អភិបាលក្រុងភ្នំពេញ សម្រេចរក្សាទុកដើមឈើអាយុកាលជាង៣០០ឆ្នាំវិញ
ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានសម្រេចរក្សាទុកដើមឈើ ដែលមានអាយុកាលជាង៣០០វិញ ដោយមិនឱ្យកាប់ចោលឡើយ។ លោក ឃួង ស្រេង សម្រេចបែបនេះ ក្រោយពីចុះត្រួតពិនិត្យដើមឈើចំនួន៣ដើម ដែលចាស់ទ្រុឌទ្រោមនេះ ស្ថិតនៅក្នុងសួនច្បារកាណាឌីយ៉ា សង្កាត់វត្តភ្នំ ក្នុងខណ្ឌដូនពេញ។
មូលហេតុដែលអភិបាលក្រុង សម្រេចរក្សាដើមឈើចាស់ទ្រុឌទ្រោមទាំង៣ដើមនេះ ដោយសារវាមានអាយុកាលច្រើនឆ្នាំ ហើយក៏ផ្ដល់ប្រយោជន៍ជាម្លប់ដល់ពលរដ្ឋធ្វើដំណើរតាមដងវិថីកន្លងមក។ ដើមឈើទាំង៣នេះ មានឈ្មោះថា «ដើមគីនីន» ដែលពលរដ្ឋនិយមហៅថា «ដើមគ្រាប់បែក» ដែលកំពុងមានសភាពពុកផុយ និងប្រហោងក្នុង។
រដ្ឋបាលរាជធានីភ្នំពេញ បានស្រង់សម្តីលោក ឃួង ស្រេង ក្រោយចុះពិនិត្យដើមឈើតាមបណ្ដោយវិថីព្រះអង្គឌួង និងវិថីក្រមួនស នៅព្រឹកថ្ងៃទី១២ មករា នេះ ដូច្នេះថា៖« បន្តថែទាំនិងរក្សាទុកដើមឈើចំនួន៣ដើមដែលចាស់ទ្រុឌទ្រោម ដោយលះមែកចេញមួយចំនួន និងធ្វើជើងទម្រទប់ដើម ដើម្បីការពារគ្រោះថ្នាក់កើតឡើងជាយថាហេតុ»។
គួរបញ្ជាក់ថា នៅក្នុងសួនច្បារកាណាឌីយ៉ា ដែលស្ថិតនៅតាមបណ្តោយផ្លូវក្រមួនស សង្កាត់វត្តភ្នំ ខណ្ឌដូនពេញ មានដើមឈើចំនួន៥០ដើម ដោយមានអាយុកាលជាង៣០០ឆ្នាំ។ នេះបើតាមសំដីរបស់លោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូន ដែលដកស្រង់ពីទីភ្នាក់ងារសារព័ត៌មានកម្ពុជា៕
