«កោះសំពោច ឬ កោះរាជបុត្រ» ជាកោះតូច តែមានសម្រស់ស្រស់ស្អាតខ្លាំង
កោះសំពោច ឬ កោះរាជបុត្រ ជាកូនកោះតូចមួយនៃឧទ្យានជាតិព្រះសីហនុ«រាម» មានទីតាំងនៅ ឃុំរាម ស្រុកព្រៃនប់ ខេត្តព្រះសីហនុ និងមានចម្ងាយ២៧គីឡូម៉ែត្រពីក្រុងព្រះសីហនុ។ កោះនេះ ត្រូវបានអភិវឌ្ឍដោយក្រុមហ៊ុនឯនជន ដោយរៀបចំទៅជាតំបន់ទេសចរណ៍ ដែលអាចឱ្យភ្ញៀវចូលមកលេងកម្សាន្តបាន។ ដោយឡែក អំឡុងថ្ងៃឈប់សម្រាកកន្លងទៅ មានភ្ញៀវទេសចរច្រើនគួរសម បានមកលេងនៅទីនេះ។ នេះបើតាមមន្ទីរទេសចរណ៍ខេត្តព្រះសីហនុ។
បើតាមមន្ទីរទេសចរណ៍ខេត្ត កោះនេះ មានទេសភាពស្រស់ស្អាត ព្រោះវាមានទំហំតូចច្រឡឹង បើប្រៀបធៀបទៅនឹងបណ្ដាកោះផ្សេងទៀតនៃឧទ្យានជាតិរាម។ លើសពីនេះ លើកោះសម្បូរទៅដោយព្រៃឈើ និងមានទឹកសមុទ្រខៀវស្រងាត់នៅព័ទ្ធជុំវិញ ដែលធ្វើឱ្យកោះនេះកាន់តែមានភាពលេចធ្លោ ហើយអាចទាក់ទាញភ្ញៀវទេសចរមកលេងកម្សាន្តបានច្រើន មិនចាញ់បណ្ដាគោលដៅទេសចរណ៍ដទៃទៀតឡើយ។
ដោយឡែក អំឡុងថ្ងៃឈប់សម្រាកជំនួសថ្ងៃចូលឆ្នាំរយៈពេល៥ថ្ងៃកន្លងមក ខេត្តព្រះសីហនុ ទទួលបានភ្ញៀវទេសចរមកលេងសរុប១១ម៉ឺន៦ពាន់៣៤៦នាក់ ក្នុងនោះភ្ញៀវជាតិមាន១១ម៉ឺន១ពាន់៤៦៨នាក់ ចំណែកឯភ្ញៀវអន្តរជាតិវិញមាន៤,៨៧៨នាក់។
រូបថតពីMarody Noun.
សូមបញ្ជាក់ផងដែរថា ឧទ្យានជាតិព្រះសីហនុ «រាម» ត្រូវបានបង្កើតឡើង នៅថ្ងៃទី០១ ខែវិច្ឆិកា ឆ្នាំ១៩៩៣ ដែលគ្របដណ្តប់លើដែនដីគោក និងដីកោះ ស្ថិតក្នុងភូមិសាស្ត្រឃុំរាម, ឃុំអូរឧកញ៉ាហេង, ឃុំបឹងតាព្រហ្ម, និងឃុំអូរជ្រៅ ស្រុកព្រៃនប់ ខេត្តព្រះសីហនុ៕
រូបថតពីMarody Noun.
