ត្រីប្រា ពោ ឆ្ដោ និងត្រីអណ្ដែង របស់សមាគមអ្នកចិញ្ចឹមត្រីប្រមាណ១ម៉ឺនតោនគ្មានអ្នកទិញ
ភ្នំពេញ៖ កសិដ្ឋានចិញ្ចឹមត្រីប្រា ត្រីពោ ត្រីឆ្ដោ និងត្រីអណ្ដែង ចំនួន ២៧៣កន្លែង ដែលជាសមាជិកសមាគមវារីវប្បករកម្ពុជា មានបរិមាណត្រីសរុបចំនួន ១២ ៤៨៥តោន ហើយត្រីប្រមាណ ៩០ភាគរយ នៅកកស្ទះគ្មានអ្នកទិញ។ នេះបើតាមសេចក្ដីប្រកាសរបស់សមាគមវារីវប្បករកម្ពុជា នៅថ្ងៃទី២០ មេសា។
ការឆ្លងរាលដាលជំងឺកូវីដ-១៩ នៅកម្ពុជាបន្តកើនឡើងយ៉ាងគំហុក ធ្វើឲ្យភូមិសាស្រ្តរាជធានីភ្នំពេញ និងក្រុងតាខ្មៅ ត្រូវបិទខ្ទប់ ហើយរាជរដ្ឋាភិបាល ហាមពលរដ្ឋធ្វើដំណើរឆ្លងខេត្តបណ្ដោះអាសន្ន រហូតដល់ថ្ងៃទី២៩ មេសា។ ការណ៍នេះបានធ្វើឲ្យទំនិញមួយចំនួន ពិសេសស្បៀងអាហារ ដូចជា បន្លែ ត្រីសាច់ លើទីផ្សារត្រូវឡើងថ្លៃ ផ្ទុយពីសមាគមអ្នកចិញ្ចឹមត្រីកម្ពុជាដែលសល់ត្រីរាប់តោន គ្មានអ្នកទិញទៅវិញ។
ការបិទខ្ទប់រាជធានីភ្នំពេញ និងក្រុងតាខ្មៅ រួមទាំងបម្រាមហាមមិនឲ្យមានការធ្វើចរាចរណ៍ឆ្លងខេត្ត បានធ្វើឲ្យរាល់សកម្មភាពដឹកជញ្ជូនត្រូវបានផ្អាក លើកលែងការដឹកជញ្ជូនស្បៀងអាហារ បន្លែ ត្រីសាច់ ដែលជាតម្រូវការចំបាច់ប្រចាំថ្ងៃ។ ដ្បិតរាជរដ្ឋាភិបាល បានប្រកាសបែបនេះក្ដី វានៅតែជាបញ្ហាប្រឈម សម្រាប់អ្នកចិញ្ចឹមត្រីក្នុងស្រុកដដែល ព្រោះមិនមានឈ្មួញ ចុះទៅចាប់ត្រីក្នុងស្រះ។
ខណៈដែលសមាគមសល់ត្រីរាប់តោនក្នុងស្រះ អំឡុងផ្ទុះព្រឹត្តិការណ៍សហគម ក៏មានការលើកឡើងថា សមាគមវារីវប្បករកម្ពុជា បានលក់ត្រីខ្ពស់ជាងតម្លៃលើទីផ្សារ។ សមាគមបានសេចក្ដីបដិសេធដូច្នេះ៖«សព្វថ្ងៃ តម្លៃត្រីដែលបងប្អូនវារីវប្បករលក់លើទីផ្សារ មិនទាន់រួចថ្លៃដើមផលិតនៅឡើយទេ ប៉ុន្តែត្រូវបង្ខំចិត្តលក់ ព្រោះមានកាតព្វកិច្ចត្រូវបង់ប្រាក់សងធនាគារ ថ្លៃចំណីត្រី។ បើសង្កេតមើលតម្លៃលក់រាយនៅលើទីផ្សារនានា មានគម្លាតខុសគ្នាឆ្ងាយណាស់»។
សព្វថ្ងៃសមាគមបានលក់ត្រីប្រា ក្នុងតម្លៃ ៤ ០០០រៀល ទៅ ៤ ២០០រៀល ក្នុងមួយគីឡូក្រាម។ ចំពោះត្រីពោ មានតម្លៃ ៥ ៨០០រៀល ទៅ ៦ ០០០រៀល ក្នុងមួយគីឡូក្រាម។ សម្រាប់ត្រីឆ្ដោ តម្លៃ ៩ ២០០រៀល ទៅ ១០ ២០០រៀល ក្នុងមួយគីឡូក្រាម។ រីឯត្រីអណ្ដែង តម្លៃ ៣ ៨០០រៀល ទៅ ៤ ៥០០រៀល ក្នុងមួយគីឡូក្រាម។
សមាគមវារីវប្បករកម្ពុជា នៅតែទទូចដល់ភ្នាក់ងារសមត្ថកិច្ច និងស្ថាប័នពាក់ព័ន្ធ រឹតបន្តឹងការនាំចូលត្រីពីខាងក្រៅ និងស្នើដល់ប្រជាជនខ្មែរ ជួយគាំទ្រផលិតផលក្នុងស្រុក ដើម្បីជួយវារីវប្បករកម្ពុជាឲ្យមានលទ្ធភាពបន្តអាជីវកម្មរបស់ខ្លួន៕
ដោយ៖ ខន ណារី
