Thmey Thmey 25
ទឹកជំនន់​ធ្វើ​ឲ្យ​ប៉ះពាល់​ដំណាំ​កសិកម្ម​ក្នុង​ខេត្តបាត់ដំបង​ជាង ១៣​ម៉ឺន​ហិកតា​
16/10/2020 6:00 pm បាត់ដំបង ​គិត​មកដល់​ថ្ងៃទី​១៦ ខែតុលា ឆ្នាំ​២០២០ ទឹកជំនន់ បានធ្វើ​ឲ្យ​មាន​ផលប៉ះពាល់​ដល់​ដំណាំ​កសិកម្ម​របស់​ប្រជាកសិករ ក្នុង​ខេត្តបាត់ដំបង ជាង​១៣​ម៉ឺន​ហិកតា ។ នេះ​បើតាម​របាយការណ៍​ពី គណៈកម្មាធិការ​ជាតិ​គ្រប់គ្រង​គ្រោះមហន្តរាយ​។

​របាយការណ៍​ដដែល ក៏បាន​ឲ្យ​ដឹង​ទៀតថា ដំណាំ​កសិកម្ម​ក្នុង​ខេត្តបាត់ដំបង ដែល​រង​ផលប៉ះពាល់​ប្រមាណ ១៣​ម៉ឺន​ហិកតា ក្នុងនោះ​រួមមាន ដំណាំ​ស្រូវ ៨២ ៤២៦​ហិកតា និង​ដំណាំ​រួមផ្សំ ៤៩ ៦១៦ ហិកតា​។ ដោយឡែក​ដំណាំ​រួមផ្សំ​ខូចខាត​ទាំងស្រុង​មាន​ចំនួន ២៦ ៩០៧​ហិកតា​។​

​ក្រៅពី​ដំណាំ​កសិកម្ម ទឹកជំនន់​ក្នុង​ខេត្តបាត់ដំបង បានធ្វើ​ឲ្យ​មាន​ផលប៉ះពាល់ ដល់ផ្ទះ​ប្រជាពលរដ្ឋ​ចំនួន ១៣ ២៩០​គ្រួសារ និង​បាន​ជម្លៀស​ទៅកាន់​ទីទួល​សុវត្ថិភាព ចំនួន ៩៧២​គ្រួសារ​។​

​សូមជម្រាបថា គិត​ត្រឹម​ថ្ងៃទី​១៦ ខែតុលា ជំនន់​ទឹកភ្លៀង​បានសម្លាប់​មនុស្ស​រហូត​ដល់ ១៨​នាក់ ក្នង​នោះ​ខេត្តបន្ទាយមានជ័យ​មាន​ច្រើនជាងគេ គឺ​ចំនួន ៧​នាក់​, កណ្ដាល​ចំនួន ៤​នាក់​,​ពោធិ៍សាត់​ចំនួន ៣​នាក់​, ព្រះសីហនុ​ចំនួន ២​នាក់​, ប៉ៃលិន​ចំនួន ១​នាក់​, និង​ខេត្តកំពង់ធំ ១​នាក់​។ នេះ​បើតាម​របាយការណ៍​ដដែល​៕
ដោយ៖ ជឿន ស្រី​ណ​យ​ © រក្សាសិទ្ធិដោយ thmeythmey25.com