ដែនអភិរក្សក្រពើភ្នំវាលវែង ទីទេសចរណ៍បែបផ្សងព្រេងយ៉ាងទាក់ទាញ
ពោធិ៍សាត់៖ ដែនជម្រកសត្វក្រពើភ្នំ ជាទីតាំងទេសចរណ៍ផ្សងព្រេងប្លែកមួយ ដែលទេសចរអាចធ្វើដំណើរកាត់ព្រៃ និងវាលស្មៅខៀវស្រងាត់ ទៅមើលសត្វក្រពើភ្នំរស់នៅបែបធម្មជាតិ។ ទេសចរក៏អាចយល់ដឹងពីការរស់នៅរបស់ជនជាតិដើមភាគតិចជង ៣គ្រួសាររស់នៅ និងធ្វើស្រែបែបធម្មជាតិនៅទីនោះផងដែរ។
ដើម្បីជ្រាបកាន់តែច្បាស់សូមលោក អ្នកនាងទស្សនាបទសម្ភាសរវាងកញ្ញា ជឿន ស្រីណយ អ្នកសារព័ត៌មានThmeyThmey25 និងលោក យិន មុស មគ្គទេសក៍ទេសចរ នៅដែនអភិរក្សសត្វក្រពើភ្នំដូចតទៅ៖
ដែនជម្រកក្រពើបឹងវាលវែង មានទីតាំងស្ថិតនៅភូមិគៀបជង្រុក ឃុំអូរសោម ស្រុកវាលវែង ខេត្តពោធិ៍សាត់ បានទាក់ទាញចិត្តភ្ញៀវទេសចរដែលចូលចិត្តផ្សងព្រេងឲ្យទៅកម្សាន្តនៅទីនោះ។ ដែនជម្រកក្រពើភ្នំនេះ បានអភិរក្សសត្វក្រពើឲ្យរស់នៅបែបធម្មជាតិ អ្វីដែលពិសេសសត្វក្រពើភ្នំទាំងនេះមិនស៊ីសាច់ជាអាហារនោះទេ។
បើតាមលោក យិន មុស មគ្គទេសក៍ទេសចរ នៅដែនជម្រកសត្វក្រពើបឹងវាលវែង តាមរយៈការពិនិត្យលាមកសត្វក្រពើ ឃើញថាក្រពើទាំងនេះមិនមានស៊ីសាច់សត្វឆ្កែ គោ ក្របីនោះទេ គឺមានតែស្រកាត្រីតែប៉ុណ្ណោះ។ លោក យិន មុស លើកឡើងដូច្នេះថា៖ « ភ្ញៀវទេសចរគឺគាត់អត់ខ្លាចទេ បើទេសចរអន្តរជាតិវិញគាត់ហានជាងយើងទៅទៀត ។ ភ្ញៀវទេសចរបរទេសខ្លះ មកបោះតង់ពេលយប់ចាំមើលក្រពើតែម្ដង។ ភ្ញៀវទេសចរជាតិមានមកដល់ទីនេះខ្លះៗដែរ »។
នៅជិតដែនអភិរក្សក្រពើបឹងវាលវែង ក៏មានជនជាតិដើមភាគតិចជងចំនួន ៣គ្រួសារបានបន្តរស់នៅទីនោះ ទោះប្រជាជនជាច្រើនទៀតប្ដូរទៅរស់នៅទីប្រជុំជនហើយក្ដី។ បើតាមលោក យិន មុស ប្រជាជន ៣គ្រួសារនេះជាទូទៅ ធ្វើស្រែបែបបុរាណ ដោយមិនមានការប្រើប្រាស់គ្រឿងចក្រនោះទេ។ ការធ្វើស្រែ និងចិញ្ចឹមសត្វបែបបុរាណ អាចឲ្យពួកគាត់រស់នៅបានងាយស្រួល តាមជីវិតបែបធម្មជាតិរបស់គាត់។
ដ្បិតមានទីតាំងឆ្ងាយពីទីប្រជុំជន និងមិនសូវមានមនុស្សរស់នៅ តែដែនជម្រកក្រពើភ្នំបឹងវាលវែង បានក្លាយជាទិសដៅទេសចរណ៍មួយយ៉ាងទាក់ទាញក្នុងឃុំអូរសោម ដោយទេសចរកម្ររំលងដែនជម្រកមួយនេះណាស់ ជាពិសេសទេសចរបរទេសតែម្ដង។ បើតាមលោក នួន លីម មគ្គទេសក៍ទេសចរមួយរូបទៀតបានលើកឡើងថា ក្នុងមួយឆ្នាំៗ មានទេសចរយ៉ាងតិច ១២០០ ទៅ១៥០០នាក់ ទៅទស្សនាក្រពើភ្នំនៅដែនជម្រកសត្វក្រពើបឹងវាលវែងនេះ។
លោក នួន លីម បានបន្ថែមដូច្នេះថា៖ « នៅដែនជម្រកសត្វក្រពើភ្នំបឹងវាលវែង បច្ចុប្បន្នមានក្រពើភ្នំចន្លោះពី ៤០ ទៅ៦០ក្បាល។ ដែនជម្រកក្រពើភ្នំនេះ គឺមានទំហំធំជាងគេ មានតែក្នុងខេត្តពោធិ៍សាត់នេះតែប៉ុណ្ណោះ »។
មគ្គទេសក៍ទេសចរទាំងពីររូបនេះ ក៏បានសំណូមពរដល់ភ្ញៀវទេសចរជាតិ និងអន្តរជាតិឲ្យទៅកម្សាន្តនៅដែនអភិរក្សមួយនេះ ដើម្បីជាផ្នែកមួយជួយអភិរក្សសត្វក្រពើភ្នំ ក្នុងដែនអភិរក្សសត្វក្រពើបឹងវាលវែង និងអាចជាការសិក្សាពីជីវភាពរស់នៅរបស់បងប្អូនជនជាតិដើមភាគតិចជងផងដែរ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com