អភិបាលស្រុកបន្ទាយស្រីលើកទឹកចិត្ត ឱ្យពលរដ្ឋចិញ្ចឹមសត្វដើម្បីពង្រឹងសេដ្ឋកិច្ចគ្រួសារ
សៀមរាប៖ ការចិញ្ចឹមសត្វ ជាវិស័យមួយដែលរដ្ឋបាលស្រុកបន្ទាយស្រីសម្លឹងឃើញថា មានសក្កានុពលសម្រាប់ស្រុកដែលមានភូមិសាស្ដ្រនៅតំបន់ភ្នំ ដែលមិនសូវមានទឹកសម្រាប់ស្រោចស្រពដំណាំផ្សេងៗ។ បច្ចុប្បន្ន អភិបាលស្រុកបន្ទាយស្រីកំពុងធ្វើការជាមួយអង្គការនានាក្នុងការជំរុញឱ្យប្រជាពលរដ្ឋក្នុងស្រុកមួយនេះ ងាកទៅចិញ្ចឹមសត្វ ដើម្បីពង្រឹងសេដ្ឋកិច្ចក្នុងគ្រួសារ។ អភិបាលស្រុកមើលឃើញថា ការចិញ្ចឹមសត្វមានភាពអំណោយផលច្រើន ជាជាងការធ្វើស្រែចម្ការ ដែលទាមទារបច្ចេកទេស និងមានតម្រូវការទឹកច្រើន។
ស្រុកបន្ទាយស្រី ស្ថិតនៅប៉ែកខាងជើងនៃខេត្តសៀមរាប។ ស្រុកនេះមានភូមិសាស្ដ្រមួយផ្នែកជាតំបន់ទំនាប និងមួយផ្នែកជាតំបន់ខ្ពង់រាប និងតំបន់ភ្នំ ដែលអំណោយផលទាំងការធ្វើស្រែ និងការធ្វើចម្ការ ដូចជាដាំដំឡូង ស្វាយ និងកៅស៊ូជាដើម។ បម្រែបម្រួលអាកាសធាតុលើសកលលោក បានជះឥទ្ធិពលដល់ការធ្វើស្រែចម្ការ ពិសេសលើដំណាំដែលត្រូវការទឹកច្រើន ដូចជាស្រូវជាដើម។
ដោយមើលឃើញពីបញ្ហានេះ អភិបាលស្រុកបន្ទាយស្រី កំពុងជំរុញដល់កសិករ ងាកទៅចិញ្ចឹមសត្វ ដែលលោកយល់ថា អាចផ្តល់កម្ចៃច្រើន និងមានភាពសមស្របសម្រាប់អ្នកស្រុកតំបន់ខ្ពង់រាប។ លោក ឃឹម ហ្វីណង់ យល់ថា ការចិញ្ចឹមសត្វគោ សត្វពពែ និងសត្វជ្រូកជាដើម អាចឱ្យកសិករចំណេញច្រើន ពិសេសទាក់ទាញដល់វិស័យទេសចរណ៍ផងដែរ។
លោកបន្តថា៖« កន្លងមកស្រុកតែងពិចារណារុញឱ្យមានការចិញ្ចឹមសត្វដោយសារគិតថា បន្ទាយស្រីជាតំបន់ខ្ពង់រាប តំបន់ភ្នំ ដូច្នេះជាប្រពៃណីនៃអ្នកតំបន់ភ្នំ ប្រសិនជាយើងធ្វើស្រែឬចិញ្ចឹមត្រីអត់ទឹកគ្រប់គ្រាន់ទេ តែអនុផលសម្រាប់ចិញ្ចឹមសត្វ ចម្ការ ប្រសិនជាយើងងាកមកសកម្មភាពចម្ការឬចិញ្ចឹមសត្វ មកឱ្យចំណេញកសិទេសចរណ៍វិញ ខ្ញុំគិតថាអ្នកបន្ទាយស្រីគួរពិចារណាធ្វើ...ខ្ញុំចង់ឱ្យទេសចរដើរលេងគាត់មានជម្រើសអាចមកញុំាពពែអាំង ជ្រូកកណ្ដុរដុតបន្ទាយស្រី...»។
