ដោយ៖ ជី ចំរ៉ុង
អ្នកស្រី ថេង សុភាព បានដាំប្រទាលក្រពើ រយៈពេល៣ឆ្នាំមកហើយ។ រស់នៅ សង្កាត់សួង ក្រុងសួង ខេត្តត្បូងឃ្មុំ អ្នកស្រី សុភាព បានបញ្ជាក់ថាដំបូងឡើយ អ្នកស្រី ដាំប្រទាលប្រពើចំនួន២-៣គុម្ភ យកធ្វើជាថ្នាំដើម្បីព្យាបាលជំងឺក្រពះពោះវៀនរបស់ខ្លួនប៉ុណ្ណោះ។ ក្រោយធូរស្បើយពីជំងឺប្រចាំកាយនេះ អ្នកស្រីក៏បានពង្រីកការដាំដុះប្រទាលក្រពើរហូតដល់១ពាន់គុម្ពដើម្បី លក់កូន, លក់ប្រទាលក្រពើស្រស់ និងធ្វើភេសជ្ជៈជំនួយសុខភាពលក់ផងដែរ។
ដើម្បីជ្រាបច្បាស់ សូមអញ្ជើញលោកអ្នកនាង ទស្សនាបទសម្ភាសរវាង អ្នកស្រី ថេង សុភាព អ្នកដាំប្រទាលក្រពើនៅខេត្តត្បូងឃ្មុំ ជាមួយលោក ជី ចំរ៉ុង អ្នកសារព័ត៌មាននៃសារព័ត៌មានថ្មីៗ២៥ ដូចតទៅ៖
ឆ្លៀតពេលទំនេរពីការងារគ្រូបង្រៀន អ្នកស្រី បានដាំប្រទាលក្រពើក្នុងផើងជុំវិញផ្ទះ ដើម្បីរកចំណូលបន្ថែម។ ក្នុងមួយខែអ្នកស្រី អាចរកចំណូលពីរបរដាំប្រទាលក្រពើនេះ បាន៨០ម៉ឺន ទៅ១លានរៀល។
ក្នុងបទសម្ភាសជាមួយសារព័ត៌មានថ្មីៗ២៥ ស្រ្តីរូបនេះ បានឱ្យដឹងថា ប្រទាលក្រពើ ជារុក្ខជាតិដែលងាយស្រួលដាំ និងមិនរើសដី។ អ្នកស្រីសុភាព បានចែករំលែកពីវិធីដាំប្រទាលក្រពើដូច្ន៖«បច្ចេកទេសដាំអត់ពិបាកទេ គឺយើងប្រើដីល្បាយខ្សច់ ហើយមានជីអាចម៍គោ និងផេះអង្កាមលាយចូលគ្នាលាយចូលគ្នាទៅ។ ការថែទាំក្នុងការស្រេចទឹកពីរទៅបីថ្ងៃ យើងអាចស្រេចបានម្ដង ព្រោះរុក្ខជាតិបែបនេះ អត់ត្រូវការទឹកខ្លាំងទេ។ បើប្រើទឹកខ្លាំងពេកវាទៅជារលួយ ហើយកាលណាវាមានជំងឺយើងត្រូវដកចេញ បើអត់ដកចេញទេវាអាចឆ្លងទៅដើមផ្សេងៗទៀត»។
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com