កន្លែងស្នាក់នៅក្នុងតំបន់ទេសចរណ៍កោះស្ដេច ត្រូវបានភ្ញៀវទេសចរកក់ស្ទើរគ្មានសល់
កោះស្ដេចជាតំបន់ទេសចរណ៍ដ៏មានសក្តានុពលមួយក្នុងខេត្តកោះកុង ដែលមានភ្ញៀវទេសចរទៅកម្សាន្តជាច្រើននៅពេលចុងសប្តាហ៍ និងថ្ងៃឈប់សម្រាក។ មូលហេតុនេះហើយទើបធ្វើឲ្យផ្ទះសំណាក់ក្នុងតំបន់ទេសចរណ៍កោះស្ដេចត្រូវបានភ្ញៀវទេសចរកក់ទៅកម្សាន្តសម្រាប់ថ្ងៃឈប់សម្រាកជំនួសថ្ងៃចូលឆ្នាំខ្មែរ ស្ទើរតែពេញទៅហើយ។ គិតត្រឹមថ្ងៃទី ១៣ ខែកក្កដា ឆ្នាំ២០២០នេះ។
ម្ចាស់ផ្ទះស្នាក់ កោះស្ដេច ហូមស្ទេរ ក្នុងរមណីយដ្ឋានទេសចរណ៍កោះស្ដេច បានប្រាប់សារព័ត៌មានថ្មីៗ២៥ថា ផ្ទះសំណាក់របស់លោកត្រូវបានភ្ញៀវទេសចរកក់សម្រាប់ថ្ងៃឈប់សម្រាកខាងមុខនេះពេញអស់ហើយ។ «សម្រាប់ថ្ងៃឈប់សម្រាកខាងមុខនេះ ខាងផ្ទះស្នាក់របស់ខ្ញុំភ្ញៀវកក់ពេញហើយប៉ុន្តែកន្លែងផ្សេងខ្ញុំមិនសូវដឹងដែរ ហើយភ្ញៀវទេសចរដែលមកកម្សាន្តភាគច្រើនជាភ្ញៀវTour (ភ្ញៀវទេសចរដែលដើរកម្សាន្តតាមរយៈក្រុមហ៊ុនរៀបចំដំណើរកម្សាន្តទេសចរណ៍)។ ភ្ញៀវសម្រុកមកច្រើនខ្លាំងអ៊ីចឹងបើភ្ញៀវទេសចរមិនព្យាយាមកក់កន្លែងស្នាក់នៅទុកទេ ខ្លាចតែគ្មានកន្លែងគេង»។
ចំណែកផ្ទះសំណាក់ មានលាភ ដែលនៅលើកោះស្ដេចដូចគ្នានេះក៏បានប្រាប់សារព័ត៌មាន ថ្មីៗ២៥ ថា ផ្ទះសំណាក់របស់គាត់ត្រូវបានភ្ញៀវទេសចរកក់ពេញអស់ដែរហើយសម្រាប់ថ្ងៃ១៦ និង១៧ ខែសីហា ឆ្នាំ២០២០ខាងមុខនេះ។ ផ្ទះសំណាក់របស់គាត់ត្រូវបានភ្ញៀវកក់ទុកជាង១ខែមុនមកម្លេះ។
រូបភាពពីទំព័រហ្វេសប៊ុកកោះស្ដេច
សម្រាប់ផ្ទះសំណាក់ កោះស្ដេចហែម ស៊ីធី វិញមានភ្ញៀវទេសចរកក់បានត្រឹម៥០ភាគរយប៉ុណ្ណោះ។ ម្ចាស់ផ្ទះសំណាក់មួយនេះបានរៀបរាប់ថា មូលហេតុដែលផ្ទះសំណាក់របស់លោកមានភ្ញៀវតិចព្រោះ ផ្ទះរបស់លោកមិនមានបន្ទប់គ្រែ២ ហើយភ្ញៀវដែលទំនាក់ទំនងកក់ភាគច្រើនរកតែបន្ទប់គ្រែ២ប៉ុណ្ណោះ។
សម្រាប់អ្នកទេសចរដែលចង់ទៅកម្សាន្តនៅកោះស្ដេចគួរកក់កន្លែងស្នាក់នៅជាមុន ព្រោះកោះស្ដេចជាតំបន់ទេសចរណ៍ដែលមានសក្តានុពលខ្លាំងមួយក្នុងខេត្តកោះកុង។ កោះស្ដេចទាក់ទាញភ្ញៀវទេសចរដោយសារ សក្តានុពលទេសចរណ៍ធម្មជាតិ ដែលមានឆ្នេរខ្សាច់សក្បុស ទឹកសមុទ្រថ្លាឆ្វង់ដូចកញ្ចក់ ព័ទ្ធជុំវិញដោយកោះផ្សេងៗ អមជាមួយព្រៃធម្មជាតិជាច្រើនទៀត។ ភ្ញៀវទេសចរចង់ទៅកម្សាន្តនៅកោះស្ដេច មានទីតាំងស្ថិតនៅ ភូមិកោះស្ដេច ឃុំកោះស្ដេច ស្រុកគិរីសាគរ ខេត្តកោះកុង មានចម្ងាយជាង ១៦០គីឡូម៉ែត្រពីទីរួមខេត្តកោះកុង៕
រូបភាពពីទំព័រហ្វេសប៊ុកកោះស្ដេច
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com