អាជ្ញាធរខេត្តបាត់ដំបង ឲ្យផ្អាកបណ្តោះអាសន្នជាបន្ទាន់ អាជីវកម្មកម្សាន្តតាមស្ទឹង បឹងបួរ
មន្ទីរទេសចរណ៍ខេត្តបាត់ដំបង បានណែនាំម្ចាស់រមណីយដ្ឋានដែលមានទីតាំងនៅជិតដងស្ទឹង បឹងបួរ ជ្រោះ ឬជ្រលងភ្នំ ឲ្យផ្អាកដំណើរការបណ្តោះអាសន្នជាបន្ទាន់ ចាប់ពីថ្ងៃទី២០កញ្ញានេះ រហូតដល់មានការជូនដំណឹងជាថ្មី។ ការណែនាំនេះ គឺដើម្បីបង្ការគ្រោះថ្នាក់ដែលអាចកើតឡើងបណ្តាលមកពីឥទ្ធិពលព្យុះនូល ក៏ដូចជាឥទ្ធិពលខ្យល់មូសុងនិរតីល្បឿនលឿនដែលបាន និងកំពុងបោកបក់មកលើកម្ពុជា។
ខ្លឹមសារនៃសេចក្ដីជូនដំណឹងនោះ មានន័យដូច្នេះ៖«ដើម្បីធានាសុវត្ថិភាពជូនភ្ញៀវទេសចរជាតិ និងអន្តរជាតិ មន្ទីរទេសចរណ៍ខេត្តបាត់ដំបងសូមណែនាំដល់ម្ចាស់រមណីយដ្ឋាននៅតាមដងជ្រោះ ជ្រលងដងអូរ ដងស្ទឹងបឹងបួរ ឲ្យផ្អាកដំណើរជាបណ្តោះអាសន្នជាបន្ទាន់ ចាប់ថ្ងៃទី ២០ ខែកញ្ញា ឆ្នាំ២០២០ រហូតដល់មានការជូនដំណឹងជាថ្មី»។
ម្ចាស់រមណីយដ្ឋានណាមិនព្រមអនុវត្តតាមសេចក្ដីជូនដំណឹងត្រូវទទួលខុសត្រូវចំពោះមុខច្បាប់។ នេះជាការគូសបញ្ជាក់របស់មន្ទីរទេសចរណ៍ខេត្តបាត់ដំបង។
ជុំវិញស្ថានភាពអាកាសធាតុនេះដែរ រដ្ឋបាលខេត្តបាត់ដំបង ក៏បានជូនដំណឹងដល់ប្រជាពលរដ្ឋស្ថិតនៅក្នុងខេត្តបាត់ដំបង ជាពិសេសប្រជាពលរដ្ឋនៅតាមបណ្ដោយស្ទឹងសង្កែ ត្រូវមានការប្រុងប្រយ័ត្នខ្ពស់ ព្រោះភ្លៀងនៅតែបន្តធ្លាក់ ដែលអាចបណ្តាលឲ្យទឹកក្នុងស្ទឹងសង្កែ ស្ទឹងមង្គលបុរី និងស្ទឹងដូនទ្រីមានការកើនឡើង៕
