ខេត្តត្បូងឃ្មុំ សម្ពោធ «ផ្សារចុងសប្តាហ៍» ដែលលក់បន្លែសុវត្ថិភាព និងសរីរាង្គគ្មានជាតិគីមី ជាផ្លូវការ
ភ្នំពេញ៖ «ផ្សារចុងសប្ដាហ៍» នៅក្នុងទឹកដីខេត្តត្បូងឃ្មុំ ដែលដាក់លក់បន្លែសុវត្ថិភាព និងសរីរាង្គគ្មានជាតិគីមី ដាំដុះដោយក្រុមកសិករក្នុងខេត្តត្បូងឃ្មុំផ្ទាល់ ត្រូវបានសម្ពោធឲ្យប្រើប្រាស់ជាផ្លូវការ នៅព្រឹកថ្ងៃទី២៤ កក្កដា។ នេះបើតាមទំព័រហ្វេសបុករដ្ឋបាលខេត្តត្បូងឃ្មុំ។
ការដាក់សម្ពោធផ្សារចុងសប្តាហ៍ត្បូងឃ្មុំ រៀបចំឡើងដោយមន្ទីរពាណិជ្ជកម្មខេត្ត និងមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ។ បើតាមរដ្ឋបាលខេត្តត្បូងឃ្មុំ ផ្សារចុងសប្ដាហ៍ត្បូងឃ្មុំនេះ បើកដំណើរការឡើង ក្នុងគោលបំណងជំរុញទីផ្សារសម្រាប់កសិកម្មខ្នាតតូច(AIMS) របស់កសិករក្នុងខេត្តត្បូងឃ្មុំ។ «ផ្សារចុងសប្តាហ៍» មានទីតាំងនៅមុខសាលាបឋមសិក្សារស្មីកុមារ និងមុខសាលាក្រុងសួង ខេត្តត្បូងឃ្មុំ ដោយចាប់ដំណើរការលក់ដូររៀងរាល់ចុងសប្តាហ៍ចាប់ពីថ្ងៃសុក្រ និងថ្ងៃសៅរ៍ ទី២៤-២៥ ខែកក្កដា ឆ្នាំ២០២០ ពីម៉ោង៨ព្រឹក រហូតដល់ម៉ោង៦ល្ងាច។
«ផ្សារចុងសប្ដាហ៍» ខេត្តត្បូងឃ្មុំ មានលក់បន្លែសុវត្ថិភាព និងសរីរាង្គគ្មានជាតិគីមី ដែលដាំដុះដោយក្រុមកសិករក្នុងខេត្តត្បូងឃ្មុំផ្ទាល់ រួមមាន មាន់ស្រែ អង្ករ ម្សៅដំឡូងមី និងផលិតផលកសិកម្មកែច្នៃដោយសិប្បករនៅក្នុងខេត្តជាច្រើនមុខទៀត៕
រូបភាព៖ រដ្ឋបាលខេត្តត្បូងឃ្មុំ
ដោយ៖ ហៀត វណ្ណា
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com