កាលពីខែកក្កដា កែបទទួលបានភ្ញៀវទេសចរជាង១០ម៉ឺននាក់
ភ្នំពេញ៖ សក្តានុពលទេសចរណ៍ធម្មជាតិខេត្តកែបបានទាក់ទាញភ្ញៀវទេសចរជាតិ និងអន្តរជាតិ ជាង១០ម៉ឺននាក់កាលពីខែកក្កដា ឆ្នាំ២០២០។ ទន្ទឹមនឹងការទទួលបានភ្ញៀវទេសចរច្រើននេះ មន្ទីរទេសចរណ៍ខេត្តកែប កំពុងពង្រឹងសេវាកម្មទេសចរណ៍ និងផ្នែកបរិស្ថានដើម្បីទាក់ទាញភ្ញៀវទេសចរបន្ថែមទៀត ក្នុងថ្ងៃឈប់សម្រាកខាងមុខ។
លោក សោម ចិន្តា ប្រធានមន្ទីរទេសចរណ៍ខេត្តកែប បានប្រាប់ ThmeyThmey25 តាមទូរសព្ទថា ខេត្តតំបន់ឆ្នេរមួយនេះ អាចទទួលបានភ្ញៀវទេសចរជាង១០ម៉ឺននាក់ ដោយសារសក្តានុពលទេសចរណ៍ធម្មជាតិ ឆ្នេរក្សាច់ តំបន់កសិរទេសចរណ៍ ឧទ្យានជាតិកែប និងគ្រឿងសមុទ្រដែលមានរសជាតិឆ្ញាញ់។
«ខេត្តកែបជាគោលដៅទេសចរណ៍មួយដែលពឹងផ្អែកទៅលើសក្តានុពលផ្នែកធនធានធម្មជាតិ ដែលជាគោលដៅទេសចរណ៍ប្រណីតកម្រិតខ្ពស់។ ភ្ញៀវមកលេងរីករាយជាមួយនឹងតំបន់ឆ្នេរខ្សាច់ ទាំងឆ្នេរលើគោកនិងឆ្នេរនៅកោះ ដូចជាកោះទន្សាយដែលមានឆ្នេរក្សាច់ស្អាត។ មួយវិញធនធានធម្មជាតិឧទ្យានកែបដែលស្ថិតនៅកណ្ដាលនៃបេះដូងទីក្រុងកែបតែម្ដង។ ជាពិសេសភ្ញៀវទេសចរដែលទៅលេងខេត្តកែបអាចជិះទូកកម្សាន្ត មើលជីវចម្រុះក្រោមបាតសមុទ្រដូចជាផ្កាថ្មនិងស្ទូចត្រី។ តំបន់ភ្នំវល្លិជាតំបន់អេកូទេសចរណ៍មួយទាក់ទាញ សម្បូរដោយដំណាំដែលជាកសិរទេសចរណ៍ ដូចជាម្រេច និងទុរេន»។
ក្រៅពីតំបន់សក្តានុពលទេសចរណ៍ធម្មជាតិទាំងអស់នេះហើយ គ្រឿងសមុទ្រខេត្តកែបក៏ជាផ្នែកមួយទាក់ទាញទេសចរផងដែរ។ ប្រធានមន្ទីរទេសចរខេត្តបានលើកឡើងថា ក្ដាមសមុទ្រនៅខេត្តកែប មានរស់ជាតិឆ្ងាញ់ និងមានភាពល្បីល្បាញ។ ទេសចរដែលទៅលេងខេត្តកែបអាចសម្រាកនិងបរិភោគអាហារសមុទ្រយ៉ាងឆ្ងាញ់ក្នុងខេត្តកែបផងដែរ។
លោកបានបន្ថែមទៀតថា ទីក្រុងកែបជាទីក្រុងមួយដែលមានសម្រស់ស្រស់ស្អាត និងទទួលបានជ័យលាភីជាច្រើនដូចជាជ័យលាភីផ្ការំដួល៣ទង ជ័យលាភីនិរន្តរភាពបរិស្ថានដែលសម្ដៅទៅលើ ទឹកស្អាត ដីស្អាត និងខ្យល់ស្អាត។
បើតាម លោក សោម ចិន្តា ខេត្តកំពុងត្រៀមខ្លួនដើម្បីទាក់ទាញភ្ញៀវទេសចរណ៍បន្ថែមទៀតក្នុងថ្ងៃឈប់សម្រាកជំនួសថ្ងៃចូលឆ្នាំចាប់ពីថ្ងៃទី១៧ដល់២១ ខែសីហា ឆ្នាំ២០២០។ «យើងបានត្រៀមទទួលទេសចរហើយ ដោយទី១យើងបានសហការ ពង្រឹងផ្នែកសន្តិសុខ បញ្ហាចំណតរថយន្ត ទី២យើងបានពង្រឹងយុទ្ធនាការបិរស្ថាន យើងនិងបំពាក់ធុងសម្រាមបន្ថែម ហើយទី៣ ខេត្តបានរៀបចំកែលម្អភ្លើងអគ្គីសនី បំពាក់អំពូលថ្មីៗតាមដងផ្លូវក៏ដូចតាមសួនច្បារ។ ទី៤ យើងបានចុះពង្រឹង ពិនិត្យណែនាំអំពីបញ្ហាម្ហូបអាហារអនាម័យ តម្លៃនិងជញ្ជីងត្រឹមត្រូវ។ និងចុងក្រោយយើងបានចុះណែនាំដល់អាជីវករ ពីវិធានសុវត្ថិភាពដើម្បីការពារនិងបង្ការជំងឺកូវីដ-១៩»។
តាមរបាយការណ៍ចំនួនភ្ញៀវទេសចរក្នុងខែកក្កដា របស់ក្រសួងទេសចរណ៍កាលពីថ្ងៃទី ៦ខែសីហាឆ្នាំ២០២០ ខេត្តកែបជាខេត្តដែលទទួលបានភ្ញៀវទេសចរច្រើនជាងគេលំដាប់ទី២ ដោយមានចំនួនភ្ញៀវទេសចរជាតិ និងអន្តរជាតិទៅកម្សាន្តរហូតដល់ ១១៧ ២៦៩នាក់ និងខេត្តកំពតទទួលបានភ្ញៀវទេសចរលំដាប់លេខ១ គឺមានទេសចរសរុប ១៤៦ ៦៤៣នាក់៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com