កូនត្រី និងត្រីជិតផុតពូជជាង១ម៉ឺនក្បាល ត្រូវបានលែងក្នុងទន្លេចតុម្មុខ
ភ្នំពេញ៖ កូនត្រី និងត្រីជិតផុតពូជចំនួនជាង១ម៉ឺនក្បាល ត្រូវបានប្រលែងចូលក្នុងទន្លេចតុម្មុខ មុខព្រះបរមរាជវាំង ដោយរដ្ឋបាលជលផល និងអង្គការ USAID ដើម្បីអបអរសាទទិវានៃការផ្លាស់ទីមច្ឆាជាតិពិភពលោក។ កូនត្រី និងត្រីពូជទាំងអស់នោះរួមមាន ត្រីគល់រាំង ត្រីប្រា និងត្រីព្រួលជាដើម។
លោក អេង ជាសាន ប្រធាននាយកដ្ឋានរដ្ឋបាលជលផល បានឱ្យដឹងថា ការប្រលែងត្រីនេះ គឺដើម្បីឱ្យត្រី និងត្រីដែលជិតផុតពូជ អាចបន្តពូជនៅឆ្នាំក្រោយៗ ពិសេសគឺចង់ឱ្យពលរដ្ឋមានការចូលរួមការពារអភិរក្ស ធនធានជលផលឱ្យកាន់តែប្រសើរ។
បើតាមប្រធាននាយដ្ឋានរដ្ឋបាលជលផល អេង ជាសានបច្ចុប្បន្នបរិមាណត្រីធម្មជាតិ មានការថយចុះ និងបានផ្លាស់ប្ដូរសមាសភាព ពោលគឺប្រភេទត្រីធំមានតិចជាងមុន និងប្រភេទត្រីតូចមានការកើនឡើង។ « នេះក៏ជាសញ្ញាបង្ហាញថា ការចាប់ត្រីច្រើនលើសលប់»។
នាពិធីនោះ លោក អេង ជាសាន ប្រធាននាយកដ្ឋានបាលជលផល ក៏បានអំពាវនាវឱ្យពលរដ្ឋ និងប្រជានេសាទ ត្រូវចូលរួមថែរក្សា និងការពារធនធានជលផល ដោយមិននេសាទខុសច្បាប់ និងគោរពតាមការណែនាំរបស់រដ្ឋបាលជលផល៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com