ស្រុកបន្ទាយស្រី ពង្រឹងកសិ-ទេសចរណ៍ ដើម្បីបង្កើនប្រាក់ចំណូលកសិករ
ក្រៅតែពីសក្ដានុពលទេសចរណ៍សម្បូរបែបដែលមានស្រាប់ រដ្ឋបាលស្រុកបន្ទាយស្រី កំពុងរៀបចំឱ្យមាន កសិ-ទេសចរណ៍ ដើម្បីរួមចំណែកទាក់ទាញភ្ញៀវទេសចរមកលេងកម្សាន្តឱ្យបានកាន់តែច្រើន។ លើសពីនេះ តាមរយៈកសិ-ទេសចរណ៍នេះ នឹងជួយបង្កើនចំណូលបន្ថែមដល់ប្រជាពលរដ្ឋនៅតាមមូលដ្ឋាន ក្រៅតែពីប្រាក់ចំណូលបានមកពីទិន្នផលកសិកម្មតែមួយមុខ។
លោក ឃឹម ហ្វីណង់ អភិបាលស្រុកបន្ទាយស្រី បានប្រាប់ ThmeyThmey25 ដូច្នេះថា៖ «ដោយមើលឃើញពីភាពអំណោយផលលើផ្នែកកសិកម្មនៅតាមបណ្ដាឃុំនីមួយៗ ជាពិសេសឃុំត្បែង ដែលមានការដាំដុះដំណាំហូបផ្លែច្រើនមុខក្រៅតែពីស្រូវ។ រដ្ឋបាលស្រុកបានតម្រង់ទិស និងណែនាំឱ្យពលរដ្ឋ កែប្រែពីការដាំដុះដំណាំហូបផ្លែ សម្រាប់តែផ្គត់ផ្គង់តម្រូវការទីផ្សារ មកជ្រើសរើសពូជ ឬប្រភេទដំណាំទាំងឡាយណា ដែលអាចរៀបចំ កែច្នៃទៅជាគោលដៅកម្សាន្តបែបកសិ-ទេសចរណ៍បាន»។
អភិបាលស្រុកបន្ទាយស្រី បន្តថា បន្ថែមពីលើការដាំដុះដំណាំ ការចិញ្ចឹមសត្វក៏ជាផ្នែកមួយ ដើរតួនាទីយ៉ាងសំខាន់ ក្នុងការពង្រឹងការងារនេះឱ្យវិវត្តទៅមុខ។ ការធ្វើបែបនេះ នឹងអាចផ្ដល់ជម្រើសច្រើនសម្រាប់ភ្ញៀវទេសចរ អំឡុងពេលធ្វើដំណើរមកលងស្រុកបន្ទាយស្រី។
លោក ឃឹម ហ្វីណង់ អះអាងថា៖ «ពលរដ្ឋ៧០ភាគរយ នៅក្នុងស្រុកបន្ទាយស្រី សុទ្ធសឹងតែជាអ្នកប្រកបរបរកសិកម្ម ដូច្នេះប្រសិនបើគម្រោងនេះ ទទួលបានជោគជ័យ នោះនឹងអាចជួយលើកកម្ពស់ជីវភាពប្រជាពលរដ្ឋបានមួយកម្រិត ពិសេសក្នុងអំឡុងពេលកូវីដ-១៩នេះ»។
គួរបញ្ជាក់ថា ស្រុកបន្ទាយស្រី ជាគោលដៅទេសចរណ៍សំខាន់បំផុតមួយនៅខេត្តសៀមរាប។ ស្រុកនេះមានភាពល្បីល្បាញ ដោយសារតែលក្ខណៈពិសេសផ្ទាល់ខ្លួន រួមមាន អត្តសញ្ញាណនៃមុខម្ហូបប្រចាំស្រុក, ការរៀបចំឱ្យមានភូមិគម្រូ, សណ្ដាប់ធ្នាប់របៀបរៀបរយ, គោលដៅកម្សាន្តលេចធ្លោជាច្រើនកន្លែង និងជាពិសេសស្រុកបន្ទាយស្រី គឺជាស្រុកដំបូងគេដែលបានលុបបំបាត់ការបរិភោគ និងជួញដូរសាច់ឆ្កែបានទាំងស្រុង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com