ខេត្តឧត្តរមានជ័យ ត្រៀមខ្លួនជាស្រេចរង់ចាំភ្ញៀវទេសចរក្នុងពេលឈប់សម្រាកខាងមុខ...
ភ្នំពេញ៖ ឧត្តរមានជ័យ ជាខេត្តមួយស្ថិតនៅក្នុងតំបន់ជួរភ្នំដងរែក ដែលមានសក្តានុពលទេសចរណ៍ទៅលើ តំបន់ទេសចរណ៍វប្បធម៌ ប្រវត្តិសាស្ត្រ និងធម្មជាតិ។ ខេត្តដែលមានសក្តានុពលទេសចរណ៍មួយនេះបានត្រៀមខ្លួនរួចជាស្រេចក្នុងការទទួលភ្ញៀវទេសចរនៅថ្ងៃឈប់សម្រាកចំនួន៥ថ្ងៃខាងមុខគឺចាប់ពីថ្ងៃទី១៧ ខែកក្កដា ឆ្នាំ២០២០តទៅ។
«សម្រាប់គោលដៅដែលខាងមន្ទីរទេសចរណ៍បានត្រៀមទទួលទេសចរនៅថ្ងៃឈប់សម្រាកចំនួន៥ថ្ងៃខាងមុខ គឺយើងបានត្រៀមចំនួន៣តំបន់ គឺទីតាំងទេសចរណ៍ប្រវត្តិសាស្ត្រសម្រាប់ភ្ញៀវទេសចរទៅទស្សនានៅផ្ទះតាម៉ុក តំបន់ទេសចរណ៍ធម្មជាតិយើងមានទីតាំង៣កន្លែងគឺទឹកធ្លាក់ដាចំប៉ី សហគមន៍ព្រៃឈើរលួសធំ និងមួយទៀតគឺអាតោរូងដែក សង្ឃរុក្ខវ័ន បន្ទាប់មកប្រាសាទបុរាណ គឺតំបន់ប្រាសាទតាមាន់»។ នេះបើតាមលើកឡើងរបស់លោកស្រី ធិននី មុន្នីរស្មី ប្រធានមន្ទីរទេសចរណ៍ខេត្តឧត្តរមានជ័យ ប្រាប់សារព័ត៌មាន Thmey Thmey25 តាមទូរសព្ទ។
លោកស្រី ធិននី មុន្នីរស្មី បន្ថែមថា មន្ទីរទេសចរណ៍ នឹងចុះណែនាំដល់អាជីវករក្នុងតំបន់គោលដៅទេសចរណ៍មិនឲ្យមានការតំឡើងថ្លៃទំនិញ។ ជាមួយគ្នានេះ មន្ទីរទេសចរណ៍ខេត្តឧត្តរមានជ័យ នឹងសហការជាមួយអាជ្ញាធរ ដើម្បីរៀបចំប្រជាការពារមួយចំនួន ក្នុងការឈរជើងនៅតំបន់គោលដៅការពារសុវត្ថិភាពភ្ញៀវទេសចរ ករណីមានបញ្ហាណាមួយកើតឡើង។
បើតាមប្រធានមន្ទីរទេសចរណ៍ខេត្តឧត្តរមានជ័យរូបនេះ មន្ទីរទេសចរណ៍ខេត្ត ក៏បានអនុវត្តវិធានការសុវត្ថិភាពពីការរីករាលដាលនៃជំងឺកូវីដ១៩។ លោកស្រី ធិននី មុន្នីរស្មី លើកឡើងយ៉ាងដូច្នេះ៖ «កន្លងមកយើងបានចុះផ្សព្វផ្សាយនូវវិធានការសុវត្ថិភាពរបស់ក្រសួងសុខាភិបាលដល់គោលដៅទេសចរណ៍២កន្លែងរួចមកហើយ យើងក៏បានបិទផ្ទាំងណែនាំពីវិធានការសុវត្ថិភាព ដូចជាមានការអនុវត្តន៍វិធានសុវត្តិភាព គឺការរក្សារគម្លាតពីគ្នាចម្ងាយ១.៥ម៉ែត្រ មានទឹកអាកុលនិងជែលសម្រាប់លាងដៃ និងមានការវាស់កម្ដៅនៅតាមតាមតំបន់រមណីយដ្ឋាន»។
សូមជម្រាបផងដែរ ខេត្តឧត្តរមានជ័យ មានទីតាំងទេសចរណ៍រហូតដល់៣១កន្លែង និងទទួលបានភ្ញៀវទេសចរជាង១៨ម៉ឺននាក់ក្នុងឆ្នាំ២០១៩៕
