ស្រុកបន្ទាយស្រី ត្រៀមខ្លួនរួចជាស្រេច ទទួលភ្ញៀវទេសចរក្នុងថ្ងៃឈប់សម្រាកខាងមុខ
ភ្នំពេញ៖ ក្នុងឱកាសឈប់សម្រាកជំនួសថ្ងៃចូលឆ្នាំ ចាប់ពីថ្ងៃទី១៧-២១ ខែសីហាខាងមុខនេះរដ្ឋបាលស្រុកបន្ទាយស្រី ខេត្តសៀមរាប បានត្រៀមខ្លួនរួចជាស្រេចសម្រាប់ទទួលភ្ញៀវទេសចរជាតិ និងអន្តរជាតិ ដែលគ្រោងមកលេងកម្សាន្ត។
លោក ឃឹម ហ្វីណង់ អភិបាលស្រុកបន្ទាយស្រី បានប្រាប់សារព័ត៌មានថ្មីៗ២៥រាជធានី-ខេត្ត តាមទូរស័ព្ទថា៖ «រដ្ឋបាលស្រុក បានរៀបចំនូវកម្មវិធីសម្បូរបែប សម្រាប់ត្រៀមទទួលភ្ញៀវទេសចរ ដែលមានបំណងមកកម្សាន្តនៅទីនេះ ដើម្បីឱ្យពួកគាត់ទទួលបាននូវបទពិសោធថ្មីប្លែក និងអារម្មណ៍សប្បាយរីករាយ»។
លោក ឃឹម ហ្វីណង់ បន្តថា រដ្ឋបាលស្រុកបន្ទាយស្រី បានយកទុកដាក់ខ្ពស់ ចំពោះសុវត្ថិភាពភ្ញៀវទេសចរ ជាពិសេសនៅក្នុងបរិបទកូវីដ-១៩នេះ ដោយនឹងអនុវត្តទៅតាមសេចក្ដីណែនាំរបស់ក្រសួងសុខាភិបាលឱ្យបានហ្មត់ចត់។ បើតាមអភិបាលស្រុករូបនេះ ក្រុមការងារ និងមន្ត្រីមូលដ្ឋាន នៅតែបន្តចុះណែនាំដល់ប្រជាពលរដ្ឋ ជាពិសេសប្រតិបត្តិករណ៍ទេសចរណ៍ទាំងអស់ ឱ្យបង្កើនការប្រុងប្រយ័ត្ន និងត្រៀមលក្ខណៈសម្បត្តិឱ្យបានរួចរាល់នៅពេលមានភ្ញៀវទេសចរមកលេងច្រើន។
រូបភាពពីហ្វេសប៊ុកលោក ឃឹម ហ្វីណង់
«នៅក្នុងឱកាសឈប់សម្រាក៥ថ្ងៃនេះ ខ្ញុំសង្ឃឹមថា ភ្ញៀវទេសចរចន្លោះពី៤ម៉ឺនទៅ៥ម៉ឺននាក់ ជាពិសេសភ្ញៀវក្នុងស្រុក នឹងមកលេងនៅស្រុកបន្ទាយស្រី»។ នេះបើតាមលោក អភិបាលស្រុកបន្ទាយស្រី។ ស្រុកបន្ទាយស្រីមានតំបន់គោលដៅទេសចរណ៍ច្រើនកន្លែងរួមមាន ប្រាសាទបន្ទាយស្រី រមណីយដ្ឋានធម្មជាតិភ្នំគូលែន បឹងឈូក និងសួនផ្កាចម្រុះដែលមានពណ៌ចម្រុះគ្នាយ៉ាងស្រស់ស្អាត៕
រូបភាពពីហ្វេសប៊ុកលោក ឃឹម ហ្វីណង់
