បំណែកបដិមា និងថ្មចម្លាក់ចំនួន៤១ដុំ ត្រូវបានព្រះចៅអធិការវត្តព្រះឥន្ទ្រទេព ប្រគល់ជូនអាជ្ញាធរជាតិអប្សរា ក្រោយរក្សាទុកក្នុងវត្ត
បំណែកបដិមា និងថ្មចម្លាក់ចំនួន៤១ដុំ ត្រូវបានព្រះចៅអធិការវត្តព្រះឥន្ទទេព ប្រគល់ជូនអាជ្ញាធរជាតិអប្សរាថែរក្សា ក្រោយពីព្រះអង្គបានប្រមូលយកទៅរក្សាទុកបណ្តោះអាសន្ននៅក្នុងបរិវេណវត្ត ដែលស្ថិតនៅជ្រុងអាគ្នេយ៍នៃប្រាសាទបាយ័ន។ នេះបើតាមអាជ្ញាធរជាតិអប្សារា។
ក្នុងចំណោមចម្លាក់ទាំងនេះ មានមួយចំនួនធំជាព្រះពុទ្ធបដិមាដែលនៅសល់តែព្រះភ្នែន និងបល្ល័ង្គផ្កាឈូក ឯខ្លះទៀតឃើញមានត្រឹមព្រះបាទទ្រង់ឈរលើជើងទម្រប៉ុណ្ណោះ។ បើតាមការពិនិត្យ ព្រះពុទ្ធបដិមាទាំងនេះ មានខ្លះស្ថិតនៅក្នុងរចនាបថបាយ័ន ប្រហែលនាចុងសតវត្សរ៍ទី១២ទៅដើម១៣ និងខ្លះទៀតស្ថិតនៅក្នុងរចនាបថសម័យកណ្តាល ប្រហែលជានៅសតវត្សរ៍ទី១៥ឬទី១៦។ នេះបើតាមការលើកឡើងរបស់ លោក ឈូក សុម៉ាឡា មន្ត្រីនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យានៃអាជ្ញាធរជាតិអប្សរា។
រូបភាពពីហ្វេសប៊ុកអាជ្ញាធរជាតិអប្សរា
ព្រះចៅអធិការ សែម សំ មានសង្ឃដីកាថា៖ «ទាក់ទងនឹងការរក្សាវត្ថុបុរាណទុក ដើមឡើយបំណែកចម្លាក់ទាំង៤១ដុំនេះ ស្ថិតនៅរាយប៉ាយក្នុងបរិវេណវត្តព្រះឥន្ទទេព ហើយខ្លះទៀតនៅផ្នែកខាងក្រោយនៃខឿនព្រះអង្គទេព។ ដូច្នេះ ព្រះអង្គក៏បានប្រមូលយកមករក្សាទុកនៅក្នុងរោងផ្នែកខាងត្បូងវត្ត ដើម្បីរក្សាសុវត្ថិភាព រួមទាំងការពារការបាត់បង់ និងខូចខាតដោយប្រការផ្សេងៗ»។
គួរបញ្ជាក់ផងដែរថា បន្ទាប់ពីបានទទួលដំណឹងពីក្រុមសមត្ថកិច្ចការពារបេតិកភណ្ឌតំបន់អង្គរ ក្រុមចុះបញ្ជីសារពើភណ្ឌនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរាបានចុះទៅទទួលបំណែកបដិមាខាងលើ យកមករក្សាទុក និងធ្វើការងារចុះបញ្ជី ថតរូប និងពិពណ៌នាទុកជាឯកសារសម្រាប់ធ្វើការជួសជុលនៅថ្ងៃក្រោយ៕
រូបភាពពីហ្វេសប៊ុកអាជ្ញាធរជាតិអប្សរា
