ជឿនលឿន! ពលរដ្ឋស្រុកកំពង់ស្វាយប្រើ «គោយន្តដាល់អំបុក» អាចចំណេញកម្លាំងពលកម្មបានរហូត៧០ភាគរយ
កំពង់ធំ៖ ពលរដ្ឋប្រមាណ១០គ្រួសារ រស់នៅតាមបណ្តោយផ្លូវជាតិលេខ៦ ដែលស្ថិតនៅក្នុងភូមិក្រសាំងខ ឃុំសានគរ ស្រុកកំពង់ស្វាយ ខេត្តកំពង់ធំ បានប្រកបមុខរបរដាល់អំបុកលក់ ដោយប្រើកម្លាំងម៉ាស៊ីនគោយន្ត អស់រយៈពេលជាង៣ឆ្នាំមកហើយ។ បើតាមពលរដ្ឋទាំងនោះ ការប្រើគោយន្តសម្រាប់ដាល់អំបុលនេះ គឺអាចជួយកាត់បន្ថយកម្លាំងមនុស្សបានរហូត៧០ភាគរយ បើធៀបនឹងដាល់អំបុកបែបបុរាណ ប្រើកម្លាំងមនុស្សយ៉ាងហោចណាស់៥នាក់។
គោយន្តដែលពលរដ្ឋរស់នៅក្នុងស្រុកកំពង់ស្វាយ រៀបចំឡើងសម្រាប់បម្រើដល់ការដាល់អំបុកលក់ប្រចាំឆ្នាំកន្លងមកនេះ គឺអាចជំនួសនូវសកម្មភាពនានារបស់មនុស្សនៃការផលិតអំបុកបានច្រើន។ ដោយកម្លាំងស្នូលនៃការប្រើប្រាស់ម៉ាស៊ីនគោយន្តនេះ អាចទាញអង្រែដែលទំហំធំសម្រាប់បុកអំបុកឱ្យមានរូបរាងសំប៉ែតល្អ អាចជួយលីងស្រូវនៅក្នុងខ្ទះសម្រាប់ធ្វើអំបុក និងអាចជួយរែងកំទេចធូលីនានា នៅក្នុងស្រូវបានយ៉ាងល្អប្រសើរផងដែរ។
សូមអញ្ជើញទស្សនាបទសម្ភាសរវាងកញ្ញា អ៊ូ សុខមាន អ្នកសារព័ត៌មាន Thmey Thmey25 ជាមួយពលរដ្ឋប្រកបលក់អំបុកដូចតទៅ៖
អ្នកស្រី រី សារឿន ដែលជាអ្នកធ្វើអំបុកលក់ដោយប្រើម៉ាស៊ីនគោយន្ត អស់រយៈពេលជាង២ឆ្នាំមកនេះ បាននិយាយប្រាប់សារព័ត៌មានថ្មីៗថា៖«ប្រើម៉ាស៊ីន[គោយន្ត] គឺវាធូរកម្លាំងយើង។ [បើ] យើង បុកអំបុក ដោយជាន់នឹងជើង[បែបបុរាណ]នោះ យើងប្រើអ្នកជាន់[អង្រែ]អស់៣នាក់ អ្នកលីង១នាក់ អ្នកបុកអំបុក១នាក់ទៀត គឺអស់៥នាក់»។ អ្នកស្រីបានបន្ថែមដូច្នេះ៖«ដល់ពេលយើងប្រើម៉ាស៊ីនទៅយើងចំណេញ។ មនុស្សយើងប្រើតែម្នាក់ ក៏អាចធ្វើអំបុកកើតដែរ»។
សព្វថ្ងៃនេះ ការដាល់អំបុលលក់ដោយប្រើកម្លាំងម៉ាស៊ីនគោយន្ត អាចជំនួសឱ្យការប្រើកម្លាំងមនុស្សបានរហូត៧០ភាគរយ។ នេះជាការលើកឡើងរបស់ពលរដ្ឋដែលអ្នកដាល់អំបុកមួយរូបទៀត រស់នៅក្នុងភូមិក្រសាំងខ ឃុំសានគរ ស្រុកកំពង់ស្វាយ ខេត្តកំពង់ធំ។ អ្នកស្រី នី សំណាង បានរៀបរាប់ថា៖«យើងមានការកែច្នៃអ៊ីចឹងទៅ បានកាត់បន្ថយ កម្លាំងពលកម្មយើងបានច្រើន។ ដូចជា លីង រែងយកកន្ទក់ចេញ និងការបុកអំបុកហ្នឹង គឺយើងប្រើដោយកម្លាំងម៉ាស៊ីន។ [ហើយ] យើងសម្អាតតាមក្រោយប្រហែល៣០ភាគរយ »។
ក្នុងមួយថ្ងៃៗ ពលរដ្ឋវ័យ៣៣ឆ្នាំរូបនេះ អាចដាល់ដំបុកបាន២០០កំប៉ុង ដោយ១កំប៉ុងលក់បានតម្លៃ១,៥០០រៀល។
បន្ទាប់ពីបានកែច្នៃម៉ាស៊ីនគោយន្តមកបម្រើក្នុងសង្វាត់ផលិតកម្មនៃការធ្វើអំបុកនេះមក អ្នកស្រី ខួច ស្រីពៅ បានធ្វើអំបុកតែម្នាក់ឯង ឬជាមួយស្វាម៉ី សម្រាប់ដាក់លក់នៅមុខផ្ទះរបស់ខ្លួនបានជាប្រចាំថ្ងៃយ៉ាងរលូន អស់រយៈពេលជិត៣ឆ្នាំមកហើយ។ ក្នុងមួយថ្ងៃៗ ស្ត្រីវ័យ៣២ឆ្នាំរូបនេះ ដាល់អំបុកលក់ដោយប្រើម៉ាស៊ីនគោយន្ត បាន២ទៅ៣ធុងស្ពេតត្រូ ដោយអំបុកមួយគីឡូក្រាមលក់បានតម្លៃ១៥,០០០រៀល។
ថ្វីដ្បិត ការចៃ្នយកកម្លាំងម៉ាស៊ីនគោយន្តនេះ មកដាល់អំបុកអាចជួយកាត់បន្ថយកម្លាំងពលកម្ម ឬ សម្រាល បន្ទុកការងារដល់អ្នកស្រីទាំងបីរូបខាងលើបានច្រើន រហូតដល់៧០ភាគរយក៏ពិតមែន ប៉ុន្តែ ការចំណាយថវិកាលើការទិញម៉ាស៊ីនគោយន្ត និងការរៀបចំឧបករណ៍ សម្រាប់ដាល់អំបុកនេះ ក៏ច្រើនផងដែរ។ ពោល គ្រួសារនីមួយៗ ចំណាយលើការកែច្នៃនេះ មិនក្រោម៥០០ដុល្លារឡើយ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com