លោក ម៉ៅ ធនិន៖ ស្ថានភាពទឹកជំនន់នៅពោធិ៍សាត់ អាចគ្រប់គ្រងបាន ខណៈទឹកបន្តស្រក
កម្ពុជាទទួលរងឥទ្ធិពលព្យុះទី១១ «នូល» ធ្វើឲ្យខេត្តមួយចំនួន ដូចជាខេត្តឧត្តរមានជ័យ កោះកុង បាត់ដំបង ប៉ៃលិន ព្រះសីហនុ កំពត កែប រងផលប៉ះពាល់ និងបង្កើតជាជំនន់ទឹកភ្លៀង។ ក្នុងនោះខេត្តពោធិ៍សាត់ ក៏ស្ថិតក្នុងខេត្តមួយដែលទទួលរងនូវឥទ្ធិពលដែរ ធ្វើឲ្យប៉ះពាល់ដល់ផ្ទះពលរដ្ឋ ផលដំណាំ ផ្លូវសាធារណៈ និងរំខានដល់ការប្រកបការងារដល់ពលរដ្ឋ។
លោក ម៉ៅ ធនិន អភិបាលខេត្តពោធិ៍សាត់ ប្រាប់សារព័ត៌មានThmeyThmey25 តាមទូរសព្ទនៅថ្ងៃទី ២២ ខែកញ្ញា ថា៖«រហូតមកពេលនេះ ស្ថានភាពក្នុងទឹកជំនន់ក្នុងខេត្តពោធិ៍សាត់ មិនមានអ្វីគួរឲ្យបារម្ភនោះទេ អាចគ្រប់គ្រងបាន បើមិនមានភ្លៀងធ្លាក់បន្ត កម្ពស់ទឹកនឹងបន្តស្រកជាបន្តបន្ទាប់»។ មកដល់ពេលនេះគ្មានពលរដ្ឋណាម្នាក់គ្រោះថ្នាក់ដល់ជីវិតនោះទេ គ្រាន់ប៉ះពាល់ដល់ការប្រកបការងារតិចតួច»។
លោកអភិបាលខេត្តក៏បានបញ្ជាក់ទៀតថា កត្តាដែលធ្វើឲ្យខេត្តពោធិ៍សាត់មានជំនន់ទឹកភ្លៀង ដោយសាររងឥទ្ធិពលព្យុះកន្លងមក ធ្វើឲ្យបរិមាណទឹកស្ទឹងចំនួន៣ ក្នុងខេត្តពោធិ៍សាត់ មានស្ទឹងអារ៉ៃ ស្ទឹងព្រែកថ្លុង និងស្ទឹងពោធិ៍សាត់ ហូរធ្លាក់ចូលទៅស្ទឹងពោធិ៍សាត់តែមួយ និងបន្តហូរទៅបឹងទន្លេសាប ធ្វើឲ្យកម្ពស់ទឹកភ្លៀងខ្ពស់ និងបាចសាចទៅតាមតំបន់នីមួយៗ។
រដ្ឋបាលខេត្តបានចាត់ក្រុមការងារ ចុះជួយដោះស្រាយជូនពលរដ្ឋជាបន្តបន្ទាប់ ដូចជាស្បៀងអាហារជាដើម។ ដោយឡែកចំពោះការខូចខាតមិនមានរបាយការណ៍បូកសរុបនៅឡើយទេ។ ចំពោះដំណាំស្រូវវិញ ក៏មិនបានចោទជាបញ្ហាដែរ មានតែជួយបង្កើនទិន្នផលដល់ដំណាំស្រូវកសិករថែមទៀត។ នេះបើតាមការបញ្ជាក់របស់អភិបាលខេត្តពោធិ៍សាត់រូបនេះ។
គួរបញ្ជាក់ថា ក្រសួងធនធានទឹក និងឧតុនិយម នៅថ្ងៃទី២១ ខែកញ្ញា ឆ្នាំ២០២០ បានចេញសេចក្ដីជូនដំណឹងពីស្ថានភាពកម្ពស់់ទឹកភ្លៀងនៅតាមទីតាំងនីមួយៗ កំពុងស្ថិតក្នុងការគួរប្រុងប្រយ័ត្ន។ ក្នុងនោះកម្ពស់ទឹកសឹ្ទងពោធិ៍សាត់ មាន ៥.៤៥ម៉ែត្រ កម្ពស់ទឹកប្រុងប្រយ័ត្ន ៥ម៉ែត្រ នៅក្រុងពោធិ៍សាត់។ សម្រាប់សឹ្ទងក្រវាញ កម្ពស់ទឹក ៥.៧៥ម៉ែត្រ កម្ពស់ទឹកប្រុងប្រយ័ត្ន ៦ម៉ែត្រ នៅស្រុកភ្នំក្រវាញ។ ដោយឡែកសឹ្ទងវាលវែង កម្ពស់ទឹក ២.ម៉ែត្រ កម្ពស់ទឹកប្រុងប្រយ័ត្ន ១០ម៉ែត្រ នៅស្រុកវាលវែង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com