បន្លែលើទឹក ងាយថែ ទិន្នផលខ្ពស់ តែកសិករត្រូវមានបច្ចេកទេសច្បាស់ និងដើមទុនច្រើន
ភ្នំពេញ៖ ការដាំដុះបន្លែលើទឹក (Hydroponic) ជាការដាំដុះមួយបែបដែលចាប់ផ្តើមនិយមនៅកម្ពុជា។ កសិករដែលកំពុង ដាំបន្លែលើទឹក សុទ្ធតែអះអាងថា បន្លែលើទឹកងាយស្រួលដាំ និងថែទាំ ពិសេសទទួលបានទិន្នផលច្រើន និងតម្លៃខ្ពស់ជាងបន្លែដាំលើដីទៀតផង។ យ៉ាងណាក៏ដោយដើម្បីដាំបន្លែលើទឹក ទទួលបានទិន្នផលខ្ពស់ គឺមានបច្ចេកទេសផ្សេងៗ និងដើមទុនខ្ពស់។
អ្នកស្រី អុន ផល្លី បានចាប់ផ្តើមដាំបន្លែលើទឹក ឬហៃត្រូផូនិក(Hydroponic) ជិត១ឆ្នាំមកហើយ នៅក្នុងរោងបន្លែទំហំ១២ម៉ែត្រ គុណនឹង ១៩ម៉ែត្រ។ កសិដ្ឋានបន្លែលើទឹករបស់ស្ត្រីវ័យ៣៣ឆ្នាំរូបនេះ មានដាំបន្លែចម្រុះ ដូចជាសាលាដធម្មតា និងសាលាដពណ៌ស្វាយ ស្ពៃតឿ ខាត់ណាស្លឹក និងស្ពៃក្រញាញ់ ជាដើម។កសិករដែលរស់នៅក្នុងឃុំតាំងក្រសាំង ស្រុកសន្ទុក ខេត្តកំពង់ធំរូបនេះ បានប្រាប់សារព័ត៌មាន Thmeythmey25 ថាការដាំបន្លែលើទឹក ងាយស្រួលថែទាំ និងត្រូវការកម្លាំងពលកម្មតិច ខុសពីបន្លែដាំលើដីដែលត្រូវការកម្លាំងពលកម្មច្រើន រាប់តាំងពីរៀបចំដីដាំដុះ និងស្រោចស្រពរាល់ថ្ងៃ ពិសេសបញ្ហាសត្វល្អិតតែម្តង។
កសិកររូបនេះ បន្ថែមទៀតថា បន្លែលើទឹកនេះ ក៏ផ្ដល់ទិន្នផលខ្ពស់ និងមានតម្លៃថ្លៃជាង បន្លែដាំលើដីផងដែរ។ អ្នកស្រី អុន ផល្លី បញ្ជាក់ប្រាប់សារព័ត៌មានThmeyThmey25 បន្ថែម៖ «តម្លៃលក់លើទីផ្សារ លក់បានតម្លៃថ្លៃគួរសម ដោយសាលាដធម្មតាលក់បានតម្លៃប្រមាណពី ៥,០០០ ទៅ ៨,០០០រៀល។ ចំណែកសាលាដពណ៌ស្វាយ អាចលក់បានតម្លៃរហូតដល់ ១២,០០០រៀល និងប្រភេទស្ពៃ ផ្សេងទៀត លក់បានតម្លៃប្រមាណជា ៦,០០០រៀលដែរ»។
ការដាំបន្លែលើទឹក ទទួលបានទិន្នផលខ្ពស់ និងលក់បានតម្លៃថ្លៃលើទីផ្សារពិតមែន តែក៏ប្រឈមនឹងបញ្ហាការលក់ផងដែរ។ នេះជាការបញ្ជាក់របស់ អ្នកស្រី ផល្លី។ អ្នកស្រីបន្តថា៖«ពេលខ្ញុំចាប់ផ្ដើមប្រមូលផល ២ ឬ ៣ខែដំបូង មិនទាន់មានគេស្គាល់ ហើយក៏គេអត់ទាន់ទុកចិត្តលើបន្លែនេះដែរ។ ដល់ពេលក្រោយៗមកទៀត បន្ទាប់ពីបានហូបរួចមក ពួកគាត់និយាយថា បន្លែលើទឹកនេះមានរសជាតិឆ្ងាញ់ សុវត្ថិភាព គ្មានជាតិគីមី ហើយងាយស្រួលលាងសម្អាតទៀត»។
