សាលាផ្អាកដោយសារកូវីដ-១៩! និស្សិតកសិកម្មឆ្នាំទី៣ សុខណុច យកពេលទៅចិញ្ចឹម និងភ្ញាស់កូនកង្កែបផ្គត់ផ្គង់លើទីផ្សារ
កញ្ញា កន សុខណុច ជានិស្សិតឆ្នាំទី៣ សិក្សាជំនាញវិទ្យាសាស្ត្រជលផល នៃវិទ្យាស្ថានជាតិកសិកម្មកំពង់ចាម បានឆ្លៀតពេលទំនេរពីការសិក្សាដែលសាលាបានផ្អាកដោយសារកូវីដ-១៩ ទៅអនុវត្តការចិញ្ចឹម និងបង្កាត់ភ្ញាស់កូនកង្កែបរហូតទទួលបានជោគជ័យ។ និស្សិតស្រីវ័យ ២២ឆ្នាំរូបនេះ អាចរកចំណូលបានប្រមាណ ៥០០ដុល្លារក្នុងមួយខែពីការលក់កូនកង្កែប។
ជាកូនទី៥ នៅក្នុងគ្រួសារដែលមានបងប្អូន ៦នាក់ កញ្ញា កន សុខណុច បានយកពេលទំនេរទៅអនុវត្តការចិញ្ចឹម និងបង្កាត់ភ្ញាស់កង្កែប នៅស្រុកកំណើតនាភូមិអូយ៉េះ ឃុំស្រែសង្គម ស្រុកកោះញែក ខេត្តមណ្ឌលគិរី។ យុវតីវ័យក្មេងរូបនេះ ប្រាប់សារព័ត៌មាន ThmeyThmey25 រាជធានី-ខេត្ត តាមទូរសព្ទថា៖ «ខ្ញុំបានចាប់ផ្ដើម បង្កាត់និងភ្ញាស់កង្កែបដំបូងដោយចំណាយប្រាក់ចំនួន ៥០០ដុល្លារ ជាថវិកាផ្ដល់ដោយឪពុកម្ដាយរបស់ខ្ញុំ ហើយបច្ចុប្បន្នខ្ញុំមានដើមទុនកើនដល់ ៨ លានរៀល»។
រូបភាពពីហ្វេសប៊ុកលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ
បើតាមនិស្សិតឆ្នាំទី៣ កន សុខណុច ការចាប់ផ្ដើមលក់កូនកង្កែបលើកដំបូងនាងអាចលក់បាន ១ម៉ឺនក្បាល។ កញ្ញា កន សុខណុច បន្តថា៖ «បច្ចុប្បន្ន ខ្ញុំអាចលក់កង្កែបរៀងរាល់ ៤-៥ ថ្ងៃម្តង ហើយរាល់ពេលលក់ម្ដងៗ បានប្រមាណពី១-២ពាន់ក្បាល ដោយកូនកង្កែបមួយក្បាលមានតម្លៃ ៣00រៀល»។
កសិករវ័យក្មេងរូបនេះ បានចាប់ផ្ដើមចិញ្ចឹមនៅខែឧសភា ប៉ុន្តែក្នុងរយៈពេល២ខែប៉ុណ្ណោះ នាងទទួលបានជោគជ័យ ដោយទីផ្សារកង្កែបរបស់នាងអាចផ្គត់ផ្គង់ទៅសៀមរាប និងមណ្ឌលគិរី។ និស្សិតឆ្នាំទី៣ កន សុខណុច រៀបរាប់ថា៖ «នៅថ្ងៃអនាគត ខ្ញុំមានបំណងចង់ពង្រីកវិស័យកសិកម្ម [កសិដ្ឋានចិញ្ចិមកង្កែប] ហ្នឹង ដើម្បីឲ្យប្រជាពលរដ្ឋយើងជួយគាំទ្រកសិផលខ្មែរ និងកាត់បន្ថយការនាំចូលពីក្រៅប្រទស ហើយខ្ញុំមានបំណងចង់ចែករំលែកចំណេះដឹងដល់កសិករផ្សេងទៀតដែលមានជីវភាពខ្វះខាត»។
រូបភាពពីហ្វេសប៊ុកលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ
ទោះបីមានវ័យក្មេង និងកំពុងសិក្សាឆ្នាំទី៣ក៏ដោយ កញ្ញា កន សុខណុច បញ្ជាក់ថា ការចិញ្ចឹមកង្កែប មិនមានជាបញ្ហាប្រឈមឡើយ។ សម្រាប់កញ្ញា សុខណុច អ្វីជាផលលំបាក គឺពេលមានភ្លៀងធ្លាក់ ធ្វើឲ្យកូនកង្កែបមានជំងឺហើមពោះ និងងាប់ច្រើន។
តាមរយៈសកម្មភាពជោគជ័យរបស់យុវតី កន សុខណុច បានធ្វើឲ្យរដ្ឋមន្ត្រីកសិកម្ម លោក វេង សាខុន កោតសរសេរី។ លោក វេង សាខុន លើកឡើងលើទំព័រហ្វេសប៊ុកបែបនេះ៖ «ក្នុងពេលអនាគតដ៏ខ្លីខាងមុខ ខ្ញុំមានក្តីសង្ឃឹមថា ការចិញ្ចឹមរបស់ក្មួយនឹងក្លាយទៅជាកសិដ្ឋានបង្កាត់ និងភ្ញាស់កូនកង្កែប អាចចែកចាយកូនកង្កែប និងចំណេះដឹងជូនដល់កសិករយកទៅចិញ្ចឹម ដើម្បីបង្កើនប្រាក់ចំណូលក្នុងគ្រួសារ»៕
រូបភាពពីហ្វេសប៊ុកលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ
ដោយ៖ ហ៊ីម អ៊ឹមរ៉ន
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com