និស្សិតកសិកម្មហាត់ការនៅអ៊ីស្រាអែលចំនួន ៣៨នាក់ នឹងមកដល់កម្ពុជានៅល្ងាចថ្ងៃទី២៧ សីហានេះ
ដោយ៖ ញឹក ស្រីល័ក្ខ
ភ្នំពេញ៖ និស្សិតចំនួន ៣៨នាក់ បានបញ្ចប់ការហាត់ការលើវិស័យកសិកម្ម នៅប្រទេសអ៊ីស្រាអែល រយៈពេល២ឆ្នាំ នឹងវិលត្រឡប់មកកម្ពុជានៅល្ងាចថ្ងៃទី២៧ សីហានេះ។ ជាមួយគ្នានេះ កម្ពុជា គ្រោងបញ្ជូននិស្សិតកសិកម្មចំនួន ២០០នាក់បន្ថែមទៀត ទៅហាត់ការនៅប្រទេសអ៊ីស្រាអែលនាពេលខាងមុខ។ នេះបើតាមលោក វេង សាខុន រដ្ឋមន្រ្តីកសិកម្ម ។
ក្រុមនិស្សិតនៃសាកលវិទ្យាល័យភូមិន្ទកសិកម្មចំនួន ៣៨នាក់ ដែលបានហាត់ការរយៈពេល២ឆ្នាំ នៅប្រទេសអ៊ីស្រាអែល នឹងធ្វើដំណើរមកដល់អាកាសយានដ្ឋានអន្តរជាតិភ្នំពេញ នៅល្ងាចថ្ងៃទី២៧ សីហានេះ។ វត្តមាននៃការវិលត្រឡប់មកកាន់មាតុភូមិរបស់ក្រុមនិស្សិតកសិកម្មនេះ បានធ្វើឱ្យលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ សាទរ និងអបអបចំពោះការខិតខំរបស់ក្រុមនិស្សិត ដែលបានទៅហាត់ការជំនាញកសិកម្មនៅអ៊ីស្រាអែល នាពេលកន្លងមក។
បើតាមទំព័រហ្វេសប៊ុករដ្ឋមន្រ្តីកសិកម្ម នៅព្រឹកថ្ងៃទី២៧ សីហានេះ ក្រុមនិស្សិតចំនួន ១៣នាក់ផ្សេងទៀត ដែលហាត់ការរយៈពេល២ឆ្នាំ នៅក្នុងកសិដ្ឋានចិញ្ចឹមគោយកទឹកដោះ និងនិស្សិតហាត់ការរយៈពេល១១ខែ ចំនួន ១៩៧នាក់ នឹងមកដល់កម្ពុជា នៅថ្ងៃទី១០ កញ្ញាខាងមុខ។
ជាមួយគ្នានេះ កម្ពុជា គ្រោងបញ្ជូនក្រុមនិស្សិតកសិកម្មចំនួន២០០នាក់បន្ថែមទៀត ដើម្បីទៅហាត់ការនៅប្រទេសអ៊ីស្រាអែលនាពេលដ៏ខ្លីខាងមុខ ខណៈបច្ចុប្បន្នក្រុមនិស្សិតទាំងនោះកំពុងបំពេញបែបបទ។ គួរបញ្ជាក់ថា ក្រោយពីការចុះកិច្ចព្រមព្រៀងសហប្រតិបត្តិការ រវាងសាកលវិទ្យាល័យភូមិន្ទកសិកម្ម និងក្រុមហ៊ុនAgrostudies នៃប្រទេសអ៊ីស្រាអែល នាឆ្នាំ២០០៨ សាកលវិទ្យាល័យ បានបញ្ជូននិស្សិតចូលរួមកម្មវិធីហាត់ការ រយៈពេល១១ខែ បានចំនួន១៣ជំនាន់ ដែលមាននិស្សិតសរុបចំនួន ១ ២៧១ នាក់៕
