ជំនន់ទឹកភ្លៀង បានជន់លិចដំណាំកសិកម្មជាង ៣ម៉ឺនហិកតា ក្នុងខេត្តពោធិ៍សាត់
ជំនន់ទឹកភ្លៀង បានធ្វើឲ្យដំណាំកសិកម្មប្រមាណ ៣៣ ១៣១ហិកតា រងផលប៉ះពាល់ក្នុងនោះមានស្រូវជិត៧ពាន់ហិកតា និងដំណាំរួមផ្សំ ជិត២ ៥០០ហិកតា បានខូចខាត គិតចាប់ពីថ្ងៃទី ៧ ខែតុលា ដល់ថ្ងៃទី ១៦ ខែតុលា។ នេះបើតាមលោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ ប្រាប់សារព័ត៌មាន ThmeyThmey25 ដោយលោកបានបន្តថា បច្ចុប្បន្ន កម្រិតទឹកក្នុងខេត្តពោធិ៍សាត់ ពេលនេះបានស្រកជាបណ្ដើរៗហើយ។
តាមប្រធានមន្ទីរកសិកម្មដដែល ក្រៅពីដំណាំកសិកម្ម ក៏មានដែរកសិដ្ឋានចិញ្ចឹមសត្វមួយចំនួន រួមមានគោ ក្របី ជ្រូក បានរងការជន់លិច ហើយសត្វទាំងនោះត្រូវបានជម្លៀសទៅកាន់ទីទួលសុវត្ថិភាព ហើយក៏មិនទាន់មានសត្វចិញ្ចឹមរបស់ពលរដ្ឋរងគ្រោះដែរ។
បើតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមថ្ងៃទី១៥ ខែតុលា មានដំណាំកសិកម្មចំនួន ១៨៦ ៦៨៩ហិកតា បានរងផលប៉ះពាល់។ របាយការណ៍បញ្ជាក់ថា មានរាជធានី-ខេត្ត សរុបចំនួន១៩ ដែលបានរងប៉ះពាល់ ក្នុងនោះខេត្តបាត់ដំបង បន្ទាយមានជ័យ ពោធិ៍សាត់ កំពង់ស្ពឺ រងគ្រោះខ្លាំងជាងគេ។ ក្រៅពីនោះ មានខេត្តប៉ៃលិន , កណ្តាល, ភ្នំពេញ,សៀមរាប, ព្រះសីហនុ, ខេត្តកំពង់ធំ, ស្វាយរៀង, ឧត្តរមានជ័យ, តាកែវ, មណ្ឌលគិរី, កោះកុង, ព្រះវិហារ, ស្ទឹងត្រែង, កំពង់ចាម និងខេត្តកំពង់ឆ្នាំង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com