លោក ម៉េង ភ័ស្ត ជាអ្នកដាំបន្លែលើទឹកមួយរូបទៀតនៅក្នុងខេត្តព្រៃវែង ក៏យល់ស្របនឹងការលើកឡើងរបស់អ្នកស្រី ផល្លី ដែរថា ការដាំបន្លែលើទឹកងាយស្រួល បានផលច្រើន និងតម្លៃខ្ពស់ជាងបន្លែលើដី។ ម្ចាស់កសិដ្ឋានបន្លែលើទឹករូបនេះបន្ថែមទៀត បន្លែលើទឹក ក៏ធន់នឹងអាកាសធាតុក្តៅផងដែរ ដោយសារវាត្រូវបានដាំដុះនៅក្នុងរោងមានដំបូល ការពារពីអាកាសធាតុក្ដៅខ្លាំងបាន ហើយក៏គេចផុតពីការបំផ្លាញពីសត្វល្អិតដែរ។
ទោះយ៉ាងណាក៏ដោយ មិនមែនកសិករចង់ដាំដុះ ក៏អាចចាប់ផ្តើមភ្លាមនោះទេ។ បើតាមលោក ភ័ស្ត ការដាំបន្លែលើទឹក គឺទាមទារឲ្យកសិករចេះនូវបច្ចេកទេសដាំដុះ និងជាពិសេសពាក់ព័ន្ធនឹងតម្រូវការទុនច្រើន ក្នុងការដំឡើងប្រព័ន្ធទឹក និងសង់រោងជាដើម។ លោក ភ័ស្ភ បន្ថែមថា៖«ការដាំបន្លែលើទឹក វាងាយស្រួល តែត្រូវការដើមទុនចាប់ផ្ដើមអស់ច្រើនគួរសម ដើម្បីសង់រោង និងដំឡើងប្រព័ន្ធដាំដុះនេះ»។
ទាក់ទងនឹងការចំណាយទុននេះ អ្នកស្រី ផល្លី បានប្រាប់សារព័ត៌មានThmeyThmey25ថា ខ្លួនចាយលើការសាងសង់រោង និងសម្ភារផ្សេងៗ អស់ជាង ១ម៉ឺនដុល្លារ នៅលើទីធ្លាដែលខ្លួនកំពុងដាំដុះបន្លែបច្ចុប្បន្ន ពោលគឺបណ្ដោយ ១៩ម៉ែត្រ និងទទឹង១២ម៉ែត្រ។ ទោះបីជាការដាំដំណាំហៃត្រូផូនិក មានគុណភាពល្អ និងថ្លៃជាងបន្លែដាំលើដី តែកសិករដែលដាំដុះរបៀបនេះ នៅមានចំនួនតិចតួចនៅឡើយ។ ជាក់ស្តែង នៅក្នងខេត្តកំពង់ធំ កសិករមួយចំនួន ដែលកំពុងដាំបន្លែលើទឹក គឺទទួលបានជំនួយសម្ភារពីអង្គការដៃគូ ដើម្បីសង់រោង និងរៀបចំបច្ចេកមួយចំនួន ដោយសារតែខ្វះខាតទុន។ លោក ប៉ែន វណ្ណរិទ្ធ ប្រធានមន្ទីរកសិកម្មខេត្តកំពង់ធំ ប្រាប់សារព័ត៌មាន ThmeyThmey25 តាមទូរសព្ទដូច្នេះ។ ប្រធានមន្ទីរកសិកម្មខេត្តកំពង់ធំ បន្តថា៖«ការសាងសង់តម្រូវការថវិកាច្រើន ដូចនេះទើបគ្រួសារមួយចំនួនស្ថិតក្រោមជំនួយសម្ភារពីអង្គការដៃគូ និងជំនួយបច្ចេកទេសពីមន្ទីរកសិកម្មខេត្តផ្ទាល់»។
ទោះជាយ៉ាងណាក៏ដោយ ប្រធានមន្ទីរកសិកម្មខេត្តកំពង់ធំ បានលើកទឹកចិត្តដល់កសិករ ក្នុងការដាំដុះបន្លែហៃត្រូផូនិក ដោយមើលឃើញថា ការដាំប្រភេទនេះ ធន់នឹងបម្រែបម្រួលអាកាសធាតុ កាត់បន្ថយពីបញ្ហាប៉ះពាល់ពីសត្វល្អិតបំផ្លាញ ហើយក៏ផ្ដល់បន្លែសុវត្ថិភាព គ្មានជាតិគីមី ព្រមទាំងលើកទឹកចិត្តប្រជាជនដាំដុះបន្លែខ្លួនឯង ដើម្បីលើកកម្ពស់ដល់ការប្រើប្រាស់បន្លែក្នុងស្រុក៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com