កសិករនៅស្រុកគងពិសី រំពឹងជោគជ័យលើការចិញ្ចឹមបង្កងធម្មជាតិជាលើកដំបូង
លោក ជា អឿន ជាកសិករ រស់នៅភូមិត្រាំរនាប ឃុំអង្គពពេល ស្រុកគងពិសី ខេត្តកំពង់ស្ពឺ កំពុង ចិញ្ចឹមបង្កងធម្មជាតិសាកល្បង ជាង៧ម៉ឺនក្បាល ដែលមានអាងចិញ្ចឹមចំនួន៣។ កសិកររូបនេះ ជឿថាការចិញ្ចឹមបង្កងរបស់ខ្លួន នឹងទទួលបានជោគជ័យ ដោយសារតែលោកទទួលចំណេះដឹងយ៉ាងច្រើនពីបច្ចេកទេសចិញ្ចឹម មុនចាប់ផ្តើមការងារនេះ។
លោក ចែម ភឺនរីមវុទ្ធី អភិបាលស្រុកគងពិសី បានចុះពិនិត្យទីតាំងការចិញ្ចឹមបង្កងធម្មជាតិលក្ខណៈគ្រួសារនេះ កាលពីពេលថ្មីៗនេះ។ នេះបើតាមរដ្ឋបាលស្រុកគងពិសី ចុះផ្សាយនៅថ្ងៃទី ២៨ ខែកក្កដា ឆ្នាំ២០២០។
នាយរងការិយាល័យស្រុកគងពិសី បានប្រាប់សារព័ត៌មានThmeyThmey25 តាមទូរសព្ទថា អភិបាលស្រុកគងពិសី បានជំរុញឲ្រពលរដ្ឋផ្សេងទៀត បង្កើនការចិញ្ចឹមបង្កងផងដែរ ហើយស្រុក អាចជួយចងក្រងសហគមន៍កសិកម្ម ដូចជាសហគមន៍បន្លែ និងការចិញ្ចឹមសត្វដែរ ដើម្បីផ្ដល់ដើមទុន បង្រៀនពីបច្ចេកទេសចិញ្ចឹមបង្កងដល់កសិករ រួមទាំងការរកទីផ្សារផងដែរ។
បើតាមរបាយការណ៍កសិកម្មខេត្តកំពង់ស្ពឺ លើវិស័យវារីវប្បកម្ម ខេត្តមានសហគមន៍ស្រះជម្រកត្រីធម្មជាតិចំនួន ៧៣កន្លែង និងបឹងធម្មជាតិចំនួន ៦កន្លែង ស្ថានីយ៍ផលិតកូនត្រីពូជចំនួន ៣កន្លែង បានដំណើរការផលិតកូនត្រីពូជ ៧ប្រភេទ (ឆ្ពិន ទីឡាព្យា កាបឥណ្ឌា កាបសាមញ្ញ កាបស អណ្តែង និងប្រា) សរុបចំនួន ៦១៣.០០០ក្បាល ក្នុងនោះបានលក់កូនត្រីពូជជូនកសិករចិញ្ចឹមចំនួន ១៦២ គ្រួសារ សរុបចំនួន ១៤៦.៥៥០ក្បាល៕
