មន្ទីរកសិកម្មឧត្តរមានជ័យ ចែកពូជត្រី កង្កែប និងមាន់ដល់ពលរដ្ឋក្រីក្រ និងចំណាកស្រុក៩០០គ្រួសារ ដើម្បីស្ដារសេដ្ឋកិច្ច
ដោយ៖ ញឹក ស្រីល័ក្ខ
ភ្នំពេញ៖ ពលរដ្ឋក្រីក្រ និងចំណាកស្រុកពីប្រទេសថៃចំនួន ៩០០គ្រួសារ នឹងទទួលបានពូជត្រី កង្កែប មាន់ រួមទាំងសម្ភារកសិកម្មពីគម្រោងរបស់អង្គការ GIZ តាមរយៈមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ ដើម្បីស្ដារសេដ្ឋកិច្ចឡើងវិញ។ បើតាមលោក សូត្រ ស៊ីសុខឃាង ប្រធានមន្ទីរកសិកម្មខេត្តឧត្តរមានជ័យ ពលរដ្ឋ ៣០០គ្រួសារ នឹងទទួលបានពូជកង្កែប, ៣០០គ្រួសារទទួលបានពូជត្រីអណ្ដែង និង៣០០គ្រួសារទៀត ទទួលបានសត្វមាន់ ដើម្បីយកទៅចិញ្ចឹម។
ព្រឹត្តិការណ៍សហគមន៍២០កុម្ភៈ នៅតែបន្តរីករាលដាលនៅតាមបណ្ដាខេត្តនានាក្នុងប្រទេសកម្ពុជា ដែលធ្វើឱ្យពលរដ្ឋមួយចំនួនជួបបញ្ហាប្រឈម។ ដោយមើលឃើញផលលំបាករបស់ពលរដ្ឋ អង្គការ GIZ របស់អាល្លឺម៉ង់ តាមរយៈមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ បានផ្ដល់ពូជត្រី កង្កែប មាន់ រួមទាំងសម្ភារកសិកម្មដល់ពលរដ្ឋក្រីក្រ និងចំណាកស្រុកពីប្រទេសថៃចំនួន ៩០០គ្រួសារ ដើម្បីដោះស្រាយបញ្ហាជីវភាព។
លោក សូត្រ ស៊ីសុខឃាង ប្រធានមន្ទីរកសិកម្មខេត្តឧត្តរមានជ័យ បានប្រាប់សារព័ត៌មានថ្មីៗ Thmey Thmey 25 ថា ការផ្ដល់ពូជត្រី កង្កែប និងមាន់ដល់ពលរដ្ឋនេះ ក្នុងគោលបំណងស្ដារសេដ្ឋកិច្ច និងដោះស្រាយបញ្ហាជីវភាពពលរដ្ឋក្នុងបរិបទកូវីដ-១៩។ បើតាមប្រធានមន្ទីរកសិកម្មរូបនេះ គម្រោងរបស់អង្គការ GIZ អាល្លឺម៉ង់ មានរយៈពេល៤ខែ ចាប់ពីខែមិថុនាដល់ខែតុលា ដោយបច្ចុប្បន្នចែកដល់ពលរដ្ឋ ៦០០គ្រួសារហើយ។
រូបភាពពីហ្វេសប៊ុកមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ
ប្រធានមន្ទីរកសិកម្មរូបនេះ លើកឡើងយ៉ាងដូច្នេះ៖ «បច្ចុប្បន្ន មន្ទីរកសិកម្ម បានចែកដល់ពលរដ្ឋ ៦០០គ្រួសារហើយ។ ដោយក្រុមចិញ្ចឹមកង្កែប ទទួលបានកង្កែប ២៥០ក្បាលក្នុងមួយគ្រួសារ និងក្រុមចិញ្ចឹមត្រីអណ្ដែង ទទួលបានកូនត្រី ៤៥០ក្បាល ក្នុងមួយគ្រួសារ»។
