ខេត្តពោធិ៍សាត់ មានអ្នកស្លាប់៦នាក់ និងដំណាំស្រូវជាង ៣ម៉ឺនហិកតាជន់លិច ដោយទឹកជំនន់
ទឹកជំនន់បានធ្វើឲ្យដំណាំស្រូវក្នុងខេត្តពោធិ៍សាត់ប្រមាណ ៣៥ ៩៤៣ហិកតាជន់លិច និងប៉ះពាល់ដំណាំរួមផ្សំប្រមាណ ១ម៉ឺនហិកតា ខណៈមានមនុស្សចំនួន ៦នាក់បានបាត់បង់ជីវិត គិតត្រឹមថ្ងៃទី ២២ ខែតុលា ។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ។
ទឹកជំនន់ នៅតែបន្តអូសបន្លាយ ដែលធ្វើឲ្យប៉ះពាល់ដល់ពលរដ្ឋប្រមាណ ១២ម៉ឺនគ្រួសារទូទាំងប្រទេស។ ដោយឡែក ខេត្តពោធិ៍សាត់ បានប៉ះពាល់ស្រុកចំនួន៥ និងពលរដ្ឋប្រមាណ ២៨ ៩៦០គ្រួសារ ខណៈពលរដ្ឋ ១ ៩១១គ្រួសារ ត្រូវបានជម្លៀស។ បើតាមគណៈកម្មាធិការជាតិគ្រប់គ្រងគ្រោះមហន្តរាយ មានហេដ្ឋារចនាសម្ព័ន្ធមួយចំនួន ក៏បានប៉ះពាល់ដែរ ក្នុងនោះមានសាលារៀនចំនួន២៦ វត្តចំនួន៣៣ មន្ទីរពេទ្យចំនួន៣ ផ្លូវជាតិ-ខេត្ត ប្រមាណជិត ៤ពាន់ម៉ែត្រ ផ្លូវលំប្រមាណ ២៧ម៉ឺនម៉ែត្រ ស្ពានចំនួន១៨ និងប្រឡាយមេប្រមាណជាង ២ម៉ឺនម៉ែត្រ។
រាជធានី-ខេត្តចំនួន១៩ ដែលរងការប៉ះពាល់ដោយទឹកជំនន់ រួមមានភ្នំពេញ ពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និង កំពង់ធំ។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com