ក្រសួងទេសចរណ៍ បើកវគ្គបង្រៀនដុតនំតាមអនឡាញ ដោយឥតគិតថ្លៃ
ភ្នំពេញ៖ ក្រសួងទេសចរណ៍នឹងបើកវគ្គបណ្តុះបណ្តាលជំនាញដុតនំ តាមអនឡាញដោយឥតគិតថ្លៃ ទៅដល់បុគ្គលិកទេសចរណ៍ យុវជន សិស្ស និស្សិត និង សាធារណជន ដែលចង់អភិវឌ្ឍសមត្ថភាព ជំនាញទេសចរណ៍ និងបដិសណ្ឋារកិច្ច។ វគ្គបណ្តុះបណ្តាលនេះនឹងចាប់ផ្តើមនៅថ្ងៃទី២២ ខែតុលាខាងមុខនេះ។
ក្រសួងទេសចរណ៍បានបញ្ជាក់ថាការបើកវគ្គបណ្តុះបណ្តាលដុតនំនេះគឺដើម្បីជំរុញ និងលើកកម្ពស់ការអភិវឌ្ឍធនធានមនុស្សនៅក្នុងវិស័យទេសចរណ៍។ ជាពិសេសដើម្បីផ្តល់ជំនាញថ្មី និងជំនាញបន្ថែមដល់បុគ្គលិកទេសចរណ៍ សិស្ស និស្សិត យុវជន និងសាធារណជន។
លោក តុប សុភ័ក អ្នកនាំពាក្យក្រសួងទេសចរណ៍ បញ្ជាក់ថា មុននឹងអាចចូលរៀនវគ្គបណ្តុះបណ្តាលនេះបាន សិក្ខាកាមត្រូវចុះឈ្មោះ និងវាយតម្លៃសមត្ថភាពតាមគេហទំព័រ https://www.tptd.org/kh នេះជាមុនសិន។ លោក បន្តថា បន្ទាប់ពីចុះឈ្មោះ និងបំពេញលក្ខខណ្ឌរួចហើយ ខាងក្រសួងទេសចរណ៍នឹងទាក់ទង ហើយបញ្ជាក់ពីម៉ោង និងកាលវិភាគសិក្សា។
លោក មានប្រសាសន៍ថា៖«យើងចុះឈ្មោះទៅ គេនឹងមានការណែនាំយើង និងសួរព័ត៌មានយើង។ អ៊ីចឹងយើងត្រូវបំពេញព័ត៌មានតាមតែរបស់គេទៅ។ គេនឹងផ្តល់ព័ត៌មានប្រាប់មកយើងវិញថាយើងអាចនឹងរៀនបាននៅពេលណា។ ធម្មតាបើយើងរៀនជំនាញទាំងហ្នឹងគឺត្រូវមានអ្វីសម្រាប់រៀន ពេលយើងចុះឈ្មោះរៀន គេនឹងប្រាប់ថាត្រូវមានអ្វីសម្រាប់រៀនហើយ»។
ជាមួយគ្នានេះដែរ ក្រសួងទេសចរណ៍ក៏កំពុងបណ្តុះបណ្តាលលើជំនាញគេហកិច្ច ម្ហូបអាហារ ឆុងកាហ្វេ និង ក្រឡុកស្រាទៅបុគ្គលិកទេសចរណ៍ សិស្ស និស្សិត យុវជន និងសាធារណជនផងដែរ។ បើតាមលោក តុប សុភ័ក មានអ្នកចុះឈ្មោះចូលរួមវគ្គបណ្តុះបណ្តាលទាំងនេះជាង២ពាន់នាក់ហើយ។
វគ្គបណ្តុះបណ្តាលទាំងនេះ នឹងបង្រៀនដោយគ្រូដែលមានបទពិសោធន៍។ ពេលសិក្ខាកាមរៀនចប់ គឺត្រូវឆ្លងកាត់ការប្រឡងតេស្តសមត្ថភាពបញ្ចប់វគ្គតាមអនឡាញ។ ក្រោយពេលប្រឡងរួចសិក្ខាកាមនឹងទទួលបានវិញ្ញាបនបត្របញ្ជាក់សមត្ថភាព ដែលទទួលស្គាល់ដោយក្រសួងទេសចរណ៍៕
Relate 95568
