហើយបន្ទាប់មកពង្រីកទៅកាន់តំបន់បេតិកភណ្ឌធម្មជាតិភ្នំត្បែង។
ក្នុងដំណើរការការងាររេដបូកជិតបីឆ្នាំ ទីប្រឹក្សាបច្ចេកទេសរបស់អង្គការ WCS សង្កេតឃើញថា បញ្ហារួមជាមួយកត្តាគំរាមកំហែងចំពោះព្រៃឈើនៅក្នុងតំបន់ធម្មជាតិភាគខាងជើង ស្រដៀងគ្នាទៅនឹងកត្តាគំរាមកំហែងនៅទូទាំងប្រទេស ដូចជាការរំលោភយកដីខុសច្បាប់ ការកាប់រានដីព្រៃ ដើម្បីធ្វើកសិកម្ម និងការកាប់រានក្រោមរូបភាពសម្បទាន។ លើសពីនេះ លោកគិតថា ចន្លោះពីឆ្នាំ២០១៨ ដល់ឆ្នាំ២០៣៨ ការគាំទ្ររយៈពេលវែងរបស់អង្គការ WCS នឹងចូលរួមចំណែកជួយកាត់បន្ថយការបាត់បង់ព្រៃឈើនៅក្នុងតំបន់ទាំងនេះ បើធៀបទៅនឹងតំបន់ដទៃទៀត។
ទន្ទឹមនេះ អង្គការ WCS សង្ឃឹមថា គម្រោងរេដបូកថ្មីនេះ នឹងជួយពង្រីកនិងបង្កើនកិច្ចការពារព្រៃទាំងនេះថែមមួយកម្រិតទៀត ព្រមទាំងអាចជួយគាំទ្រសហគមន៍ ដើម្បីធ្វើការអភិវឌ្ឍ និងការពារសិទ្ធិ ដើម្បីទទួលបានផលពីធនធានធម្មជាតិទាំងនោះ។ មួយវិញទៀត ក៏អាចរួមចំណែកការពារប្រភេទសត្វជិតផុតពូជបំផុត និងផ្តល់ប្រាក់ចំណូលបន្ថែមដល់សហគមន៍តាមរយៈសេវាទេសចរណ៍ផ្ទាល់ពីភ្ញៀវផងដែរ៕
