មណ្ឌលគិរីជាខេត្តមានអំណោយផលលើដំណាំកសិឧស្សាហកម្ម ដូចជា ប័រ កាហ្វេ កៅស៊ូ
មណ្ឌលគិរីមានលក្ខណៈពិសេសមួយប្លែកពីខេត្តជាច្រើនដែលពឹងផ្អែកលើវិស័យកម្មដែលអាចដាំដុះដំណាំ កសិឧស្សាហកម្មដូចជា ប័រ កាហ្វេ កៅស៊ូ ក្រូចវល្លិ៍ ជាដើម។ ក្រៅពីនោះក៏មានដំណាំស្រូវ បន្លែរួមផ្សំ ដែលមានពលរដ្ឋចំនួន ៨២ ភាគរយនៃប្រជាជនសរុបនៃខេត្តមណ្ឌលគិរី ប្រកបរបរកសិកម្ម។ នេះបើតាមការលើកឡើងរបស់លោក ស្វាយ សំអ៊ាង អភិបាលខេត្តមណ្ឌលគិរីនៅថ្ងៃទី ១៦ កក្កដា ក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្តរបស់ខេត្តមណ្ឌលគិរី»។
យោងតាមរបាយការណ៍របស់ខេត្តមណ្ឌលគិរី ផ្ទៃដីដាំដុះដំណាំស្រូវអនុវត្តបានសរុប ២២.៩៨៨ហិកតា ទិន្នផលជាមធ្យម ២,៩៨តោន/ហិកតា បរិមាណផលសរុប ៦៨.៥៦៥តោន ដែលក្នុងមួយឆ្នាំសល់ស្រូវចំនួន ៤០.០០០តោនសម្រាប់នាំចេញ។ ដោយឡែកដំណាំកៅស៊ូក្រុមហ៊ុនអនុវត្តបានចំនួន ៣១.២៣១,៩៨ហិកតា ផ្ទៃដីធ្វើអាជីវកម្មសរុបចំនួន ៥.២៨៦,៨២ហិកតា បរិមាណផលសរុប ៤.៨៦២.២៨តោន (ជ័រស្ងួត) ។
ដំណាំកៅស៊ូគ្រួសារអនុវត្តបានចំនួន ១១.៣០៥,៤៣ហិកតា ស្មើនឹង១.៥៨៩គ្រួសារ និងផ្ទៃដីធ្វើអាជីវកម្មសរុបចំនួន ៣.៣៩២,១៣ហិកតា បរិមាណផលសរុប ៣.៧៦៤.៦តោន(ជ័រស្ងួត) ស្មើនឹង ២០៧គ្រួសារ។
ក្រៅពីនោះមានដំណាំរួមផ្សំចំនួន ៥៦០ហិកតា លើដំណាំ ពោត និងបន្លែគ្រប់មុខ។ សម្រាប់ដំណាំឧស្សាហកម្មដូចជា សណ្តែកបាយ សណ្តែកដី សណ្តែកអង្គុយ ដំឡូងមី អនុវត្តបានសរុប ២០.៤៦៥ហិកតា។ និងដំណាំអចិន្ត្រៃយ៍អនុវត្តបានសរុប ៩.៦៤៦ហិកតា មាន ស្វាយចន្ទី កាហ្វេ ដូង ចេក ស្វាយ ប័រ ទុរេន សាវម៉ាវ ក្រូច ទៀប ជាដើម។
ខេត្តមណ្ឌលគិរីស្ថិតនៅភាគឦសាន មានចម្ងាយប្រមាណ ៣៨៣គីឡូម៉ែត្រពីរាជធានីភ្នំពេញ។ មានផ្ទៃដីសរុប ១៤.២៨៨គីឡូម៉ែត្រក្រឡា គ្របដណ្តប់ដោយព្រៃឈើ ប្រជុំភ្នំ និងខ្ពង់រាប សំបូរដោយជ្រលងដងអូរ។ មានពលរដ្ឋជាជនជាតិដើមភាគតិចចំនួន ០៨ ជនជាតិដូចជា ជនជាតិ ព្នង ក្រោល គ្រឹង ស្ទៀង ថ្មូន ទំពួន ចារាយ និង រដែរ ក្នុងនោះក្រៅពី ៨២ភាគរយប្រកបរបរកសិកម្ម មាន ១៨ភាគរយប្រកបរបរសេវាកម្ម និងសិប្បកម្ម៕
