រយៈពេល៥ថ្ងៃ ទេសចរជាង១៨ម៉ឺននាក់មកកម្សាន្តខេត្តសៀមរាប
សៀមរាប៖ រយៈពេល៥ថ្ងៃនៃថ្ងៃឈប់សម្រាក ចាប់ពីថ្ងៃទី១៦ ដល់ថ្ងៃទី២០ សីហា ខេត្តសៀមរាប ទទួលបានទេសចរជាង១៨ម៉ឺននាក់។ យោងតាមរបាយការណ៍របស់មន្ទីរទេសចរណ៍ខេត្តសៀមរាប ក្នុងចំណោមទេសចរជាង១៨ម៉ឺននាក់ មានទេសចរបរទេសចំនួន ១,៨៦៨នាក់។
ប្រធានមន្ទីរទេសចរណ៍ខេត្តសៀមរាប លោក ង៉ូវ សេងកាក់ បានរៀបរាប់បន្ថែមក្នុងរបាយការណ៍របស់ខ្លួនថា រដ្ឋបាលខេត្តសៀមរាបបានរៀបចំកម្មវិធីជាច្រើនដើម្បីស្វាគមន៍ទេសចរអំឡុងថ្ងៃឈប់សម្រាកពេញមួយសប្ដាហ៍នេះ ដែលរួមមានកម្មវិធីសាសនា ស្ដង់ពិព័រណ៍ម្ហូបអាហារ បន្ថែផ្លែឈើ ផ្សារលើទឹក ការប្រណាំងទូក ការប្រកួតមាន់អាំង កម្មវិធីវាយកូនហ្គោល កម្មវិធីជិះកង់ ការបើកដំណើរការឡើងវិញនូវតំបន់មមាញឹកផាប់ស្ទ្រីត។ល។ ក្រៅពីនេះ ភ្ញៀវទេសចរជាច្រើន ក៏បានធ្វើដំណើរទៅកាន់តំបន់ទេសចរណ៍ធម្មជាតិក្នុងខេត្តផងដែរ មានភ្នំគូលែន និងរមណីយដ្ឋានចង្ក្រានរយជាដើម។
ក្នុងកាលៈទេសៈនៃជំងឺកូវីដ១៩នេះ អាជ្ញាធរបានគិតគូរ និងរៀបចំការត្រួតពិនិត្យ ក៏ដូចជាឱ្យទេសចរទាំងអស់ពាក់ម៉ាស់ លាងដៃ និងមានការបំពាក់ឧបករណ៍បាញ់ទឹកកម្ចាស់មេរោគនៅតំបន់រៀបចំកម្មវិធី ឬតំបន់មានមនុស្សច្រើន។ល។ នេះបើតាមការរបាយការណ៍របស់មន្ទីរទេសចរណ៍ខេត្តសៀមរាប៕
