Thmey Thmey 25
ប្រព័ន្ធត្រួតពិនិត្យតំបន់ការពារធម្មជាតិ ដំបូងគេបង្អស់នៅកម្ពុជា ត្រូវបានដាក់ឲ្យដំណើរការ
03/02/2021 4:00 pm ព្រះវិហារ ព្រះវិហារ៖ ក្រសួងបរិស្ថាន បានដាក់ឲ្យដំណើរការ ប្រព័ន្ធត្រួតពិនិត្យតំបន់ការពារធម្មជាតិ (Protected Area Monitoring Platform, PAMP)  ដំបូងបង្អស់នៅកម្ពុជា។  ប្រព័ន្ធនេះ នឹងជួយ បង្កើនប្រសិទ្ធភាព នៃការត្រួតពិនិត្យលើការគំរាមកំហែង ក្នុងតំបន់ការពារធម្មជាតិ និងពង្រឹងការអនុវត្តច្បាប់ ឲ្យកាន់តែល្អប្រសើរ។ 

ទីចាត់ការប្រព័ន្ធត្រួតពិនិត្យតំបន់ការពារធម្មជាតិដំបូងគេនៅកម្ពុជា ត្រូវបានបើកសម្ពោធជាផ្លូវការ កាលពីថ្ងៃទី៣០មករាកន្លងទៅ។ ទីចាត់ការនេះ មានទីតាំងនៅមន្ទីរបរិស្ថានខេត្តព្រះវិហារ។ នៅក្នុងឱកាសសម្ពោធ ប្រព័ន្ធត្រួតពិនិត្យតំបន់ការពារធម្មជាតិ (Protected Area Monitoring Platform, PAMP ក៏ត្រូវបានដាក់ឲ្យដំណើរការក្នុងពេលជាមួយគ្នាដែរ។ 

លោក នេត្រ ភក្ត្រា អ្នកនាំពាក្យក្រសួងបរិស្ថាន បានបញ្ជាក់នៅក្នុងពិធីនោះថា ប្រព័ន្ធត្រួតពិនិត្យតំបន់ការពារធម្មជាតិនេះ គឺជាយុន្ធការថ្មីក្នុងការបង្កើនប្រសិទ្ធភាពលើកិច្ចការការពារ និងអភិរក្សធនធានធម្មជាតិ។ សម្រាប់លោក នេត្រ ភក្ត្រា ប្រព័ន្ធនេះ នឹងក្លាយជាជំនួយបន្ថែមសម្រាប់មន្ត្រីឧទ្យានុរក្ស នាសម័យកាលឌីជីថល ក្នុងការចុះអនុវត្តច្បាប់ ក៏ដូចជាទប់ស្កាត់បទល្មើស នៅក្នុងតំបន់ការពារធនធានធម្មជាតិ។  



លោក នេត្រ ភក្ត្រា បានបញ្ជាក់បន្ថែមថា៖«បច្ចុប្បន្ន ក្រុមជនល្មើសធនធានធម្មជាតិ ប្រើប្រាស់បច្ចេកវិទ្យាទំនើប ក្នុងការផ្ដល់ព័ត៌មានទៅវិញទៅមក ដើម្បីកុំឲ្យមន្រ្តីឧទ្យានុរក្ស ឬក្រុមការងារអង្គការដៃគូដែលចុះល្បាតចាប់ខ្លួនបាន។ ដូច្នេះការបង្កើតប្រព័ន្ធនេះឡើង ដើម្បីឆ្លើយតបទៅនឹងបញ្ហាដែលកំពុងជួបប្រឈម នៅក្នុងតំបន់ការពារធនធានធម្មជាតិក្នុងប្រទេស»។
ក្រៅពីបង្កើនប្រសិទ្ធភាពនៃការអនុវត្តច្បាប់ និងចាត់វិធានការទាន់ពេលក្នុងការទប់ស្កាត់បទល្មើសធនធានធម្មជាតិ ប្រព័ន្ធនេះ ក៏នឹងចងក្រងនូវព័ត៌មានផ្សេងៗដែលពាក់ព័ន្ធនឹងតំបន់ការពារ ដែលជាប្រយោជន៍ដល់ការសិក្សាស្រាវជ្រាវ និងការសម្រេចចិត្តនានា ក្នុងកម្រិតរៀបចំគោលនយោបាយ ដើម្បីការពារធនធានធម្មជាតិ។ 

លោក Carlos Lamadrid តំណាងទីភ្នាក់ងារជំនួយអាមេរិក USAID ដែលមានវត្តមាននៅក្នុងកម្មវិធីនេះ បានឲ្យដឹងដែរថា ប្រព័ន្ធ PAMPនេះ នឹងជួយពង្រឹងបន្ថែមទៀត ដល់ការអនុវត្តច្បាប់ ដែលឆ្លើយតបទៅនឹងការគំរាមកំហែង និងជួយដល់ការសម្រេចចិត្ត លើការគ្រប់គ្រងតំបន់ការពារ ឲ្យកាន់តែមានភាពល្អប្រសើរទៀត។ លោកបានបន្ថែមថា៖«ប្រព័ន្ធនេះ ធ្វើឲ្យការគ្រប់គ្រងបណ្ដាញ លើប្រព័ន្ធការពារធម្មជាតិ ឆ្លើយតបរហ័ស ទាន់ពេលវេលា ប្រសិទ្ធភាព និងតម្លាភាព»។



ប្រព័ន្ធ PAMP ត្រូវបានបង្កើតឡើង ដោយផ្អែកលើវិធីសាស្រ្តដែលមានស្រាប់ ដូចជាប្រព័ន្ធត្រួតពិនិត្យទីតាំងភូមិសាស្ត្រ និងឧបករណ៍រាយការណ៍ និងត្រួតពិនិត្យ ដោយចាប់យករូបភាព តាមរយៈផ្កាយរណប។ វាដំណើរការតាមរយៈទូរស័ព្ទ ជាមួយនឹងមុខងារចំនួនបី គឺសៀវភៅទិន្នន័យ ប្រព័ន្ធGPS និងម៉ាស៊ីនថត នៅក្នុងប្រព័ន្ធប្រតិបត្តិការតែមួយ។  នេះបើតាមការបញ្ជាក់ពី លោក Carlos Lamadrid។ 

សូមជម្រាបផងដែរថា ប្រព័ន្ធត្រួតពិនិត្យតំបន់ការពារនេះ ជាបច្ចេកវិទ្យាដំបូងបង្អស់ ដែលបានដាក់ឲ្យដំណើរការក្នុងប្រទេសកម្ពុជា ហើយក៏ជាគំរូការសិក្សា និងធ្វើឲ្យមានភាពកាន់តែប្រសើរឡើង ដើម្បីធ្វើប្រតិបត្តិការ ក្នុងតំបន់ការពារធនធានធម្មជាតិ ទូទាំងប្រទេសកម្ពុជា៕

ដោយ៖ ស៊ុល រ៉វី © រក្សាសិទ្ធិដោយ thmeythmey25.com