ក្រសួងបរិស្ថានរៀបចំពិព័រណ៍សត្វស្លាប លើកទី២ នៅខេត្តសៀមរាប
សៀមរាប៖ ក្រសួងបរិស្ថាន សហការជាមួយរដ្ឋបាលខេត្តសៀមរាប នឹងរៀបចំពិព័រណ៍សត្វស្លាបលើកទី២ ក្រោមប្រធានបទ «ការមើលសត្វស្លាបផ្សារភ្ជាប់ជាមួយទេសចរណ៍ធម្មជាតិ»។ ពិព័រណ៍នេះធ្វើឡើងរយៈពេល២ថ្ងៃ គឺថ្ងៃទី១៧ និង១៨ តុលា នៅបរិវេណសួនច្បារមាត់ស្ទឹងសៀមរាប។
អ្នកនាំពាក្យក្រសួងបរិស្ថាន លោក នេត្រ ភក្ដ្រា ឱ្យដឹងថា ពិព័រណ៍នេះធ្វើឡើងក្នុងបំណងដើម្បីផ្សព្វផ្សាយពីសត្វស្លាប ការថតរូបសត្វស្លាប និងជីវចម្រុះនៅក្នុងប្រទេសកម្ពុជា ដើម្បីផ្សព្វផ្សាយឱ្យយល់ដឹងជារួមពីបញ្ហាទាំងនេះ។ លោកបន្ថែមថា ពិព័រណ៍នេះមានការចូលរួមពីក្រុមអ្នកថតសត្វស្លាបទូទៅប្រទេសកម្ពុជាផងដែរ។
តាមសេចក្ដីជូនដំណឹងរបស់ក្រសួងបរិស្ថាន ក្នុងពិព័រណ៍រយៈពេល២ថ្ងៃនេះ ក្រៅពីមានការតាំងពិព័រណ៍រូបភាពសត្វស្លាបនៅកម្ពុជា ក៏មានការធ្វើបទបង្ហាញស្ដីពីការអភិរក្សសត្វស្លាប និងកម្មវិធីមើលសត្វស្លាបនៅតំបន់ភ្នំក្រោម និងការកម្មវិធីមួយចំនួនទៀត៕
