ចម្លាក់ព្រះហស្ថព្រះពុទ្ធធំមួយសង់នាសម័យកណ្តាល ត្រូវប្រទះឃើញក្បែរប្រាសាទបាយ័ន
ចម្លាក់ព្រះហស្ថខាងឆ្វេង ព្រះពុទ្ធបដិមាយ៉ាងធំមួយ ត្រូវបានប្រទះឃើញនៅក្នុងព្រៃ ចម្ងាយប្រមាណ ៣០០ម៉ែត្រ ពីប្រាសាទបាយ័ន។ ចម្លាក់ព្រះហស្ថនេះ មានទំហំ០.៩៥ម៉ែត្រ និងកម្រាស់០.២៥ម៉ែត្រ។ ចម្លាក់នេះ ត្រូវបានអ្នកជំនាញសន្និដ្ឋានថា សង់ពីថ្មភក់ និងសាងសង់ឡើងនៅសម័យកណ្តាល។ នេះបើតាមហ្វេសប៊ុករបស់អាជ្ញាធរជាតិអប្សរា។
កាលពីថ្ងៃ៤ ខែកញ្ញាកន្លងទៅ អាជ្ញាធរ បានប្រទះឃើញចម្លាក់ព្រះហស្ថខាងឆ្វេង ព្រះពុទ្ធបដិមា ដែលមានត្រឹមកដៃ និងម្រាមទាំង៥ លាផ្ងាបាតដៃ នៅក្នុងព្រៃចម្ងាយប្រមាណ៣០០ម៉ែត្រ ពីប្រាសាទបាយ័ន។ លោក ឈូក សុម៉ាឡា មន្ត្រីចុះបញ្ជីបេតិកភណ្ឌរូបី នៃនាយកដ្ឋានអភិរក្សប្រាសាទ ក្នុងឧទ្យានអង្គរ និងបុរាណវិទ្យាបង្ការ បានបញ្ជាក់នៅលើទំព័រហ្វេសប៊ុកអាជ្ញាធរជាតិអប្សរាថា ជាចម្លាក់មិនទាន់រួចរាល់នៅឡើយ ព្រោះដោយឃើញមានស្នាមពន្លាក និងមិនទាន់ខាត់រំលីងបានត្រឹមត្រូវ សាងសង់ពីថ្មបាយក្រៀម និងស្ថិតនៅក្នុងសម័យកណ្ដាល។
ក្រុមអ្នកជំនាញសន្និដ្ឋានថាចម្លាក់នេះ គឺជាព្រះហស្ថព្រះពុទ្ធបដិមាពញរោះ ដោយហេតុផលថា ដែលមានព្រះពុទ្ធបដិមាធំៗចំនួន២អង្គ ដែលស្ថិតនៅជុំវិញប្រាសាទបានយ័ន។ ម្យ៉ាងទៀត បើតាមបច្ចេកវិទ្យា LIDAR ក៏បានរកឃើញស្លាកស្នាមទីតាំងមនុស្សរស់នៅជាច្រើននៅក្នុងបរិវេណក្រុងអង្គរធំដែរ ដែលរួមមានសំណង់ខឿនព្រះពុទ្ធសាសនាសង់ពីថ្មភក់ និងថ្មបាយក្រៀមជាច្រើនកន្លែង។
បច្ចុប្បន្ន ចម្លាក់ព្រះហស្ថនេះ ត្រូវបានក្រុមការងារចុះបញ្ជីបេតិកភណ្ឌរូបី នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ យកទៅរក្សាទុក នៅមជ្ឃមណ្ឌលអាជ្ញាធរជាតិអប្សរា ដើម្បីចុះបញ្ជី និងរក្សាទុករង់ចាំការជួសជុលនាពេលខាងមុខ៕
