ភ្នំពេញ៖ ស្ថានភាពអាកាសធាតុនៅទូទាំងប្រទេសកម្ពុជា អាចនឹងមានភ្លៀងធ្លាក់ពីតិចទៅច្រើន ដោយសារតែការប្រែប្រួលជាបន្តបន្ទាប់ នៃខ្យល់មូសុងនិរតី ដែលគ្រោងនឹងបោកបក់មកលើប្រទេសកម្ពុជានាពេលខាងមុខនេះ។ នេះបើតាមសេចក្ដីប្រកាសព័ត៌មានរបស់ក្រសួងធនធាតុទឹក និងឩតុនិយម នៅថ្ងៃទី១៤ ខែកក្កដា នេះ។
ការព្យាករណ៍ដដែលបញ្ជាក់ថា នៅថ្ងៃទី១៥-១៧ ខែកក្កដា ខ្យល់មូសុងនិរតី នឹងបោកបក់នៅក្នុងល្បឿនលឿនមកលើប្រទេសម្ពុជា ដែលនឹងធ្វើឱ្យបណ្ដាខេត្តដែលនៅតំបន់ជួរភ្នំដងរែក និងខ្ពង់រាបឦសានព្រមទាំងបណ្ដាខេត្តនៅជាប់មាត់សមុទ្រ នឹងមានភ្លៀងពីតិចទៅមធ្យម។
ចំណែកឯបណ្ដាខេត្តនៅតាមតំបន់វាលទំនាបកណ្ដាលវិញ ក៏នឹងមានភ្លៀងធ្លាក់រាយប៉ាយក្នុងកម្រិតពីតិចទៅបង្កួរដែរ ប៉ុន្តែផ្នែកខ្លះនៃបណ្ដាខេត្តនៃភាគកណ្ដាល និងភាគខាងលើអាចនឹងមានភ្លៀងធ្លាក់ច្រើនខុសពីតំបន់ផ្សេងទៀត។
រីឯចាប់ពីថ្ងៃទី១៨-២១ ខែកក្កដាវិញ ស្ថានភាពខ្យល់មូសុងនិរតី នឹងចុះខ្សោយ ហើយស្ថានភាពទឹកភ្លៀងនឹងថមថយមកក្នុងកម្រិតខ្សោយទៅតាមនោះដែរ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com