Thmey Thmey 25
«​ភ្នំ​ប្រាសាទ​» តំបន់​ទេសចរណ៍ធម្មជាតិ និង​ត្រូវបាន​ចុះបញ្ជី​ជា​សម្បត្តិ​បេតិកភណ្ឌ​ជាតិ​
11/09/2020 12:15 pm កំពត «​ភ្នំ​ប្រាសាទ​» ដែល​ស្ថិតនៅ​ភូមិ​ភ្នំ​ប្រាសាទ ឃុំ​ភ្នំ​ប្រាសាទ ស្រុ​កំពង់ត្រាច ខេត្តកំពត ជា​តំបន់​ទេសចរណ៍ធម្មជាតិ និង​ត្រូវបាន​ចុះបញ្ជី​ជា​សម្បត្តិ​បេតិកភណ្ឌ​ជាតិ ប៉ុន្តែ​ពុំ​សូវ​មាន​អ្នក​ស្គាល់ ឬ​ទៅលេង​កម្សាន្ត​ច្រើន​នៅឡើយ​។ នេះ​បើតាម​ក្រសួងបរិស្ថាន​។​

​ភ្នំ​ប្រាសាទ​លាតសន្ធឹង​នៅលើ​ផ្ទៃដី​ប្រមាណ​ជាង​៤០០​ហិកតា និង​មាន​កម្ពស់​៣០០​ម៉ែត្រ​។ នៅលើ​ភ្នំ​នេះ​មាននៅ​សេសសល់​ខឿន​ប្រាសាទបុរាណ ស្ថិតក្នុង​រចនាបថ​ក្រុម​ប្រាសាទសម្បូរព្រៃគុក សាងសង់ឡើង​ក្នុង​សតវត្សរ៍​ទី​៧ ក្នុង​រជ្ជកាល​ព្រះបាទ​ជ័យ​វរ្ម័នទី​១​។ លើសពីនេះ នៅលើ​ភ្នំ​សម្បូរ​ទៅដោយ​ព្រៃឈើ​ធំៗ ដុះ​តម្រៀបជួរ​គ្នា​យ៉ាង​ខៀវស្រងាត់​។ 

​បើតាម​ក្រសួងបរិស្ថាន ភ្នំ​នេះ ត្រូវបាន​ចុះបញ្ជី​សារពើ​ភណ្ឌ ជា​សម្បត្តិ​បេតិកភណ្ឌ​ជាតិ ដោយ​ក្រសួង​វប្បធម៌ និង​វិចិត្រសិល្បៈ​ប៉​ន្តែ​មិនទាន់មាន​ការបោះបង្គោល និង​ចុះបញ្ជី​ជា​ដី​សាធារណៈ​របស់​រដ្ឋ​នៅឡើយ​។ សូមបញ្ជាក់​ផងដែរ​ថា ចាប់ពី​តាំងពី​ថ្ងៃទី​២០ ខែវិច្ឆិកា ឆ្នាំ​២០១៨​មក ក្រសួងបរិស្ថាន បាន​សហការ​ជាមួយ​មន្ត្រី​ជំនាញ ក្នុងការ​រក្សាទុក​ស្ថានីយ​បុរាណ​ចំនួន​១៧៣​ទីតាំង នៅតាម​តំបន់ភ្នំ ក្នុង​និង​ក្រៅ​តំបន់ការពារធម្មជាតិ ជា​តំបន់​អភិរក្ស​បេតិកភណ្ឌ​សម្រាប់​មនុស្ស​ជំនាន់​ក្រោយ​៕
ដោយ៖ ​ង៉ា​យ ណៃ​ © រក្សាសិទ្ធិដោយ thmeythmey25.com