លោក ឃឹម ហ្វីណង់ មានទស្សនវិស័យជំរុញដល់ពលរដ្ឋលើចិញ្ចឹមសត្វ គឺនៅពេលដែលលោកចុះទៅដល់កសិដ្ឋានចិញ្ចឹមសត្វមួយកន្លែង ដែលជាអង្គការផ្តល់សត្វគោដល់ពលរដ្ឋក្រីក្រយកទៅចិញ្ចឹមយកកូន។ នៅអង្គការគោសប្បុរសកម្ពុជា ដែលស្ថិតនៅភូមិអូរម្នាស់ ឃុំខ្នារសណ្ដាយ ស្រុកបន្ទាយស្រី លោក ហ្វីណង់ ពិតជារីករាយ និងកោតសរសើរចំពោះអង្គការមួយនេះដែលមានគំនិតផ្តល់មេគោដល់ពលរដ្ឋក្នុងតំបន់ក្រីក្រ យកទៅចិញ្ចឹមដើម្បីយកកូន។ លោកអភិបាលស្រុកយល់ថា ការធ្វើដូច្នេះជាផ្នែកមួយនៃការកាត់បន្ថយភាពក្រីក្រ ដែលជាច្រកមួយដ៏សំខាន់ដើម្បីពង្រឹងសេដ្ឋកិច្ចគ្រួសាររបស់ប្រជាពលរដ្ឋទាំងនោះ។
នាយកប្រតិបត្តិអង្គការគោសប្បុរសកម្ពុជា លោក ចាន់ វិចិត្រ បានឱ្យដឹងថា អង្គការរបស់លោកចាប់ផ្តើមមានគម្រោងចែកមេគោដល់ពលរដ្ឋក្រីក្រនៅក្នុងខេត្តសៀមរាបនេះចាប់ពីឆ្នាំ២០១៣មក ហើយមកដល់បច្ចុប្បន្នមានគោសរុបចំនួន ១៣០ក្បាល បូករួមនិងសត្វពពែចំនួន ១១០ក្បាលផង ក្នុងបំណងចូលរួមកាត់បន្ថយភាពក្រីក្រក្នុងប្រទេសកម្ពុជា។ លោកបន្ថែមថា៖« យើងជួយតាមរយៈផ្តល់កម្ចីសត្វគោ ឱ្យមេគោចិញ្ចឹមយកកូន ពពែក៏ដូចគ្នា យើងពិនិត្យភូមិសាស្ដ្រដែលពលរដ្ឋស្នើសុំ តើសមស្របចំពោះការចិញ្ចឹមសត្វដែរឬទេ បើសមស្របយើងនឹងផ្តល់ជូន»។
បច្ចុប្បន្នអង្គការគោសប្បុរសកម្ពុជាមានផ្ទៃដីសម្រាប់ចិញ្ចឹមគោ និងពពែចំនួន ២០ហិកតា ដែលធ្វើការលើសហគមន៍មួយចំនួនក្នុងខេត្តសៀមរាប ដូចជានៅបន្ទាយស្រី និងស្រុកប្រាសាទបាគងជាដើម។ គោលដៅរបស់អង្គការនេះ គឺចង់ពង្រីកការចិញ្ចឹមគោដល់១ពាន់ក្បាល ដើម្បីផ្តល់ជូនដល់ប្រជាពលរដ្ឋក្រីក្រ។ លោក វិចិត្រ បន្ថែមថា៖« មុននឹងផ្តល់មេគោដល់ប្រជាពលរដ្ឋ យើងយកមេគោទៅបំផើមសិន ហើយពលរដ្ឋចិញ្ចឹម៤ទៅ៥ខែ រហូតដល់ផ្ដាច់ដោះ យើងយកមេគោទៅបំផើមទៀត...យើងផ្តល់ជូនគ្រួសារដែលមិនមានមុខរបរត្រឹមត្រូវ»។
ដ្បិតថា អាជ្ញាធរកំពុងជំរុញប្រជាពលរដ្ឋឱ្យផ្តោតលើការចិញ្ចឹមសត្វយ៉ាងណាក្ដី តែនៅបច្ចុប្បន្ននេះ ទ្រង់ទ្រាយការចិញ្ចឹមសត្វក្នុងស្រុកបន្ទាយស្រី នៅជាលក្ខណៈគ្រួសារ និងខ្នាតតូចនៅឡើយ រីឯជាលក្ខណៈកសិដ្ឋានមាន២ទៅ៣កន្លែងប៉ុណ្ណោះ។ អភិបាលស្រុកបន្ទាយស្រីលើកឡើងថា លោកនឹងបន្តជំរុញនិងផ្សព្វផ្សាយឱ្យពលរដ្ឋយល់ថា ការចិញ្ចឹមសត្វអាចឱ្យកសិករចំណេញច្រើន ដោយអាចលក់ជាកូន និងបម្រើវិស័យទេសចរណ៍ក្នុងស្រុកបានមួយផ្នែកធំទៀត ដែលកសិករគួរសាកល្បង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com