កូនឈើ៤ពាន់ដើមត្រូវបានដាំជាលើកទី៣ ក្នុងខេត្តសៀមរាប
កាលពីថ្ងៃទី៣០ ខែកក្កដា ឆ្នាំ២០២០ មន្ទីបរិស្ថានខេត្តសៀមរាបបានដាំកូនឈើចម្រុះចំនួន ៤ពាន់ដើម លើផ្ទៃដីជាង ៣ហិចតា នៅក្នុងឧទ្យានជាតិព្រះជ័យវរ្ម័ន-នរោត្តម " ភ្នំគូលែន" ខាងជើងស្ទឹងធំ តំបន់ព្រះអង្គធំ ឃុំខ្នងភ្នំ ស្រុកស្វាយលើ ខេត្តសៀមរាប ដោយមានការគាំទ្រពីគម្រោងមូលនិធិភាពជាដៃគូកាបូនព្រៃឈើរបស់អង្គការ UNDP គម្រោងស្តារតំបន់ទេសភាពព្រៃឈើឡើងវិញរបស់អង្គការ FAO និងអាជ្ញាធរជាតិអប្សរា មន្ទីរបរិស្ថានខេត្តសៀមរាប។
បើតាមលោក ស៊ុន គង់ ប្រធានមន្ទីរបរិស្ថានខេត្តសៀមរាប ក្រសួងបរិស្ថានព្រឹត្តិការណ៍ថ្ងៃនេះ រៀបចំជាលើកទី៣ ហើយនៅឆ្នាំ២០២០ នេះ។ លោកបន្ថែមថាការដាំកូនឈើជាថ្ងៃនេះ ដើម្បីស្តារគម្របបៃតង និងគម្របព្រៃឈើឡើងវិញនៅក្នុងក្នុងឧទ្យានជាតិព្រះជ័យវរ្ម័ន-នរោត្តម។
ការដាំកូនឈើឡើងវិញនេះពិតជាមានសារៈប្រយោជន៍ សម្រាប់បំផុសស្មារតីប្រជាពលរដ្ឋយើងឲ្យចេះស្រឡាញ់ព្រៃឈើ និងចូលរួមដាំដើមឈើឡើងវិញ និងចូលរួមទប់ស្កាត់ការប្រែប្រួលអាកាសធាតុ។ ក្រសួងបរិស្ថានបាននិងកំពុងការពារ ទប់ស្កាត់ និងអនុវត្តវិធានការណ៍នានា ដើម្បីទប់ស្កាត់បទល្មើសធនធានធម្មជាតិ និងកាប់ទន្ទ្រានដីខុសច្បាប់ ក៏ដូចជាជំរុញការដាំស្តារព្រៃឈើឡើងវិញ និងរៀបចំឱ្យមានអាងស្តុកទឹកនៅតាមតំបន់សំខាន់ៗ ដើម្បីឱ្យប្រព័ន្ធអេកូឡូស៊ីនៅលើភ្នំគូលែនមានភាពល្អប្រសើរឡើងវិញ ជាពិសេសធានាបាននូវនិរន្តរភាពទឹកសម្រាប់តំបន់សៀមរាបអង្គរ។ នេះបើតាមលោក សៅ សុភាព រដ្ឋលេខាធិការក្រសួងបរិស្ថាន។
សូមបញ្ជាក់ថានេះជាលើកទី៣ ហើយដែលមន្ទីបរិស្ថានរៀបចំកម្មវិធីដាំកូនឈើនេះ ដោយពីរលើកដំបូងបានដាំកូនឈើចម្រុះចំនួន ៥ ៦០០ដើមនៅលើខ្នងភ្នំគូលែន និងលើកទី៣ នេះកូនឈើចម្រុះចំនួន ៤ ០០០ដើមដាំនៅក្នុងឧទ្យានជាតិព្រះជ័យវរ្ម័ន-នរោត្តម៕
