លោក វេង សាខុន៖ គម្រោងចំនួន៣របស់ក្រសួងកសិកម្ម បានជួយលើកកម្ពស់ជីវភាពកសិករកម្ពុជា
ក្រសួងកសិកម្ម រុក្ខាប្រមាញ់ និងនេសាទ បានបង្ហាញគម្រោងចំនួន៣ ដែលបានចូលរួមលើកកម្ពស់សេដ្ឋកិច្ចគ្រួសារកសិករកម្ពុជា កន្លងមក។ ទី១ គឺកម្មវិធីផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ(អាស្ប៉ាយ)។ ទី២ គម្រោងពិពិធកម្មកសិកម្មកម្ពុជា និងទី៣ជាគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប ជំហាន២។ នេះបើតាមលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ។
លោករដ្ឋមន្រ្តីក្រសួងកសិកម្ម បានបង្ហាញពីគម្រោងអភិវឌ្ឍកសិកម្មទាំង៣ ជាបន្តបន្ទាប់នៅលើគណនីហ្វេសប៊ុកផ្ទាល់របស់លោក ក្រោយសាធារណជនលើកឡើងថា ក្រសួងកសិកម្ម មិនអើពើរឿងកសិផលខ្វះទីផ្សារ។
បើតាម លោក វេង សាខុន កម្មវិធី«អាស្ប៉ាយ» គឺជាគម្រោងទី១ របស់ក្រសួងកសិកម្ម ដែលជួយលើកម្ពស់វិស័យកសិកម្មកម្ពុជា និងរួមចំណែកកាត់បន្ថយភាពក្រីក្ររបស់ពលរដ្ឋកម្ពុជា។ កម្មវិធីនេះបានអនុវត្តរយៈពេល៦ឆ្នាំមកហើយ ពោលគឺចាប់ពីឆ្នាំ២០១៥មក ដោយចាប់ផ្តើម នៅក្នុងខេត្តកំពង់ឆ្នាំង,ពោធិ៍សាត់,បាត់ដំបង,ព្រះវិហារ,ស្ទឹងត្រែង និងខេត្តក្រចេះ។ រហូតដល់ឆ្នាំ២០២០ កម្មវិធីនេះ បានអនុវត្តក្នុងខេត្តទាំង២៤ ទូទាំងប្រទេសកម្ពុជា។ រយៈពេល៦ឆ្នាំមកនេះ កម្មវិធីអាស្ប៉ាយ បានប្រើប្រាស់ថវិកាអស់ ៥៩លានដុល្លារ ស្មើនឹងជាង ៨៨ភាគរយ នៃថវិកាសរុប ៦៧លានដុល្លារ។
ដោយឡែគគម្រោងទី២ ជាគម្រោងពិពិធកម្មកសិកម្មកម្ពុជា។ គម្រោងនេះ បានចាប់ផ្ដើមអនុវត្តនៅចុងឆ្នាំ២០១៩ លើខេត្តគោលដៅចំនួន១៣ រួមមាន ខេត្តបាតដំបង, សៀមរាប, ព្រះវិហារ, ស្ទឹងត្រែង, ក្រចេះ, ត្បូងឃ្មុំ, កំពង់ចាម, មណ្ឌលគិរី, រតនគិរី, កំពង់ឆ្នាំង, កំពង់ស្ពឺ, កណ្ដាល និងភ្នំពេញ។ ថវិកាសម្រាប់អនុវត្តគម្រោងនេះ មានចំនួនសរុប ១០១,៦៧លានដុល្លារ ដែលមានការចូលរួមផ្ដល់ឥណទាន ពីធនាគារពិភពលោក ចំនួន ៩១,៦៧លានដុល្លារ និងថវិកាបដិភាគរបស់រាជរដ្ឋាភិបាលចំនួន ១០លានដុល្លារ។ ក្រសួងកសិកម្ម ទទួលបានថវិកាចំនួន ៤៣,៣លានដុល្លារសម្រាប់អនុវត្តគម្រោង។ រហូតដល់ពេលនេះ ក្រសួងបានប្រើប្រាស់ថវិកាអស់ចំនួន ២ ៩៤៩ ៦៦២ដុល្លារ ស្មើនឹង ៦,៤៤ភាគរយនៃថវិកាដែលក្រសួងទទួលបាន។
រីឯ គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប ជំហាន២ ជាកម្មវិធីទី៣ ដើម្បីបង្កើនផលិតផលិតភាពកសិកម្ម។ គម្រោងនេះ ក៏មានបំណងកែលម្អជីវភាពរស់នៅ និងភាពធន់ទ្រាំនឹងបម្រែបម្រួលអាកាសធាតុរបស់កសិករ នៅតំបន់ជុំវិញបឹងទន្លេសាប ដូចជា ខេត្តបាត់ដំបង,បន្ទាយមានជ័យ,សៀមរាប,កំពង់ធំ,កំពង់ចាម,ត្បូងឃ្មុំ និងព្រៃវែង។
គម្រោងទី៣នេះ បានចាប់ផ្ដើមអនុវត្តនៅឆ្នាំ២០១៨ និងគ្រោងបញ្ចប់នៅឆ្នាំ២០២៣ ដែលមានថវិកាសរុបចំនួន ៦៦លានដុល្លារ។ លោក វេង សាខុន បានបញ្ជាក់ថា ដោយសារបញ្ហាកូវីដ-១៩ ទើបធ្វើឲ្យសកម្មភាពនៃការអនុវត្តគម្រោងមានភាពយឺតយ៉ាវ និងមិនអាចដោះស្រាយបញ្ហាជូនកសិករមួយចំនួននៅឡើយ។
ដ្បិតគម្រោងទាំងនេះ សុទ្ធតែរួមចំណែកជួយលើកកម្ពស់សេដ្ឋកិច្ចគ្រួសារកសិករនៅកម្ពុជា តែអំឡុងនៃការរីករាលដាលជំងឺកូវីដ-១៩ សកម្មភាពមួយចំនួនត្រូវផ្អាកបណ្ដោះអាសន្ន។ ម្យ៉ាងវិញទៀត ការបញ្ជាទិញកសិផលបានថយចុះ ធ្វើឲ្យតម្លៃកសិផលធ្លាក់ថ្លៃ។ នេះបើតាមលោករដ្ឋមន្រ្តីកសិកម្ម៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com