គ្រោងឆ្អឹងសត្វខ្ទីង១ក្បាល ត្រូវបានមន្ត្រីឧទ្យានុរក្ស ប្រទះឃើញនៅដែនជម្រកសត្វព្រៃគូលែនព្រហ្មទេព
សាកសពសត្វខ្ទីង១ក្បាល ដែលបន្សល់នូវតែគ្រោងឆ្អឹងនៃតួខ្លួនមួយចំនួន ត្រូវបានមន្ត្រីឧទ្យានុរក្សស្នាក់ការអូរអំបិលប្រទះឃើញ នៅក្បែរមាត់ត្រពាំងតាសារូ ក្នុងបរិវេណដែនជម្រកសត្វព្រៃគូលែនព្រហ្មទេព ក្នុងភូមិសាស្ត្រខេត្តឧត្តរមានជ័យ កាលពីថ្ងៃទី២០កញ្ញា ឆ្នាំ២០២០។
បើតាមការចុះផ្សាយរបស់ក្រសួងបរិស្ថាននាព្រឹកថ្ងៃទី២២កញ្ញានេះ ក្រុមការងារល្បាតមិនទាន់រកឃើញមូលហេតុនៃការបាត់បង់ជីវិតរបស់សត្វខ្ទីង១ក្បាលនេះឡើយ។ ដោយក្រុមការងារល្បាតរបស់ក្រសួងបរិស្ថានបានសន្និដ្ឋានថា សត្វខ្ទីងនេះ គឺបានងាប់អស់រយៈជិត២ខែមកហើយ ព្រោះស្អុយរលួយអស់ នៅតែគ្រោងឆ្អឹង។
ជាមួយគ្នានេះក្រសួងបរិស្ថានបានបញ្ជាក់ថា ក្បាល និង គ្រោងឆ្អឹងមួយផ្នែកនៃសាកសពសត្វខ្ទីងនេះ គឺបានបាត់ ដោយបន្សល់នូវគ្រោងតែមួយផ្នែកប៉ុណ្ណោះ ហើយគ្រោងឆ្អឹងដែលសេសសល់នោះ ខាងក្រុមការងារល្បាត បានប្រមូលយកទៅរក្សទុកនៅទីស្នាក់ការអង្គការអភិរក្សសត្វព្រៃ កម្ពុជា និងអនុរក្សសត្វដំរី។
ខ្ទីង ជាប្រភេទសត្វមួយ ដែលទទួលរងនូវការគំរាមកំហែងយ៉ាងខ្លាំង ហើយចំនួនរបស់វាមានការថយចុះគួរឱ្យព្រួយបារម្ភ។ សត្វខ្ទីង កំពុងប្រឈមមុខនឹងការរងគ្រោះថ្នាក់ ដោយសារបាត់បង់ទីជម្រករស់នៅ ការបរបាញ់ដើម្បីយកសាច់, ស្នែង, ឆ្អឹង និងការជួញដូរ។ ខ្ទីង ស្ថិតនៅក្នុងក្រុមប្រភេទមានដោយកម្រ និងជាប្រភេទមានដង់ស៊ីតេរស់នៅកម្រិតទាប ហើយគេកម្រឃើញវារស់នៅ តាមវាលទំនាបណាស់ ពីព្រោះតែវាមិនចូលចិត្តកម្ដៅ។ សត្វប្រភេទនេះ ត្រូវបានចុះក្នុងបញ្ជីក្រ ហម IUCN ថាជាប្រភេទងាយរងគ្រោះថ្នាក់ជាសកល។ នេះបើយោងតាមសៀវភៅថនិកសត្វកម្ពុជា ដែលរៀបរៀងដោយ ម៉ែន សូរិយន់, សួន ផល្លា, ស៊ិន ប៉ូលីន និង Joe Walston ឆ្នាំ២០០៨៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com