ហ្វូងសត្វស្លាបជាច្រើនប្រភេទ ហើរកាត់ពីលើផ្ទៃបឹងបង្ហាញសម្រស់របស់ខ្លួនទាក់ទាញ់ភ្ញៀវទេសចរ ឲ្យទៅកម្សាន្តក្នុងសហគមន៍អភិរក្សសត្វស្លាបទួលព័ន្ធតាឡីបឹងស្នេហ៍។ សហគមន៍សត្វស្លាបទួលព័ន្ធតាឡីបឹងស្នេហ៍ ជាតំបន់សក្តានុពលទេសចរណ៍ធម្មជាតិមួយស្ថិតក្នុង ឃុំធាយ ស្រុកបាភ្នំ និងមានចម្ងាយប្រមាណ២០គីឡូម៉ែត្រពីទីរួមខេត្តព្រៃវែង។
អ្នកទេសចរចំណាយត្រឹមតែម្នាក់៣ពាន់រៀល អាចជិះទូកកម្សាន្តនៅជុំវិញបឹង មើលសត្វស្លាបជាច្រើនប្រភេទ ហើររកចំណីនៅលើបឹង និងព្រៃលិចទឹក ដែលមានទំហំជាង៨០ហិកតា។ ទេសចរ ក៏អាចអង្គុយតាមខ្យុសបរិភោគអាហារជួបជុំគ្រួសារ ជាមួយបរិយាកាសជាប់មាត់បឹង ដែលមានព្រៃលិចទឹកយ៉ាងធំល្វឹងល្វើយ ដាច់កន្ទុយភ្នែក។
លោក ថោង ស៊ាប សមាជិកសហគមន៍អភិរក្សសត្វស្លាបទួលព័ទ្ធតាឡី បានប្រាប់ Thmeythmey25 តាមទូរស័ព្ទថា ភ្ញៀវទេសចរក៏អាចទៅលេងនៅតំបន់ទេសចរណ៍ធម្មជាតិមួយនេះ ក្នុងរដូវវស្សាផងដែរ។ ក្រៅពីនៅជិះទូកទស្សនាសត្វស្លាប ទេសចរក៏អាចឡើងលើប៉មដែលខ្ពស់ៗដើម្បីមើលសត្វស្លាបបានដូចគ្នា។ នេះបើតាមលោក ថោង ស៊ាប ដែលបានបន្តទៀតថា ភ្ញៀវទេសចរដែលមកកម្សាន្តនៅតំបន់ទេសចរណ៍បឹងស្នេហ៍ បានថមថយយ៉ាងខ្លាំង នៅក្នុងអំឡុងកូវីដ-១៩នេះ។
«កាលពីមុនជំងឺកូវីដ-១៩មានទេសចរច្រើនដែរ តែតាំងពីមានការប្រកាសរបស់ក្រសួងសុខាភិបាលពីជំងឺកូវីដ-១៩ ភ្ញៀវមិនសូវច្រើនដូចមុនទេ។ កាលមុនមានទេសចរប្រហែល២ពាន់ ទៅ៣ពាន់នាក់ដែរនៅចុងសប្តាហ៍ តែឥឡូវនៅសល់តែប្រហែលប្រហែល១០០ ទៅ២០០នាក់ប៉ុណ្ណោះ»។ នេះជាការរៀបរាប់របស់សមាជិកសហគមន៍អភិរក្សសត្វស្លាបទួលព័ទ្ធតាឡី ជាមួយនឹងការអំពាវនាវឲ្យភ្ញៀវទេសចរ កុំភ្លេចទៅសម្រាកលំហែនៅទីនេះ នៅក្នុងអំឡុងថ្ងៃសម្រាកនេះ។
គួរបញ្ជាក់ថា តំបន់អភិរក្សសត្វស្លាបទួលព័ទ្ធតាឡីបឹងស្នេហ៍ ត្រូវបានបង្កើតឡើង នៅឆ្នាំ២០១១ និងអភិរក្សដោយ អង្គការនារីអភិវឌ្ឍន៍សេដ្ឋកិច្ច និងអនាម័យ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com