កសិករ ហ៊ិម លីហៀង ចែករំលែកបច្ចេកទេសចិញ្ចឹមកន្ធាយក្នុងអាង
លោក ហ៊ិម លីហៀង ជាកសិករចិញ្ចឹមកន្ធាយដ៏ជោគជ័យម្នាក់ និងជាតំណាងកសិដ្ឋានគ្រួសារកន្ធាយ នៅស្រុកពួក ខេត្តសៀមរាប។ រយៈពេល២ឆ្នាំហើយ ដែលលោកប្រកបរបរចិញ្ចឹមកន្ធាយនេះ។ បច្ចុប្បន្នកសិដ្ឋាននេះ មានមេកន្ធាយពូជប្រមាណ ២ ៥០០ក្បាល និងកូនកន្ធាយប្រមាណ ៣ពាន់ក្បាល ដែលកន្ធាយមួយគីឡូក្រាមអាចលក់បានតម្លៃ ១១- ១៣ដុល្លារ ហើយកូនកន្ធាយ ១ក្បាលលក់បានតម្លៃ ១ដុល្លារ។ កសិដ្ឋានគ្រួសារកន្ធាយ អាចទទួលបានចំណូលប្រមាណ ៥ពាន់ដុល្លារ ក្នុងមួយខែពីការលក់កន្ធាយនេះ។ លោក ហ៊ិម លីហៀង បានចែករំលែកគន្លឹះចិញ្ចឹមកន្ធាយ ជាមួយសារព័ត៌មាន Thmeythmey25។
លោក ហ៊ិម លីហៀង បានចំណាយពេល៣ឆ្នាំហើយ ចិញ្ចឹមកន្ធាយក្នុងអាងស៊ីម៉ងត៍។ កសិករវ័យមានវ័យ២៧ឆ្នាំរូបនេះ ក៏ជាតំណាងកសិដ្ឋានគ្រួសារកន្ធាយ នៅក្នុងភូមិប្រាសាទ ឃុំសំរោងយា ស្រុកពួក ខេត្តសៀមរាប។
បើតាម លោក ហ៊ិម លីហៀង ការជ្រើសរើសពូជ ការផ្តល់ចំណី និងការរៀបចំអាងចិញ្ចឹម គឺជាចំណុចសំខាន់សម្រាប់កសិករ ដើម្បីទទួលបានផលខ្ពស់ពីការចិញ្ចឹមកន្ធាយរបស់ខ្លួន។ លោក លីហៀង រៀបរាប់ប្រាប់ Thmeythmey25 ថាខែកុម្ភៈ ដល់ខែឧសភា គឺជាពេលវេលាល្អ សម្រាប់ការដាក់ចិញ្ចឹមកន្ធាយ។ ទន្ទឹមនឹងនេះ កសិករត្រូវជ្រើសរើសពូជកូនកន្ធាយដោយប្រុងប្រយ័ត្ន ដោយកូនកន្ធាយត្រូវតែមានសុខភាពល្អ រឹងមាំ និងមានទម្ងន់ពី៥០-២០០ក្រាម។
បន្ទាប់ពីជ្រើសរើសកូនកន្ធាយបានល្អៗហើយ កសិករ ជាទូទៅ គេត្រូវរៀបចំអាងស៊ីម៉ង ត៍ឬជីកស្រះ យ៉ាងហោចណាស់ ទំហំ ៥ម៉ែត្រការ៉េ និងមានជម្រៅពី ១ ម៉ែត្រ ទៅ ១,៥ម៉ែត្រ ដែលអាចដាក់កន្ធាយច្រើនបំផុត ២០០កូន ដើម្បីឲ្យកន្ធាយងាយស្រួលរស់នៅ។ គេក៏អាចរៀបចំអាងចិញ្ចឹមកន្ធាយតាមតម្រូវការជាក់ស្តែង ហើយបរិមាណកូនកន្ធាយ គឺអាស្រ័យលើទំហំអាងនោះ។
ចំណែកនៅបាតអាង ឬស្រះ ត្រូវដាក់ដីខ្សាច់កម្រាស់ ១ទៅ ២តឹក និងបញ្ចូលទឹកឲ្យពេញស្រះ។ បន្ទាប់មកបាចកំបោរប្រមាណ ១គីឡូទុកចោលប្រហែល ៣ អាទិត្យ សឹមបញ្ចូលទឹកបំពេញ មុននឹងដាក់ថ្នាំធ្វើឲ្យទឹកស្អាត ឬអាចត្រាំជាមួយដើមចេក ចំនួន ៣ អាទិត្យទៀត ទើបអាចដាក់កូនកន្ធាយចិញ្ចឹមបាន។ រីឯនៅមាត់អាំង ឬស្រះ ត្រូវក្របស័ង្កសី ឬប្រើសំណាញ់ព័ទ្ធជុំវិញ ដើម្បីកុំឲ្យកន្ធាយវាឡើង ហើយគេអាចដាំត្រកួន កំប្លោក ចកជាដើម ដើម្បីជាម្លប់ដល់កន្ធាយ។ សូមបញ្ជាក់ថា ទីតាំងអាង ឬស្រះចិញ្ចឹមត្រូវមានទីតាំងជិតផ្ទះ និងស្ងប់ស្ងាត់ល្អ ដើមម្បីងាយស្រួលក្នុងការថែទាំ។
ជាទូទៅ កន្ធាយដែលមានតម្រូវការទីផ្សារគឺមានទម្ងន់កន្លះគីឡូក្រាម។ ដើម្បីបានកន្ធាយដែលមានកន្ធាយចាប់ពីកន្លះគីឡូក្រាមឡើង គឺត្រូវចំណាយពេលចិញ្ចឹម ពី ៧ ខែ ទៅ ៩ ខែ។ ប៉ុន្តែបើចិញ្ចឹមទុកធ្វើពូជ គឺត្រូវចិញ្ចឹមចាប់ពី១ឆ្នាំឡើងទៅ។
ដើម្បីឲ្យកន្ធាយធំធាត់ល្អ គេត្រូវផ្តល់ចំណីឲ្យវាមួយថ្ងៃ ២ដង ហើយចំណីរបស់កន្ធាយ គឺមានទាំង
ចំណីឧស្សាហកម្មដែលកែច្នៃពីក្រុមហ៊ុន និងចំណីធម្មជាតិ ដែលមានដូចជាសាច់ត្រី,កូនត្រី,ឬដំឡូងជ្វា។ ប៉ុន្តែសម្រាប់ចំណីកូនកន្ធាយ ដែលទើបដាក់ក្នុងអាងដំបូង ត្រូវស្ងោរដំឡូងជ្វាឲ្យផុយល្មម កិនឲ្យបែកតូចៗ ឬសាច់ត្រីកិន យកទៅចាក់លើក្ដាមាត់ស្រះឲ្យវាស៊ី រហូតបានមួយខែទើបអាចចិញ្ច្រាំដំឡូងឆៅល្អិតៗ ឲ្យវាស៊ីបាន៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com