៩ខែ អាជ្ញាធរ ចាប់បានផលិតផលក្លែងក្លាយជិត៦០០តោន
ក្នុងរយៈពេល៩ខែ ដោយគិតចាប់តាំងពីខែមករា ដល់ខែកញ្ញា ឆ្នាំ២០២០ អាជ្ញាធរនៃអង្គភាពបង្ក្រាបផលិតផលក្លែងក្លាយនិងអាជ្ញាធរពាក់ព័ន្ធផ្សេងទៀត បានបង្ក្រាបបានផលិតក្លែងក្លាយដល់ទៅជិត៦០០តោន។ នេះបើតាមរបាយការណ៍ ដែលអានដោយលោក តាន់ សុខវិជ្ជា ប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) ក្នុងកិច្ចប្រជុំប្រជុំ កាលពីថ្ងៃទី២០ ខែតុលា ឆ្នាំ២០២០ ស្តីពីយន្តការអនុវត្តការប្រយុទ្ធប្រឆាំងផលិតផលក្លែងក្លាយ និងទិសដៅអនុវត្តបន្ត។
ក្នុងចំណោមផលិតក្លែងក្លាយជិត៦០០តោននោះ មានផលិតផលសម្រាប់បរិភោគ ផលិតផលជាគ្រឿងសម្អាង និង ផលិតផលឱសថ ដូចជា ផលិតផលឱសថប្រឆាំងនឹងជំងឹកូវីដ-១៩ ជាដើម។
លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ ប្រាប់អ្នកសារព័ត៌មានក្លែងក្លាយ ក្រោយចាកចេញពីកិច្ចប្រជុំថា ការបើកកិច្ចប្រជុំនេះ គឺជាការជូនដំណឹងដល់កម្លាំងសមត្ថកិច្ច ឲ្យប្រឹងប្រែងទប់ស្កាត់បទល្មើសពាក់ព័ន្ធផលិតផលិតក្លែងក្លាយ។ លោក បន្តថា គណៈកម្មាធិការប្រយុទ្ធប្រឆាំងផលិតផលក្លែងក្លាយ និងអាជ្ញាធរពាក់ព័ន្ធ នឹងប្រឹងប្រែងប្រមូលព័ត៌មានពីសកម្មភាពផលិតនិងចែកចាយផលិតផលក្លែងក្លាយ ដើម្បីធ្វើប្រតិបត្តិការបង្ក្រាប។
លោក មៀច សុផាន់ណា បង្ហាញការប្តេជ្ញាចិត្តថា៖«គណៈកម្មាធិការប្រយុទ្ធប្រឆាំងផលិតផលក្លែងក្លាយ នឹងបន្តធ្វើកម្មភាពទៀត មិនទុកបណ្តែតបណ្តោយឲ្យជនល្មើស ជនខិលខូច ឈ្មួញទុច្ចរិត ធ្វើសកម្មភាពផលិត ក៏ដូចជាចែកចាយផលិតផលក្លែងក្លាយ ដែលធ្វើឲ្យអន្តរាយដល់សុខភាពប្រជាពលរដ្ឋឡើយ»។
លោក អះអាងថា គណៈកម្មាធិការប្រយុទ្ធប្រឆាំងផលិតផលក្លែងក្លាយ រួមទាំងអាជ្ញាធរពាក់ព័ន្ធ នឹងបន្តផ្សព្វផ្សាយនិងអប់រំប្រជាពលរដ្ឋ ឲ្យយល់ដឹងពីផលិតផលិតក្លែងក្លាយ និងពីផលវិបាកនៃការប្រើប្រាស់ផលិតផលក្លែងក្លាយ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com