ដើមឈើចំនួន៩៧ដើម នៅរមណីយដ្ឋានអង្គរ រលំដោយសារខ្យល់កន្ត្រាក់
ដើមឈើចំនួន ៩៧ដើម ក្នុងបរិវេណរមណីយដ្ឋានអង្គរ បានដួលរលំដោយសារភ្លៀង និងខ្យល់កន្ត្រាក់ ដែលកើតឡើងអំឡុងរដូវវស្សា ឆ្នាំ២០២០នេះ។ អាជ្ញាធរជាតិអប្សរា បានបញ្ជាក់នៅទំព័រហ្វេសប៊ុករបស់ខ្លួន នៅថ្ងៃទី ២៩ ខែកញ្ញាថា ដើមឈើដែលដួលរំលំនេះ កើតមាននៅ១២ទីតាំងផ្សេងគ្នា ហើយដើមឈើទាំងនោះ មានទំហំមុខកាត់ ពី ១០- ៧០សង់ទីម៉ែត្រ។
នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា បានកាត់សម្អាតដើមឈើដែលដួលរលំទាំងនោះ ដើម្បីរក្សាសោភ័ណភាពនៅក្នុងឧទ្យានអង្គរ។ នេះបើតាមអាជ្ញាធរជាតិអប្សរា ដែលបានបញ្ជាក់ថា ប្រភេទដើមឈើដែលមានមានដូចជា ដើមស្រឡៅ ដើមឈើទាល, ដើមខ្នារ, មៀនព្រៃ,ស្ដៅ ,សិរមាន់ ,ក្រាយ, ត្រាច, ត្រសេក, ស្លាក្រពុល, ខ្ចាស់,ក្រឡាញ់, ជម្ពូ , ពភ្លា, ច័នទំពាំង, ស្លែង, បំពេញរាជ, អង្កាញ់ សង្កែ, ដើមស្នាយ, កន្ទៀក, ចាមរី ដើមរំដួល, ដើមពោធិ៍ ,ដើមថ្កូវ ដើមពង្រ និងដើមឈើកម្រ ច្រើនប្រភេទទៀត។
រូបភាពពីអាជ្ញាធរជាតិអប្សរា
ទីតាំងដែលមានដើមឈើដួលរលំច្រើនជាងគេ គឺនៅបរិវេណអង្គរធំ ដែលមានចំនួន ២៤ដើម និងនៅបរិវេណប្រាសាទអង្គរវត្ត និងតំបន់ជុំវិញ ចំនួន ១៣ដើមទៀត។ ក្រៅពីនោះ មាននៅតាមផ្លូវវង់ធំ ចំនួន១១ដើម នៅប្រាសាទព្រះខ័ន និងប្រាសាទភ្នំបាខែង សរុប៨ដើម។ ចំណែកនៅតំបន់រលួស មាន៧ដើម ហើយនៅខាងលិចប្រាសាទតានៃ និងប្រាសាទតាកែវ ចំនួន២ដើម។ នៅបរិវេណប្រាសាទបន្ទាយប្រី និងប្រាសាទប្រីចំនួន ៤ដើម។ នៅខាងត្បូងប្រាសាទប្រែរូបមាន ១ដើម។ ៣ទីតាំងទៀត មានដើមឈើរលំ១៣ដើម គឺនៅបរិវេណស្រះស្រង់ ប្រាសាទបន្ទាយក្តី និងប្រាសាទតាព្រហ្ម។ នៅប្រាសាទវត្តអធ្វារ និងប្រាសាទនាគព័ន្ធមាន ៣ដើម។ នៅបរិវេណប្រាសាទបន្ទាយស្រីចំនួន ៧ដើម។ និងនៅតាមបណ្តោយផ្លូវហ្សាដឺហ្គោល ដល់ស្ពានអង្គរ និងប្រាសាទក្រវ៉ាន់ចំនួន ៥ដើម៕
រូបភាពពីអាជ្ញាធរជាតិអប្សរា
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com