ខេត្តត្បូងឃ្មុំ ទទួលបានទេសចរជាង១ម៉ឺននាក់ ក្នុងរយៈពេល៤ថ្ងៃ
រយៈពេល៤ថ្ងៃ នៃការឈប់សម្រាកជំនួសឲ្យថ្ងៃចូលឆ្នាំ ចាប់ពីថ្ងៃទី១៧ ដល់ថ្ងៃទី២០ ខែសីហា ឆ្នាំ២០២០ ភ្ញៀវទេសចរសរុបចំនួន ១៥ ៦៩៤នាក់ ហើយក្នុងនោះ មានភ្ញៀវទេសចរអន្តរជាតិត្រឹម១២នាក់ប៉ុណ្ណោះ បានទៅកម្សាន្តនៅខេត្តត្បូងឃ្មុំ។ នេះបើតាមរបាយការណ៍ពីមន្ទីរទេសចរណ៍ខេត្តត្បូងឃ្មុំ។
តាមរបាយការណ៍ដដែល តំបន់ទេសចរណ៍ចំនួន៨កន្លែងដូចជា ទឹកធ្លាក់ហោង ភូមិនេសាទ(មាត់ឃ្មង់) ហ្លួងស្ដេចកន ភូមិអភិវឌ្ឍអន្លង់ជ្រៃ ប្រាសាទព្រះធាតុបាស្រី សួនកម្សាន្តធម្មជាតិទឹកហូអូរក្ដូង តាសែដូងក្រអូប និងចំការឈូករត្ន មានភ្ញៀវទេសចរទៅកម្សាន្តរយៈពេល៤ថ្ងៃនេះ។
រយៈពេល៤ថ្ងៃ នៃការឈប់សម្រាកនេះ ភ្ញៀវទេសចរដែលបានទៅកម្សាន្តនៅទឹកធ្លាក់ហោងមានចំនួន ២០៨០នាក់, ភូមិនេសាទ(មាត់ឃ្មង់) មានចំនួន៤០០នាក់, ហ្លួងព្រះស្ដេចកន មានចំនួន២៩៧នាក់, ភូមិអភិវឌ្ឍអន្ទង់ជ្រៃ មានចំនួន៣២៧០នាក់, ព្រះធាតុបាស្រី មានចំនួន២២៣នាក់, សួនកម្សាន្តធម្មជាតិទឹកហូរអូរក្ដូង មានចំនួន១៨២០នាក់, តាសែដូងក្រអូប មានចំនួន២០១០នាក់ និងចំការឈូករត្នន៍ មានចំនួន៥២៨៣នាក់។ ក្នុងនោះមានភ្ញៀវទេសចរអន្តរជាតិត្រឹម១២នាក់ប៉ុណ្ណោះ បានមកកម្សាន្តនៅរមណីយដ្ឋានហ្លួងស្ដេចកន និងភូមិអភិវឌ្ឍអន្ទង់ជ្រៃ។ នេះបើតាមរបាយការណ៍របស់មន្ទីរទេសចរណ៍ខេត្តត្បូងឃ្មុំ។
របាយការណ៍ដដែលបានបញ្ជាក់ថា អំឡុងពេលឈប់សម្រាកនេះ ខេត្តត្បូងឃ្មុំ បានកើនឡើងភ្ញៀវទេសចរជិត១ពាន់នាក់ក្នុងមួយថ្ងៃ ដោយថ្ងៃទី១ មានភ្ញៀវទេសចរចំនួន២៤៨៣នាក់ ហើយថ្ងៃទី២ មានភ្ញៀវទេសចរចំនួន៣៣៤១នាក់ ថ្ងៃទី៤ មានភ្ញៀវទេសចរចំនួន៤២៩៣នាក់ និងថ្ងៃទី៤ មានភ្ញៀវទេសចរចំនួន៥៥៧៧នាក់៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com