កសិករជោគជ័យ ស៊ឹម សុជាតិ៖ «ថែទាំទុរេនឲ្យបានល្អ ប្រៀបដូចជាការថែទាំប្រពន្ធកូន»
ពោធិ៍សាត់៖ ដំណាំទុរេន ជាដំណាំផ្ដល់នូវប្រាក់ចំណូលខ្ពស់ដល់ប្រជាកសិករ ដែលដាំដុះតាមបច្ចេកទេសត្រឹមត្រូវ។ លោក ស៊ឹម សុជាតិ កសិករដាំទុរេននៅឃុំអូរសោម ស្រុកវាលវែង អះអាងថា ការថែទាំទុរេនឲ្យបានល្អ ប្រៀបដូចជាការថែទាំប្រពន្ធកូន។ បើតាមកសិកររូបនេះ ទុរេនចំនួន ៥៣ដើម ផ្ដល់ផលចំនួន ១២តោន ដែលអាចរកចំណូលបានជិត ៥ម៉ឺនដុល្លារ។
លោក ស៊ឹម សុជាតិ ជាកសិករមួយរូប នៅក្នុងឃុំអូរសោម ស្រុកវាលវែង ខេត្តពោធិ៍សាត់ ដែលដាំដុះដំណាំទុរេន។ កសិកររូបនេះ ក៏ជាគ្រូបច្ចេកទេសកសិកម្មមួយរូប ដែលតែងចែករំលែកចំណេះដឹង និងបទពិសោធន៍នៃការដាំដំណាំទុរេនដល់ប្រជាកសិករ។ តាមរយៈចំណេះដឹង និងការប្រឡូកផ្ទាល់ជាមួយការងារជាកសិករដាំដុះទុរេន បានធ្វើឲ្យលោក ស៊ឹម សុជាតិ ជាកសិករជោគជ័យមួយរូបលើដំណាំទុរេន។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey25 ជាមួយលោក ស៊ឹម សុជាតិ ម្ចាស់ចម្ការទុរេននៅអូរសោម ខេត្តពោធិ៍សាត់ដូចតទៅ៖
បើតាមកសិករ ស៊ឹម សុជាតិ ផ្លែទុរេននៅក្នុងចម្ការរបស់លោក មានទម្ងន់ចាប់ពី ៥-១៩គីឡូក្រាម។ លោក សុជាតិ អះអាងថា ដើម្បីឲ្យទុរេនផ្ដល់ផ្លែល្អ ទាមទារបច្ចេកទេសច្បាស់លាស់ និងត្រូវដឹងពីចរិតរបស់ទុរេន។ «ការថែទាំទុរេន ក៏ដូចជាការថែទាំប្រពន្ធកូនអញ្ចឹង ២៤ម៉ោងនៅលើវា។ មុននឹងយើងឲ្យអ្វីទៅវា ត្រូវមើលវាសិន ថាវាចង់បានអ្វី»។ នេះជាការលើកឡើងរបស់កសិករ ស៊ឹម សុជាតិ។
លោក សុជាតិ ដាំទុរេនអស់រយៈពេល ៨ឆ្នាំមកហើយ។ កសិកររូបនេះ ចង់ពង្រឹងចំណេះជំនាញពីការដាំទុរេននេះ ដល់កសិករដទៃ៖ «សម្រាប់ខ្ញុំផ្ទាល់ ខ្ញុំមានចិត្តចង់ពង្រឹងវិស័យកសិកម្មលើដំណាំទុរេននេះខ្លាំងមែនទែន ដោយសារទុរេនមានទីផ្សារខ្ពស់ និងតម្រូវការមិនគ្រប់គ្រាន់ទៅលើអតិថិជន»។
ទុរេននៅក្នុងចម្ការរបស់លោក ស៊ឹម សុជាតិ គឺប្រើប្រាស់ជីធម្មជាតិ ដែលផលិតដោយខ្លួនឯង។ លោក សុជាតិ ចង់ឲ្យកសិករដាំទុរេនប្រភេទម៉ាន់ថង ប្រសិនបើដាំចង់បានលុយ គឺមានតែទុរេន «ម៉ាន់ថង»ទេ។ សូមបញ្ជាក់ថា បច្ចុប្បន្ន ទុរេននៅតំបន់អូរសោម មានចំនួនជាង១០ម៉ឺនដើម៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com