ភ្នំស្រះខ្ចៅ តំបន់រមណីយដ្ឋានធម្មជាតិថ្មី នៃខេត្តកំពង់ធំ
ភ្នំស្រះខ្ចៅ ដែលមានទីតាំងស្ថិតនៅខេត្តកំពង់ធំ ជាប្រភេទភ្នំថ្មភក់ សម្បូរទៅដោយដើមឈើធំៗ ទេសភាពស្រស់ស្អាត ជាពិសេសមានប្រាសាទបុរាណមួយកន្លែងមានឈ្មោះថា«ប្រាសាទស្រះខ្ចៅ» ត្រូវបានសាងសង់ឡើងនៅចំណុចខ្ពស់បំផុតនៃភ្នំនេះ។ ប៉ុន្តែសព្វថ្ងៃ តួប្រាសាទបានបាក់បែកស្ទើរតែទាំងស្រុង នៅសល់តែសសរពេជ្រ ផ្តែរ និងបំណែកដៃរូបចម្លាក់ព្រះឥសូរឬព្រះវិស្ណុតែប៉ុណ្ណោះ។ ខឿនប្រាសាទនេះចែកចេញជាពីរជាន់គឺ ជាន់ក្រោមមានទំហំប្រមាណ៣០ម៉ែត្របួនជ្រុង រីឯជាន់លើវិញមានទំហំ១៥ម៉ែត្របួនជ្រុង។ នេះបើតាមក្រសួងបរិស្ថាន។
បើតាមក្រសួងបរិស្ថាន តំបន់នេះ ត្រូវបានចាត់ទុកថា ជារមណីយដ្ឋានធម្មជាតិ ប្រវត្តិសាស្ត្រ និងវប្បធម៌។ កន្លងមកគេឃើញមានភ្ញៀវទេសចរបរទេសមួយចំនួន បានមកបោះតង់ សម្រាកកម្សាន្ត នៅទីនេះ ខណៈភ្ញៀវទេសចរក្នុងស្រុកនៅមិនទាន់មានច្រើននៅឡើយ។ បច្ចុប្បន្ន ទីតាំងនេះ កំពុងត្រូវបានអភិវឌ្ឍ និងរៀបចំនូវហេដ្ឋារចនាសម្ព័ន្ធចាំបាច់ ដើម្បីបង្កលក្ខណៈងាយស្រួលដល់ភ្ញៀវទេសចរ ចូលមកលេងកម្សាន្តឱ្យបានកាន់តែច្រើន។
គួរបញ្ជាក់ផងដែរថា ខេត្តកំពង់ធំមានតំបន់ទេសចរណ៍ធម្មជាតិ និងវប្បធម៌ធំៗចំនួន៦ រួមមានរមណីយដ្ឋានប្រាសាទសំបូរព្រៃគុក, ប្រាសាទគុកនគរ, ភ្នំសន្ទុក, ស្ទឹងព្រៃប្រស់, បឹងសំរឹទ្ធិ និងរមណីយដ្ឋានស្ទឹងជីនិត៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com