៦ចំណុច ដើម្បីដាំគូលែនបានទិន្នផលល្អ!
ដោយ៖ ញឹក ស្រីល័ក្ខ
ភ្នំពេញ៖ គូលែន ជាដំណាំម្យ៉ាង ផ្លែមានសណ្ឋានស្រដៀងគ្នានឹងផ្លែសិរមាន់, ស្លឹកវែងៗស្រួចចុង។ នៅកម្ពុជា ដើមគូលែនសម្បូរនៅភ្នំគូលែន ក្នុងខេត្តសៀមរាប។ ប៉ុន្តែបច្ចុប្បន្ន ប្រជាកសិករខ្មែរនៅតាមបណ្ដាខេត្តមួយចំនួន ក៏បានដាំដុះគូលែនសម្រាប់ផ្គត់ផ្គង់លើទីផ្សារផងដែរ។ ថ្ងៃនេះ សារព័ត៌មានថ្មីៗ Thmey Thmey 25 នឹងជម្រាបជូនពីរបៀបដាំគូលែន ដែលដកស្រង់ឯកសារពីបណ្ដាល័យក្រសួងកសិកម្ម រុក្ខាប្រមាញ់ និងនេសាទ ជូនប្រិយមិត្តអ្នកអាន។
១. ការរៀបចំរណ្ដៅ៖ ត្រូវជីករណ្ដៅ៦តឹកបួនជ្រុង និងជម្រៅ៦តឹក។ បន្ទាប់មក រោយកំបោរសប្រមាណ ២ស្លាបព្រាបាយក្នុងរណ្ដៅ។ លោក-អ្នក ត្រូវដាក់ផេះ, អង្កាម, កំប្លោក, ចំបើងពុក, លាមកមាន់ ឬលាមកជ្រូក ឬលាមកគោមួយស្រទាប់កម្រាស់ ១តឹក រួចដាក់ដីពីលើ ១តឹក ធ្វើយ៉ាងនេះរហូតទាល់តែពេញរណ្ដៅ។ ក្រោយមក ត្រូវទុករណ្ដៅរៀបចំហើយក្នុងរយៈពេល២ទៅ ៣អាទិត្យ។ លើសពីនេះ ចម្ងាយពីរណ្ដៅមួយទៅរណ្ដៅមួយ ត្រូវមានប្រវែង ៨ម៉ែត្រ។
២. ការដាំ៖ កូនគូលែនត្រូវរក្សាផ្សាំទុក ១អាទិត្យ មុនដាំ និងផ្អាកស្រោចទឹក ២ថ្ងៃមុនដាំ ដើម្បីកុំឱ្យបែកដី និងឫស។ មុនដាំ ត្រូវជញ្ជូនកូនគូលែនដាក់ក្បែររណ្ដៅទាំងអស់ និងមកថង់ចេញ ធ្វើយ៉ាងណាកុំឱ្យបែកដី។ បន្ទាប់មក កប់កូនគូលែនក្នុងរណ្ដៅដោយធ្វើយ៉ាងណាឱ្យដីកន្ទោងកូនគូលែនស្មើមាត់រណ្ដៅរួចយកមែកឈើដោតក្បែររណ្ដៅចងទប់ជាមួយកូនគូលែន។ ចុងក្រោយ លុបដីបន្តិចម្ដងៗ ដោយសង្កត់ថ្នមៗហាម សង្កត់លើដីកន្ទោងកូនគូលែនដែលបណ្ដាលឱ្យដាច់ឫស។
៣. ការថែទាំ និងដាក់ជី៖ ក្នុងខែវស្សាត្រូវពូនគល់ការពារទឹកជាំនៅគល់ ដែលបណ្ដាលឱ្យរលួយឫស និងនៅដើមរដូវប្រាំងគួរដាក់ជីបំប៉ន ដោយប្រើជាលាមកមាន់ ឬលាមកជ្រូក ឬលាមកគោ លាយជាមួយអង្កាមពុក, ចំបើង, កំប្លោករលួយកាយកប់ក្នុងដី ធ្វើជាកំពែង។ ប្រសិនបើកូនគូលែនមានសត្វល្អិតស៊ីត្រួយត្រូវប្រើថ្នាំសម្លាប់សត្វល្អិត (ណាតូ)។
៤. ការស្រោចទឹក៖ កូនគូលែនអាយុតិចជាង ២ឆ្នាំ ត្រូវស្រោចទឹក ១ដង ក្នុង១អាទិត្យនៅរដូវប្រាំង និងត្រូវស្រោចទឹកតែម្ដងគត់នៅពេលវាកំពុងផ្កា។
៥. ការកាត់តែងមែក៖ ត្រូវកាត់ត្រួយចុងចេញនៅឆ្នាំទីមួយ និងកាត់មែកមិនសូវល្អចេញរៀងរាល់ឆ្នាំ ដោយទុកតាមប្រព័ន្ធ១-៣-៦-១៨ (ដើម១-មែកធំ៣-ខ្នែងធំ៦ និងខ្នែងត្រួយ១៨)។ នៅពេលផ្លែគូលែន មានទំហំប៉ុនមេដៃយើងត្រូវបាញ់ថ្នាំសម្លាប់សត្វល្អិត (ណាតូ) ទៅលើផ្លែ ដើម្បីការពារដង្កូវស៊ីផ្លែនៅពេលទុំ។
៦. ការប្រមូលផល៖ មិនត្រូវបេះផ្លែគូលែនទម្លាក់លើដី ដោយត្រូវបេះផ្លែគូលែនឱ្យមានជាប់ទងជាការប្រសើរ៕