ដោយឡែក សម្រាប់ពូជមាន់វិញ មន្ទីរកសិកម្មមិនទាន់បានចែកជូនដល់ពលរដ្ឋនោះទេ ដោយរង់ចាំមាន់ទាំងនោះ ទទួលបានការចាក់វ៉ាក់សាំងគ្រប់គ្រាន់សិន។ លោក ស៊ីសុខឃាង បន្តថា ពូជមាន់ទាំងនេះ នឹងអាចចែកនៅសប្ដាហ៍ទី៣ នៃខែតុលា ដោយក្នុងមួយគ្រួសារទទួលបានមាន់ចំនួន ១២ក្បាល។
រូបភាពពីហ្វេសប៊ុកមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ
ក្នុងរយៈពេលជិត៤ខែនៃគម្រោងនេះ មានពលរដ្ឋមួយចំនួន អាចប្រមូលផលកង្កែប និងត្រីអណ្ដែងរបស់ខ្លួនជាបណ្ដើរៗហើយ។ ប្រធានមន្ទីរកសិកម្មរូបនេះ បញ្ជាក់ថា៖ «មកដល់ពេលនេះ ពលរដ្ឋខ្លះ អាចប្រមូលផលកង្កែប និងត្រី សម្រាប់បរិភោគ និងលក់។ កង្កែប ពួកគាត់ចិញ្ចឹមតែមួយខែបានផល ហើយត្រីអណ្ដែងវិញ ចំណាយពេលតែពីរខែទេ។ នេះជាការចិញ្ចឹមលក្ខណៈគ្រួសារសម្រាប់ជាស្បៀង និងលក់ក្នុងមូលដ្ឋាន»។
ក្រៅពីផ្ដល់ពូជដល់ប្រជាពលរដ្ឋសម្រាប់ចិញ្ចឹម មន្ទីរកសិកម្មខេត្តឧត្តរមានជ័យ ក៏បានផ្ដល់នូវសម្ភារមួយចំនួនរួមមាន តង់ និងចំណី។ លើសពីនេះ ពលរដ្ឋក្រីក្រ និងចំណាកស្រុកទាំងនោះ ក៏ទទួលបានការបណ្ដុះបណ្ដាលបច្ចេកទេសចិញ្ចឹម និងថែទាំពីមន្ត្រីជំនាញផងដែរ។ ក្រោយពីគម្រោងនេះបញ្ចប់ លោក សូត្រ ស៊ីសុខឃាង សង្ឃឹមថា ពលរដ្ឋទាំងអស់ អាចបន្តការចិញ្ចឹម ដោយបច្ចុប្បន្នខេត្តឧត្តរមានជ័យ មានទីតាំងលក់ពូជត្រី និងកង្កែប ដែលផ្ដល់ភាពងាយស្រួលដល់កសិករមិនលំបាកលើបញ្ហាខ្វះពូជយកមកចិញ្ចឹម។
រូបភាពពីហ្វេសប៊ុកមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ
សូមបញ្ជាក់ថា ក្នុងបរិបទកូវីដ-១៩នេះ អង្គការ GIZ បានផ្ដល់ការងារដល់ពលរដ្ឋក្រីក្រ និងចំណាកស្រុកពីប្រទេសថៃចំនួន ១៤០នាក់ឱ្យសម្អាតផ្នែកខាងក្រោមនៃសហគមន៍ព្រៃឈើចំនួន ៤ទីតាំង ដើម្បីជាគោលដៅទេសចរណ៍។ នៅតាមសហគមន៍នីមួយៗ ពលរដ្ឋទាំងនោះ ត្រូវចំណាយចំនួន ២០ថ្ងៃសម្រាប់ស្អាត ដោយក្នុង១ថ្ងៃ ម្នាក់ៗទទួលបានថវិកា ៣ម៉ឺនរៀល និងផ្តល់ជូនពូជមាន់ ត្រីអណ្តែង និងកង្កែប សម្រាប់ចិញ្ចឹមហូបនិងផ្គត់ផ្គង់ជីវភាពផងដែរ។
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com