អ្នកលក់កូនឈើហូបផ្លែ សឿង តុលា៖ «ដូងក្រអូប និងទុរេន ជាដំណាំហូបផ្លែពេញនិយមសម្រាប់កសិករ»
ខែឧសភា មិថុនា និងកក្កដា ជាខែដែលកូនឈើហូបផ្លែលក់ដាច់ជាងគេ ក្នុងនោះមានឈើហូបផ្លែដូចជា ដូងក្រអូប និងទុរេន លក់ដាច់ជាងគេ។ នេះបើតាម លោក សឿង តុលា អ្នកលក់កូនឈើហូបផ្លែគ្រប់ប្រភេទនៅខេត្តពោធិ៍សាត់ប្រាប់សារព័ត៌មាន ThmeyThmey25 តាមទូរសព្ទនៅថ្ងៃទី ១១ ខែសីហា ឆ្នាំ២០២០។
រយៈពេល១០ឆ្នាំហើយ ដែលលោក សឿង តុលា ចាប់យករបរលក់កូនឈើហូបផ្លែនាំចូលពីប្រទេសថៃ។ អ្នកលក់កូនឈើហូបផ្លែ សឿង តុលា លើកឡើងថា៖ «សម្រាប់ខែដែលខ្ញុំលក់ដាច់ជាងគេមានខែ៥,៦,៧ និងមានអ្នកបញ្ជាទិញស្ទើរគ្រប់ខេត្ត ដែលមានចំនួនច្រើនពី ៣ ទៅ ៤ ពាន់ដើម។ ប៉ុន្តែសម្រាប់ឆ្នាំនេះ ការបញ្ជាទិញកូនឈើហូបផ្លែ ពីកសិករមានការថយចុះ ជាងឆ្នាំមុនៗ»។
បើតាមលោក សឿង តុលា ការបញ្ជទិញកូនឈើហូបផ្លែមានការថយចុះ ប៉ុន្តែអ្វីដែលប្រជាកសិករមួយចំនួននាពេលបច្ចុប្បន្ននិយមដាំគឺដូងក្រអូប និងផ្លែទុរេន។ លោក សឿង តុលា បន្តថា ភាគច្រើននៃកសិករដែលទិញកូនឈើក្នុងបរិមាណច្រើនអាចដាំលើផ្ទៃដីពី ១០-២០ហិកតា។
លោក តុលា បន្តថា៖ «តាមការសង្កេតនៅស្ទើរគ្រប់ខេត្តដែលខ្ញុំបានទៅដល់ ដីភាគច្រើនទុកទំនេរចោល មិនមានដាំដំណាំអ្វីនោះទេ មួយវិញទៀត បច្ចុប្បន្នកសិករភាគច្រើនងាកមកចាប់អារម្មណ៍លើការចិញ្ចឹមត្រី កង្កែប កន្ធាយជាដើម»។
សូមបញ្ជាក់ថា កូនទុរេនមានកម្ពស់ជាង ១ម៉ែត្រ លោក តុលា លក់បានក្នុងតម្លៃប្រមាណ ៥ម៉ឺនរៀល។ ចំណែកដូងក្រអូបមួយដើម តម្លៃ ១ម៉ឺន៥ពាន់រៀល៕
