ផ្លូវមួយចំនួន និងដំណាំប្រមាណ ៦០០ហិកតានៅពោធិ៍សាត់ រងប៉ះពាល់ដោយសារជំនន់ទឹកភ្លៀង
ស្រុកវាលវែង ស្រុកកណ្ដៀង និងស្រុកភ្នំក្រវាញ និងក្រុងពោធិ៍សាត់នៃខេត្តពោធិ៍សាត់ កំពុងរងគ្រោះដោយជំនន់ទឹកភ្លៀង ដែលប៉ះពាល់ដល់លំនៅដ្ឋាន ដំណាំស្រូវ និងហេដ្ឋារចនាសម្ព័ន្ធមួយចំនួន។ នេះបើតាមសេចក្ដីជូនដំណឹងរបស់រដ្ឋបាលខេត្តពោធិ៍សាត់នៅថ្ងៃទី ២២ ខែកញ្ញា ឆ្នាំ២០២០។
បើតាមសេចក្ដីជូនដំណឹងខាងលើ គិតត្រឹមថ្ងៃទី២១ ខែកញ្ញា បន្ទាប់ពីទទួលឥទ្ធិពលព្យុះទី១១ «នូល» និងមានភ្លៀងធ្លាក់ជាប់គ្នា ២ថ្ងៃផងនោះ ធ្វើឲ្យ ស្រុក-ក្រុង ចំនួន៤ និង ឃុំ-សង្កាត់ ចំនួន ១៨ បានបង្កទៅជាទឹកជំនន់។ សម្រាប់ស្រុកវាលវែង បានធ្វើឲ្យផ្ទះពលរដ្ឋចំនួន ៨គ្រួសារបានលិច និងប៉ះពាល់ដំណាំប្រមាណ ៣១៨ហិកតា ដាច់ស្ពាននិងផ្លូវ ៤កន្លែង។
រីឯក្រុងពោធិ៍សាត់វិញ បានប៉ះពាល់ផ្ទះពលរដ្ឋ ១ ៤២៧គ្រួសារ និងលិចដំណាំស្រូវ ៨២៨ហិកតា និងធ្វើឲ្យលិចផ្លូវប្រមាណ ៣០ខ្សែក្នុងក្រុង។ ចំណែកស្រុកកណ្ដៀង បានធ្វើឲ្យស្រូវស្រាល ជិត ៣០០ហិកតា និងប៉ះពាល់ផ្លូវមួយចំនួន។ ហើយសម្រាប់ស្រុកភ្នំក្រវាញវិញ ត្រូវជម្លៀសពលរដ្ឋ ១៨០គ្រួសារ ទៅទីមានសុវត្ថិភាព និងបង្កឲ្យផ្លូវមួយចំនួនខូចខាតផងដែរ។
ពាក់ព័ន្ធបញ្ហានេះលោក ម៉ៅ ធនិន អភិបាលខេត្តពោធិ៍សាត់ បានប្រាប់សារព័ត៌មានThmeyThmey25 តាមទូរសព្ទនៅថ្ងៃទី ២២ ខែកញ្ញា ថា៖«រហូតមកពេលនេះ ស្ថានភាពក្នុងទឹកជំនន់ក្នុងខេត្តពោធិ៍សាត់ មិនមានអ្វីគួរឲ្យបារម្ភនោះទេ អាចគ្រប់គ្រងបាន»។ ហើយរដ្ឋបាលខេត្តបានរៀបចំគណៈកម្មាធិការគ្រប់គ្រងគ្រោះមហន្តរាយ២៤ម៉ោង ដើម្បីចាំជួយសង្គ្រោះពលរដ្ឋឲ្យទាន់ពេលវេលា»។
លោកអភិបាលខេត្តបានបញ្ជាក់ទៀតថា ចំពោះការខូចខាត និងចាំដោះស្រាយតាមក្រោយ ខណៈពេលនេះដោះស្រាយចំពោះបញ្ហាស្បៀង និងគិតពីសុវត្ថិភាពពលរដ្ឋជាមុនសិន។ គិតត្រឹមថ្ងៃទី ២២ ខែកញ្ញា ឆ្នាំ២០២០ គ្មានពលរដ្ឋណាម្នាក់រងគ្រោះដល់អាយុជីវិត ដោយសារគ្រោះទឹកជំនន់នេះឡើយ។ នេះជាការបញ្ជាក់របស់អភិបាលខេត្តពោធិ៍សាត់៕
