មេភូមិទាំងអស់នៃស្រុកបន្ទាយស្រី ដឹកនាំការប្រមូលសំរាមក្នុងភូមិខ្លួនមួយខែម្តង
ស្រុកបន្ទាយស្រី បានចាប់ផ្តើមយុទ្ធនាការដើរប្រមូលសំរាមនៅតាមទីសាធារណៈ នៅទូទាំងស្រុក ប្រមាណ៣ខែមកហើយ ពោលគឺចាប់តាំងពីខែឧសភា ឆ្នាំ២០២០មកម្ល៉េះ។ លោក ឃឹម ហ្វីណង់ អភិបាលស្រុកបន្ទាយស្រី បញ្ជាក់ប្រាប់Thmeythmey25 ដូច្នេះ។
អភិបាលស្រុកវ័យក្មេងរូបនេះ បញ្ជាក់ទៀតថា យុទ្ធនាការដើរប្រមូលសំរាម គឺត្រូវដឹកនាំដោយមេភូមិនីមួយៗ រៀងរាល់មួយខែម្តង។ លោក ឃឹម ហ្វីណង់ បានប្រាប់ថ្មីៗតាមទូរសព្ទ ពីយន្តការអចិន្ត្រៃយ៍របស់ស្រុកបន្ទាយស្រី យ៉ាងដូច្នេះថា៖«ក្នុងស្រុកបន្ទាយស្រីទាំងមូល មាន៣៦ភូមិ ហើយនៅតាមភូមិនីមួយៗ មានកន្លែងប្រមូលផ្ដុំសំរាមមួយ គ្រប់ភូមិតែម្ដង។ ហើយក្នុងមួយភូមិ មេភូមិ នឹងដឹកនាំចលនាកម្មវិធីបរិស្ថានរៀងរាល់ខែ ជាប្រចាំគ្រប់ភូមិទាំងអស់។ មួយខែ ត្រូវចំណាយពេលមួយថ្ងៃ ធ្វើការងារសំរាមនេះ។ ដើរប្រមូល ដើម្បីកុំឲ្យសំរាមរប៉ាត់រប៉ាយ នៅតាមទីសាធារណៈ»។
លោក ឃឹម ហ្វីណង់ មិនទាន់អាចបញ្ជាក់ទេថា តើការងារដើរប្រមូលសំរាមនេះត្រូវការពេលប៉ុន្មាន តែលោកថាយូរ ឬឆាប់ អាស្រ័យលើអ្នកទេសចរដែលមកកម្សាន្តនៅទីនេះ។ «ការផ្លាស់ប្ដូរឥរិយាបទរបស់ប្រជាពលរដ្ឋ ត្រូវការពេលវេលា អ៊ីចឹងខ្ញុំមិនអាចនិយាយបានថា ពេលណាដែលយើងឈប់រើសសំរាមទេ»។ នេះជាការលើកឡើងរបស់លោក ដោយបន្តថា បញ្ហាប្រឈម គឺអ្នកទេសចរមកកម្សាន្តជាអ្នកបោះចោលសំរាមទាំងនោះ។
_1598341266.jpg)
សំរាមដែលប្រមូលបាន នឹងត្រូវយកទៅបែកចែងតាមប្រភេទសំរាមធម្មតា និងសំរាមអេតចាយ មុននឹងយកទៅដុតនៅឡ នៅស្រុកក្បែរខាង ខណៈឡដុតសំរាមក្នុងស្រុកនេះ នឹងបញ្ចប់ការសាសសង់នៅក្នុងខែកញ្ញាខាងមុខនេះ។ សំរាមមួយផ្នែក ផ្ញើជាមួយអាជ្ញាធរជាតិអប្សរា។ លោក ឃឹម ហ្វីណង់ បញ្ជាក់ថា ស្រុកបន្ទាយស្រី មិនទាន់មានកន្លែងកែច្នៃសំរាម ទៅជារបស់ប្រើប្រាស់ឡើងវិញនោះទេ។
ក្រៅពីយុទ្ធនាការប្រមូលសំរាមតាមទីសាធារណៈ អភិបាលស្រុកវ័យក្មេងរូបនេះ ក៏បានរៀបចំកម្មវិធីបរិស្ថានមួយចំនួនទៀត ដូចជាការដាក់ធុងសំរាមនៅតាមទីសាធារណៈ កម្មវិធីប្រឡងប្រណាំងផ្ទះស្អាត ភូមិស្អាតផងដែរ។ តាមរយៈកម្មវិធីទាំងអស់នេះ លោក ហ្វីណង់ ជឿជាក់ថា បញ្ហាសំរាម នឹងអាចស្ថិតនៅក្នុងដំណាក់កាលគ្រប់គ្រងបាន។ ដោយឡែក ការងារគ្រប់គ្រងសំរាមនៅស្រុករបស់ខ្លួន ដែលបានចាប់ផ្តើមរយៈពេល៣ខែមកហើយនោះ ឃឹម ហ្វីណង់ ទុកឲ្យសាធារណជន ដែលបានទៅដល់ស្រុកបន្ទាយស្រី ជាអ្នកវានៅតម្លៃ។
ជាមួយនឹងការប្តេជ្ញាកែប្រែភូមិសាស្ត្រស្រុកបន្ទាយស្រី ទាំងមូលឲ្យគ្មានសំរាម អភិបាលស្រុករូបនេះ សង្ឃឹមថា យុទ្ធនាការនឹងរីកសាយភាយ និងក្លាយជាគំរូ ទៅដល់ភូមិ ស្រុកនានា ទូទាំងប្រទេស។ លោក ឃឹម ហ្វីណង់ បញ្ជាក់មកកាន់ ThmeyThmey25 ដូច្នេះ៖«ការអនុវត្តលើបញ្ហាបរិស្ថាននេះគឺពិបាក ប៉ុន្តែបើសិនជាយើងគិតថា ពិបាកហើយយើងមិនធ្វើ គឺយើងគ្មានថ្ងៃដោះស្រាយបានទេ។ ខ្ញុំជឿថា ភាពស្អាតចេញពីមនុស្សម្ដងម្នាក់ ផ្ទះម្ដងមួយ ភូមិម្ដងមួយ ឃុំម្ដងមួយ រួចហើយឈានទៅដល់ស្រុកទាំងមូល សង្ឃឹមថាទៅដល់ខេត្ត និងប្រទេសទាំងមូលផងដែរ។ សម្រាប់ស្រុកបន្ទាយស្រី មិនរួញរាទេ គឺយើងមិនគេចពីបញ្ហាទេ ដែលយើងចាប់ផ្ដើមធ្វើវា ទោះមិនបានថ្ងៃនេះ តែថ្ងៃណាមួយយើងនឹងទទួលបាន»។
បើតាមលោក ឃឹម ហ្វីណង់ ក្រោយជោគជ័យលើការងារប្រមូលសំរាមតាមទីសាធារណៈ ស្រុកបន្ទាយស្រីនឹងបន្តធ្វើការងារបរិស្ថាន ដូចជាដាំដើមឈើ សម្អាតទ្រុបព្រៃ និងលុបជង្ហុកតាមដងផ្លូវជាដើម៕
