ទឹកជំនន់៖ បន្ទាយមានជ័យ មានអ្នកស្លាប់ច្រើនជាងគេ ឯបាត់ដំបងមានដំណាំជន់លិចច្រើនជាងគេ
រាជធានី-ខេត្តចំនួន១៩ បានទទួលរងគ្រោះដោយសារទឹកជំនន់។ តាមគណៈកម្មាធិការជាតិគ្រប់គ្រងគ្រោះមហន្តរាយ ខេត្តបន្ទាយមានជ័យរងគ្រោះធ្ងន់ធ្ងរជាងគេ ហើយក៏មានជនរងគ្រោះបាត់បង់ជីវិតច្រើនជាងគេដែរ គឺ២២នាក់ ក្នុងចំណោមមនុស្ស៣៩នាក់ដែលបានស្លាប់ក្នុងគ្រោះធម្មជាតិនេះ។ ខេត្តបាត់ដំបង ក៏រងគ្រោះធ្ងន់ដែរបន្ទាប់ពីបន្ទាយមានជ័យ ប៉ុន្តែខេត្តនេះបើតាមរបាយការណ៍ គឺគ្មានអ្នកស្លាប់ទេ។ ទោះជាយ៉ាងនេះក្តី ដំណាំកសិកម្មនៅក្នុងខេត្តនេះរងគ្រោះធ្ងន់ជាងគេវិញ គឺដល់ទៅជាង១៧ម៉ឺនហិកតា ក្នុងចំណោមដំណាំសរុបជាង៣២ម៉ឺនហិកតាដែលត្រូវជន់លិច។
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយគិតត្រឹមថ្ងៃទី២២ ខែតុលា ទឹកជំនន់បានធ្វើឲ្យប៉ះពាល់ប្រជាពលរដ្ឋប្រមាណ ៤៨ម៉ឺននាក់ទូទាំងប្រទេស ខណៈមានអ្នកបាត់បង់ជីវិតរហូត ៣៩នាក់។ ក្នុងចំណោមអ្នកស្លាប់ទាំង ៣៩នាក់នោះ ខេត្តបន្ទាយមានជ័យមានអ្នកស្លាប់ច្រើនជាងគេគឺដល់ទៅ ២២នាក់។ បន្ទាប់មកទៀតមានខេត្តពោធិ៍សាត់ និងកំពង់ធំដែលខេត្តនីមួយៗមានអ្នកស្លាប់ ៦នាក់, ព្រះសីហនុ ២នាក់។ ចំណែកខេត្ត៣ទៀត គឺប៉ៃលិន,ស្ទឹងត្រែង កំពង់ឆ្នាំង មានអ្នកស្លាប់១នាក់ក្នុងខេត្តនីមួយៗ។
ចំណែកឯខេត្តបាត់ដំបងឯណោះវិញ ដ្បិតតែមិនមានអ្នកស្លាប់ដោយសារគ្រោះធម្មជាតិនេះ ប៉ុន្តែដំណាំកសិកម្មក្នងខេត្តនេះបានជន់លិចច្រើនជាងគេ គឺជិត ១៧ម៉ឺនហិកតា ក្នុងចំណោមដំណាំកសិកម្មសរុបដែលរងគ្រោះជាង៣២ម៉ឺនហិកតា។ តាមគណៈកម្មាធិការជាតិគ្រប់គ្រងគ្រោះមហន្តរាយ ក្នុងចំណោមដំណាំដែលត្រូវជន់លិចក្នុងខេត្តបាត់ដំបងនោះ មានដំណាំស្រូវជាង ១១ម៉ឺនហិកតា និងដំណាំរួមផ្សំជាង ៥ម៉ឺនហិកតា។
ទឹកជន់នាខេត្តបាត់ដំបងឆ្នាំ២០២០ រូបភាព៖ រដ្ឋបាលខេត្តបាត់ដំបង
ក្រៅពីដំណាំកសិកម្ម ផ្ទះពលរដ្ឋប្រមាណជិត ២ម៉ឺនគ្រួសារត្រូវប៉ះពាល់ ផ្លូវជាតិ-ខេត្ត ប្រមាណ ១១ម៉ឺនម៉ែត្រ និងប្រឡាយមេប្រមាណ ១៤ម៉ឺនម៉ែត្រ។
តាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមថ្ងៃទី២២ ខែតុលា ចំនួនអ្នកស្លាប់ដោយសារទឹកជំនន់មាន ៣៩នាក់។ រាជធានី-ខេត្តចំនួន១៩ ដែលរងការប៉ះពាល់ដោយទឹកជំនន់ រួមមានភ្នំពេញ ពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និង កំពង់ធំ។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ៕
